9
1 Jesupa ichiaba mãgaji:—Mùa wãarata jararu. Nama p'anùùrã ûk'uru piudai naaweda unudait'ee Tachi Ak'õrepa eperãarã bùru ichi jua ek'ari ichideerã p'aneedamerã.
Jesús k'îra awaradaida
(Mateo 17.1-13; Lucas 9.28-36)
2 K'ãima seismaa Jesús wãji ee ùt'ùa bù nok'ode. Ichi ome ateeji Pedro, Santiago mãik'aapa Juan. Mama ãra taide Jesús k'îra awaradachi. 3 Ichi p'aru t'o–t'oo âdaadachi pi–ia t'õdak'a. 4 Mãga nùde chi k'õp'ãyoorãpa unujida chonaarãweda p'anapatap'edaarã Elías mãik'aapa Moisés pedeemaa p'anù Jesús ome. 5 Mãpai Pedropa mãgaji Jesumaa:
—Tachi Jarateepari, ¡pia bù nama p'anadait'ee pù ome! Oodait'ee te chak'eerã õpee; aba pù–it'ee, aba Moise–it'ee, chi apema Elia–it'ee.
6 Pedropa k'îsia–ee mãga jaraji, p'era ak'ù nâbada perã apemaarã ome. 7 Mãga nùde jâararapa ãra aneu cheji. Madeepa Tachi Ak'õrepa pedeeji:
—Nãgùda aji, mù Warra k'inia. Ûrítù iru pedee. 8 Aramata ak'ùdak'ãri, ãchi ik'aawa apida unuda–e paji; Jesús aupaita ãchi ome baji.
9 Eedeepa cherutade Jesupaa jaraji ãchia unudap'edaa nepùrùnaadamerã, ichi jai–idaap'eda waya chok'ai p'irabai naaweda. 10 Maperã nepùrùda–e paji ãchia unudap'edaa. Mamîda ãchi pitapai pedee p'anapachida k'asaa jara k'inia bù “jai–idaap'eda waya chok'ai p'irabaiit'ee”. 11 Maap'eda Jesumaa iidijida:
—¿Sãap'eda Moisepa p'ãda jarateepataarãpa jarapatama ajida, chonaarãwedapema Elías naapùara cheit'ee Tachi K'aripapari k'ãyaara?
12 Irua p'anauji:
—Wãarata jara p'anù. Elías naapùara cheit'ee mãik'aapa ne–inaa jõmaweda pia ooit'ee, eperãarãpa auteebaidamerã iru t'êe cheru. Mamîda mùa jara bù: Ak'õre Ûraa p'ãdade ichiaba jara bù mù, chi Eperã Ak'õre Truadepema, miapidait'ee mãik'aapa k'îra unuamaa iru p'anadait'ee. Tachi Ak'õre Ûraa p'ãdade p'ã jêra bùk'a ichia oopiit'ee. 13 Mamîda eperã Elías jîak'aa chejipù. Mãgà t'âjarapachida Juan Bautista. Ãchia oo k'iniata oojida iru ome Ak'õre Ûraa p'ãdade jara bùk'a.
Jesupa k'ûtrãa k'ap'ùadeepa netuara uchiapida
(Mateo 17.14-21; Lucas 9.37-43)
14 Jesús, Pedro, Santiago mãik'aapa Juan pachedak'ãri apemaarã k'õp'ãyoorã p'anadap'edaamãi, unu chejida eperãarã chok'araarãpa wap'ùra iru p'anù mãik'aapa Moisepa p'ãda jarateepataarã ûk'uru aupedee jõnù ma k'õp'ãyoorã ome. 15 Jesús unudak'ãri, ak'ùtrua para beeji mãik'aapa p'ira wãjida irumaa auteebaide. 16 Mãpai Jesupa iidiji ãchimaa:
—¿K'ãaredeta aupedee p'anùma mù k'õp'ãyoorã ome?
17 Eperãpa p'anauji:
—Tachi Jarateepari, mù warra aneeji pùmaa netuarapa ichiwa iru bairã. 18 Ma netuarapa wawat'ù bat'at'aapari eujãde. Maap'eda it'aidee k'õp'ep'ee che nâbeepari, k'ida kierrkierree nâbeepari, ichiaba k'ap'ùa ùbùa nâbeepari. Mùa chupùria iidiji pù k'õp'ãyoorãmaa ma netuara uchiapit'aadamerã. Mamîda p'oyaada–e paji.
