Jesupa jarateeda miak'ãi p'anùùrã mia amaanaadamerã
(Mateo 19.1-12; Lucas 16.18)
10
1 Jesús uchiap'eda chi k'õp'ãyoorã ome Capernaumdeepa, wãjida Jordán to k'îraik'a eeree, Judea eujãde panarutamaa. Mama p'anùde waya Jesús badamãi eperãarã cheepurupachida, eperãarãpa oopatap'edaak'a iru wãrumaa. Waya Jesupa jarateemaa beeji naaweda oopatak'a. 2 Mãga nùde fariseorã ûk'uru irumaa chejida. Moisepa p'ãda merapii jîak'aapa, iidijida:—¿Ùmùk'îrapa ichi wêra amaaipia bùk'ã? ajida.
3 Irua p'anauji:
—¿K'ãata ûraaji Moisepa?
4 Jarajida:
—Moisepa ûraajida ajida, wêra amaaru pùrã, mia amaada k'art'a p'ã teeipia bù.a
5 Mãpai Jesupa maaji:
—Moisepa mãga jaraji parã judiorã k'ùùrù k'isua p'anadairã. 6 Mamîda Tachi Ak'õrepa na eujã ook'ãri,
‘Ooji ùmùk'îra mãik'aapa wêra.’ (Génesis 1.27)
7 ‘Mapa ùmùk'îrapa atabëiit'ee chi ak'õre chi nawe ome, araa p'anapataadait'ee chi wêra ome. 8 Mãgá eperã omeeweda eperã apai pùk'a p'aneedait'ee.’ (Génesis 2.24)
Eperã omé p'anù mîda, jîp'a eperã apai pùk'a p'aneepata Tachi Ak'õre k'îrapite. 9 Tachi Ak'õrepa mãgá eperãarã omé araa papik'ãri, apidaapa amaapidaik'araa bùda aji.
10 Aù t'êepai teeda p'anadak'ãri, Jesús ome nipapataarãpa pedee p'aneejida fariseorãpa iididap'edaade. 11 Jesupa jaraji:
—Eperãpa chi wêra amaat'aaru pùrã, awaraa wêra ataik'araa bù. Mãga ooru pùrã, p'ek'au oomaa bù Tachi Ak'õre k'îrapite mãik'aapa chi wêra k'îrapite, Tachi Ak'õre Ûraa p'ãdade jara bairã wêra iru bak'ãri, awaraa ome k'ãiik'araa bù. 12 Ichiaba wêrapa chi ùmùk'îra amaat'aaru pùrã, awaraa ùmùk'îra ataik'araa bù. Mãga ooru pùrã, auk'a p'ek'au oomaa bù Tachi Ak'õre k'îrapite.
Jesupa warrarã bendiciada
(Mateo 19.13-15; Lucas 18.15-17)
13 Warrarã aneejida Jesumaa iru jua bùmerã ãra ârù. Mamîda Jesús k'õp'ãyoorãpa ma warrarã aneedap'edaarã ùtrùajida. 14 Jesupa mãga unuk'ãri, t'ãri ãriidachi chi k'õp'ãyoorã ome. Mãpai mãgaji:
—¡Ùtrùanáatù! Ichiak'au mùmaa warrarã chepítù, Tachi Ak'õrepa ãra jîak'aarã bùit'ee perã ichi jua ek'ari ichideerã p'aneedamerã. 15 Mùa wãarata jararu. Warra chak'eerãpa waawee–ee ijãapata t'ãri o–îa Tachi Ak'õrede. Auk'a tachi chonaarãpa pida ijãadaipia bù p'aneedait'ee Tachi Ak'õre jua ek'ari ichideerã ome.
16 Warra chak'eerã jira atap'eda, ichi jua ãra ârù bù wãpachi mãik'aapa bendicia wãpachi.
Eperã p'arat'ara bù Jesús ome pedeeda
(Mateo 19.16-30; Lucas 18.18-30)
17 Jesús wãit'ee arude, eperã p'ira chep'eda, iru k'îrapite bedabaidachi mãik'aapa mãgaji:
—Tachi Jarateepari t'ãri pia, ¿k'ãata mùa ooipia bùma aji, ùt'aa wãit'ee?
18 Jesupa p'anauji:
—¿Sãap'eda mùmaa t'ãri pia bùda a bùma? aji. T'ãri pia apaita bù; mãgà Tachi Ak'õre. 19 Pùa k'awa bù Tachi Ak'õrepa Moisemaa ûraa p'ãpida:
‘Eperã peenáaji; miak'ãi bù pùrã, awaraarã ome k'ãináaji; nechùanáaji; seewa jaranáaji chîara k'achiade baaipiit'ee; ichiaba chîara k'ûranáaji; pùchi ak'õre mãik'aapa pùchi nawe k'inia iru baparíiji mãik'aapa ãra pedee ûriparíiji.’b (Éxodo 20.12-16)
20 Mãpai ma eperãpa maaji:
—Tachi Jarateepari, mùa ma jõma ooparida aji, k'ûtrãaweda.