19 Mãpai Jesupa mãgaji arii p'anadap'edaarãmaa:
—Aai, eperãarã, ¿at'ãrita mùde ijãada–e p'anùk'ã? ¡Ijãadak'aaråk'apù p'anù! ¿Jõmasaa taarãit'ee parã ome ijãarutamaa? Anéetù ma warra.
20 Mãpai aneejida Jesumaa. Mamîda netuarapa Jesús unuk'ãri, warra wawat'aaji mãik'aapa bat'at'aaji eujãde. It'aideepa k'õp'ep'ee eujãde pùrabai nâbeeji. 21 Jesupa iidiji ma warra ak'õremaa:
—¿Sãaweda mãgá nâbùma? aji.
Chi ak'õrepa p'anauji:
—Ma–ãriweda. 22 At'apai netuarapa bat'at'aapari t'ùpùtau urua nâbùde maa–e pùrã toida peet'aait'ee. Mapa p'oyaa ooita bù pùrã, tai chupùria k'awáaji mãik'aapa k'aripapáde aji.
23 Jesupa p'anauji:
—¿K'asaa pù pedee? ¿P'oyaa ooik'ã a bùk'ã? ¡Eperãpa mùde ijãa bù pùrã, mùa ne–inaa jõma oopari!
24 Mãpai chi warra ak'õrepa golpe pedeeji:
—Ijãa bùda aji. ¡Mù k'aripáji waapùara ijãait'ee!
25 Jesupa unuk'ãri eperãarã seedaruta, mãgaji netuaramaa:
—Netuara, ichiwapipari mãik'aapa k'ùùrù k'îpipari, uchíaji jã warra k'ap'ùadeepa mãik'aapa waa iru k'ap'ùade t'îunaapáde aji.
26 Mãpai netuara biadachi mãik'aapa warra golpe wawat'aaji. Maap'eda uchiadachi warra k'ap'ùadeepa. Ma warra piudak'a atabaibeeji. Mãpai arii see nâbadaarãpa mãgajida:
—Piudachida, ajida.
27 Mamîda Jesupa juade jita atap'eda, p'irabai ataji. Mãpai ma warra k'ap'ùa pia beeji.
28 Maap'eda Jesús wãji teedaa chi k'õp'ãyoorã ome. Ituaba bak'ãri, chi k'õp'ãyoorãpa iidijida Jesumaa:
—¿Sãap'eda taipa ma netuara p'oyaa uchiapida–e pajima? ajida.
29 Jesupa p'anauji:
—Ùt'aa t'â bùpapai mãgee netuara uchiapiparida aji.
Jesupa waya jarada ichi peedait'ee
(Mateo 17.22-23; Lucas 9.43-45)
30 Mamãik'aapa wãdak'ãri, Galilea eujãde wãyaajida. Mamîda eperãarãmaa k'awapi k'inia–e bada perã, 31 Jesupa ne–inaa oo–e paji mama, chi k'õp'ãyoorãmaa jarateemaa bada perã. Mãgapachi:
—Eperãpa mù, chi Eperã Ak'õre Truadepema, baaipiit'ee k'achia beerã juade mãik'aapa ãchia mù peepit'aadait'ee. Mamîda ewari õpeemaa mù waya chok'ai p'irabaiit'ee.
32 Chi k'õp'ãyoorãpa k'awada–e paji sãap'eda irua mãga jaraji. Mamîda waawee p'anajida iididait'ee.
Eperã waibùara bù Tachi Ak'õre k'îrapite
(Mateo 18.1-5; Lucas 9.46-48)
33 Pachejida Capernaum p'uurude. Teeda p'anùde, Jesupa iidiji:
—¿Parã k'ãata pedee chewãjidama aji, ode?
34 Mamîda k'îra nejasiapa k'îup'ee para beeji, ode aupedee chewãdap'edaa perã, ãchidepema k'aita waibùara bù. 35 Jesús su–ak'ù beeji mãik'aapa chi k'õp'ãyoorã doce t'â p'e atap'eda, maaji:
—Eperã apemaarã k'ãyaara waibùara pa k'inia bù pùrã, ek'ariara baipia bù mãik'aapa t'ãri o–îa apemaarã k'aripaipia bù.