21 Jesupa irumaa k'inia ak'ùji mãik'aapa mãgaji:
—Ne–inaa aba waide oo–e bù. Pùchi net'aa jõmaweda netok'oonáji mãik'aapa chupùria beerãmaa ma p'arat'a téeji. Mãga ooru pùrã, ne–inaa pipùara iru bait'ee Tachi Ak'õre eujãde. Mãga oop'eda, mù ome nipa chéji.
22 Ma eperãpa mãga ûrik'ãri, k'îsia paraadachi mãik'aapa k'îra pia–ee wãji, p'arat'a audú k'inia bada perã.
23 Jesupa ichi ik'aawa p'anadap'edaarãmaa ak'ùp'eda, mãgaji chi k'õp'ãyoorãmaa:
—¡Chaaree bait'ee p'arat'ara beerã p'aneedait'ee Tachi Ak'õre jua ek'ari ichideerã ome!
24 Jesús k'õp'ãyoorã ak'ùtrua para beeji mãga ûridak'ãri. Mãpai waya Jesupa maaji:
—Aai, warrarã, ¡chaaree bù p'arat'ara bù beeit'ee Tachi Ak'õre jua ek'ari ichideerã ome! 25 Chaareera bùda aji, p'arat'ara bù beeit'ee Tachi Ak'õre jua ek'ari, camello aguja taude wãyaai k'ãyaara.
26 Chi k'õp'ãyoorãpa mãga ûridak'ãri, waapùara p'era pùk'a para beeji mãik'aapa ãchi pitapai iidi para beeji:
—Mãgara, ¿k'aita p'oyaa ùt'aa wãyama? ajida.
27 Jesupa ãchimaa ak'ùji mãik'aapa p'anauji:
—Eperãarãpa p'oyaa ooda–e, audú chaaree bairã. Mamîda Tachi Ak'õre–it'ee ne–inaa chaaree wê–eda aji.
28 Mãpai Pedropa mãgaji:
—Tai net'aa jõmaweda atabëijida pù ome nipapataadait'ee.
29 Jesupa maaji:
—Mùa wãarata jararu. Parãpa atabëijida pãchi te, âpema, âpewêra, nawe, ak'õre, warrarã mãik'aapa eujã, mù k'aurepa mãik'aapa mùa pedee pia jaratee bù k'aurepa. 30 Mamîda net'aa atabëidap'edaarãpa ma k'ãyaara na p'ek'au eujãde p'anù misa, na ne–inaa atada cien audú atadait'ee: te, âpemaarã, âpewêraarã, naweerã, warrarã mãik'aapa eujã, chîarapa ãra miapi iru p'anù jida mù k'aurepa. Ma awara piuk'ãri, ichita chok'ai bapariit'ee Tachi Ak'õre ome. 31 Mamîda ârapema waibùara p'anùùrã eperãarã k'îrapite, ek'ariara p'anadait'ee Tachi Ak'õre k'îrapite. Jõdee ek'ariara p'anùùrã eperãarã k'îrapite waibùara p'anadait'ee Tachi Ak'õre k'îrapite.c
Jesupa jarada õpee jarada ichi peedait'ee
(Mateo 20.17-19; Lucas 18.31-34)
32 Aù t'êepai Jesús apemaarã naa wãji Jerusalendee. Chi k'õp'ãyoorã p'era pùk'a iru t'êe wãjida. Awaraarã ichiaba iru t'êe waaweede wãjida. Mãpai Jesupa waya chi k'õp'ãyoorã doce awara ãi t'â p'e ataji mãik'aapa nepùrùji ichi p'asait'ee bù:
33 —Tachi wãruta Jerusalendee. Mama mù, chi Eperã Ak'õre Truadepema, jita atadait'ee mãik'aapa ateedait'ee p'aareerã poroorãmaa mãik'aapa Moisepa p'ãda jarateepataarãmaa. Ãchia iididait'ee k'îra tewaraarãmaa mù peet'aadamerã. 34 Mù oo iru p'anadait'ee; k'îramaa idudait'ee; soopa wùdait'ee mãik'aapa peet'aadait'ee. Mamîda ewari õpeemaa mù waya chok'ai p'irabaiit'eeda aji.
Santiago Juan ome chupùria iididap'edaa
(Mateo 20.20-28)
35 Zebedeo warrarã, Santiago mãik'aapa Juan, Jesús k'ait'a chejida mãik'aapa mãgajida:
—Tachi Jarateepari, taipa ne–inaa audú k'inia p'anù. Mapa chupùria iidi p'anù mãga oomerã.
36 Irua iidiji:
—¿K'ãata k'inia p'anùma aji, mùa oomerã parã ome?
37 Mãgajida:
—Pù truade jõmaarã poro waibùa pak'ãri, tai auk'a poro waibùarã pù ek'ari p'anee k'inia p'anù; aba su–ak'ù beei pù juaraare, apema pù juabi eere.
38 Mãpai Jesupa p'anauji:
—Parãpa wãara k'awada–e p'anù k'ãata iidi p'anù. ¿Parãpa ne–inaa k'achia choodaik'ã aji, mùa chooit'ee bùk'a? Maap'eda ¿parã piu k'iniadaik'ã aji, mù piuit'ee bùk'a?
39 Ãchia p'anaujida:
—¡P'oyaadaipù!
Jesupa maaji:
—Parãpa ne–inaa k'achia choodait'eeda aji, mùa chooit'ee bùk'a. Ma awara piudait'ee mù piuit'ee bùk'a. 40 Mamîda mùa p'oyaa jara–e k'airãta mù juaraare wa juabi eere su–ak'ù p'aneedait'ee. Tachi Ak'õrepapai mãga jarai.
41 Apemaarã diez k'õp'ãyoorãpa ûridak'ãri Santiago Juan ome iididap'edaa, k'îraudachida ãchi ome. 42 Mapa Jesupa t'â p'e ataji mãik'aapa maaji:
—Parãpa k'awa p'anù ijãadak'aa beerã poro waibùarãpa ãchia oo k'iniata oopipata eperãarãmaa. Waaweepa ãchi jua ek'ari p'anùùrãpa oopata ãchia jara p'anùk'a. 43 Mamîda parãpa oodaik'araa bù ma poro waibùarãpa oopatak'a. Ma k'ãyaara ijãapataarã t'ãide chi waibùara pa k'inia bùpa apemaarã chupùria k'awaaipia bù mãik'aapa k'aripaipia bù. 44 Pia jarait'eera, parãdepema aba poro waibùa pa k'inia bù pùrã, awaraarã k'aripaipia bù, esclavopa chipari k'aripaparik'a. 45 Mù, chi Eperã Ak'õre Truadepema mîda, na p'ek'au eujãde che–e paji eperãarãpa mù jîia ùadamerã. Jîp'a cheji eperãarã o k'achiadeepa k'aripa atait'ee. Piuit'ee eperãarã chok'ara uchiadamerã p'ek'au k'achia jua ek'ariipa.
Jesupa tau p'ãriu bada Bartimeo jùpada
(Mateo 20.29-34; Lucas 18.35-43)
46 Jesús wãyaa wãk'ãri Jericó p'uurude chi k'õp'ãyoorã ome, eperãarã chok'ara auk'a chejida ãra ome. Ma p'uurudeepa uchia wãdade, o bi ik'aawa eperã tau p'ãriu bù su–ak'ù baji p'arat'a iidimaa. Ma eperã t'âjarapachida Bartimeo.d Mãgà Timeo warra paji. 47 Ûrik'ãri Jesús Nazaretdepema ichi ik'aawa wãyaa wã, ma tau p'ãriu bùpa golpe biamaa beeji:
—¡Jesús! ¡Rey David Warra,e mù chupùria k'awáaji!
48 Ma ode p'anadap'edaarãpa ùtrùat'aapachida k'îup'ee beemerã. Mamîda waapùara biapachi:
—¡Rey David Warra, mù chupùria k'awáaji!
49 Mãpai Jesús ak'ùnâ beeji mãik'aapa mãgaji:
—T'â atanátù.
Mãpai t'â atanajida tau p'ãriu bù:
—Isapai, p'irabáiji. Pù t'â bùpù. ¡Waaweenáaji!
50 Mãpai chi poroba ãyaa bat'at'aap'eda, p'inajâtù bainâ beeji mãik'aapa Jesumaa cheji. 51 Mãpai Jesupa iidiji:
—¿K'ãata k'inia bùma aji, mùa oomerã pù ome?
Tau p'ãriu bùpa p'anauji:
—Jesús, Tachi Waibùa, mùchi taupa pia unu k'inia bùda aji.
52 Jesupa mãgaji:
—Jùpajipù mùde ijãada perã. Wãipia bùda aji.
Aweda tau p'ãriu badapa pia unuji mãik'aapa Jesús t'êe wãji ode.