36 Mãpai Jesupa warra chai jua jita atap'eda, ak'ù nâbùji ãchi esajîak'a. Jira atap'eda, wëre ataji jarateeit'ee mãik'aapa jaraji:
37 —Eperãpa mùde ijãa bù k'aurepa nãgà warra chaik'a auteebairu pùrã, mù jida auk'a auteebaipari. Ma awara mù aupai auteebai–e; ichiaba Tachi Ak'õre auteebai bù, iruata mù pëida perã.
Ak'õrede ijãak'ãri, ne–inaa pia oopari
(Mateo 10.42; Lucas 9.49-50)
38 Mãpai Juanpa maaji:
—Tachi Jarateepari, taipa unujida eperãpa pù t'â jarap'eda, netuara uchiapi bù eperãarã k'ap'ùadeepa. Mãga unudak'ãri, taipa waa oonaapáde ajida, tachi ome nipak'aa perã.
39 Jesupa p'anauji:
—Ichiak'au oopítù. Eperãpa ne–inaa pia ooru pùrã mù t'âde eperãarãpa p'oyaa oodak'aa, mãga oop'eda, pedee k'achia jara–e pai mù ãpùte. 40 Tachi ome nipak'aa pùjida, tachi eere bùda aji. 41 Mùa wãarata jararu. Eperãpa parãmaa pania vaso aba pida teeru pùrã todamerã, parãpa mù, Cristode ijãapata perã, Tachi Ak'õrepa ma eperãmaa ne–inaa pi–ia teeit'eeda aji.
K'îrak'aupai p'ek'au k'achia oodai
(Mateo 18.6-9; Lucas 17.1-2)
42 —Mamîda eperãpa mùde ewaa ijãa p'anùùrãmaa acha bù warra chaik'a, ijãapiamaa bù pùrã, piara bak'aji k'ûruma iru otaude jâ atadap'eda, p'usa jãde bat'at'aadait'ee. 43-44 Pùchi juapa ne–inaa ooda k'aurepa pù k'achiade baairu pùrã, ma k'achia oo amáaji, pùchi jua t'ùap'et'aak'ajik'a. Piara bù ùt'aa wãit'ee jua mosaa, k'ap'ùa jõmaweda atuai k'ãyaara t'ùpùtau ichita jêrajêraa jira bùde. 45-46 Ichiaba pùchi bùùrùpa ne–inaa ooda k'aurepa k'achiade baairu pùrã, ma k'achia oo amáaji, pùchi bùùrù t'ùap'et'aak'ajik'a. Piara bù Ak'õre ode nùk'anùk'aa nipait'ee bùùrù abapai bùk'a, k'ap'ùa pia tok'arradee bat'a atapëi k'ãyaara. 47 Ichiaba pùchi taupa ne–inaa unuda k'aurepa pù k'achiade baairu pùrã, ma k'achia oo amáaji pùchi tau êt'ak'ajik'a. Piara bù Tachi Ak'õre ode nipait'ee tau abapai bùk'a, tau omeeweda nipai k'ãyaara netuara ode tok'arradee.
48 ‘Mama ichita miapiit'ee tachi chiara k'opari k'ipa piuk'aa mãik'aapa tachi k'ap'ùa paapari t'ùpùtau k'îik'aa bùde.’ (Isaías 66.24)
49 —T'ã p'urupata chik'ode mik'iapiamaapa. Auk'a Tachi Ak'õrepa ichideerã pia ak'ù bapari atuapiamaapa netuara o k'achiade. 50 Ma awara chik'o warraara bù t'ã ome. Mamîda t'ã k'ùyaa–edaik'ãri, ma chik'o warraa–ee bù. ¿Sãga ma t'ã waya k'ùyaapiima? Ichiaba tachi t'ãri pia p'anada–e pak'ãri, Tachi Ak'õre k'îrapite servi–e p'anù. Mapa óotù Ak'õre Ûraade jara bùk'a. Mãgá k'ãiwee p'anadait'ee apemaarã ome.