Jesupa eperãarã cuatro mil nek'opida
(Mateo 15.32-39)
8
1 Ewari aba eperãarã chok'ara waya see nâbaji Jesús badamãi. Mamîda nek'odait'ee wêe p'anadap'edaa perã, chi k'õp'ãyoorã t'â p'eji mãik'aapa mãgaji:2 —Mùa na eperãarã chupùria k'awaa bù, mù ome k'ãima õpee p'anadairã mãik'aapa ârá ãchi nek'odait'ee wêe p'anù. 3 Mãgá pëiru pùrã ãchi te chaa, ode k'ap'ùa t'ûmaak'oodaridait'ee jarrapa, ûk'uru t'ùmùùpa che p'anadairã.
4 Chi k'õp'ãyoorãpa iidijida:
—Mamîda ¿sãga nek'opidayama ajida, nama eperãarã wê–e perã chik'o netodait'ee taimaa?
5 —¿Pan jõmasaa iru p'anùma? aji.
Maajida:
—Siete.
6 Eperãarã su–ak'ù beepiji mãik'aapa ma pan atap'eda, ùt'aa t'âji gracias jarait'ee Tachi Ak'õremaa. K'õrak'oop'eda teeji chi k'õp'ãyoorãpa eperãarãmaa jedenadamerã. 7 Ichiaba chik'o chak'eerã chok'ara–ee iru p'anajida. Jesupa ùt'aa iidik'ãri, chok'araara eepadachi mãik'aapa jedepiji. 8 Jõmaarãpa k'ojida bi jãwaadarutamaa. K'oraa siete ipuru p'ejida pan chik'o ome beeda. 9 Chi nek'odap'edaarã perá cuatro mil paji. Maap'eda Jesupa ãchi temaa pëiji. 10 Mãpai Jesús chi k'õp'ãyoorã ome barcode bataup'eda, wãji Dalmanuta eujãdee.
Ne–inaa eperãarãpa p'oyaa oodak'aa unu k'inia p'anadap'edaa
(Mateo 16.1-4)
11 Mama bùde fariseorã pachejida mãik'aapa aupedeemaa p'aneejida Jesús ome. Ùmùatee k'inia p'anadap'edaa perã, iidijida ne–inaa oomerã Tachi Ak'õrepapai oopari, mãik'aapa ak'ùpimerã wãara Tachi Ak'õrepa iru pëida. 12 Jesús golpe îyapaaji mãik'aapa mãgaji:
—¿K'asaa parã pedeeta? ¿Awaraa ne–inaa unu k'inia p'anùk'ã Tachi Ak'õre juapa ooda? Mùa wãarata jararu. Mùa oo–e pait'ee parãpa iidi p'anùk'a.
13 Maap'eda mama atabëiji. Barcode bataup'eda, uchiaji lago k'îraik'a eere chi k'õp'ãyoorã ome.
Jesupa ûraada fariseorãpa oopatak'a oonaadamerã
(Mateo 16.5-12)
14 Ma wã nidade chi k'õp'ãyoorãpa k'îra atuadai p'anajida ateedait'ee ne–inaa k'oparii. Pan apai iru p'anajida barcode. 15 Jesupa ãra ûraaji:
—K'îra k'awaa nipapatáatù fariseorã pan, Herodes pan k'onaadamerã, ãchi levadura k'achia bairã.
16 Jesús k'õp'ãyoorã pedee para baji ãchi pitapai, irua jara k'inia bada k'awada–e p'anadap'edaa perã. Maajida:
—Mãga jara bù, tachi pan wêe p'anadairã.
17 Jesupa k'awaji ãrapa k'îsiadap'edaa. Mapa mãgaji:
—¿Sãap'eda pan wêe p'anùda a p'anùma? aji. ¿At'ãri k'awada–e p'anùk'ã mùa jaratee k'inia bù? ¿Pandepai k'îsia p'anù–ek'ã? aji. Mapa k'awada–e p'anù. 18 Parã tau iru p'anù mîda, unudak'aa mùa oo bù. K'ùùrù iru p'anù mîda, mùa jaratee bù ûridak'aa. ¿Maarepidata k'irãpada–ek'ã? 19 Mùa pan joisomaa jedek'ãri ùmùk'îraarã cinco milmaa, ¿chi pite beedapa k'oraa jõmasaa ipurujidama? aji.
P'anaujida:
—K'oraa docena aba.
20 —Ichiaba pan siete jededak'ãri ùmùk'îraarã cuatro milmaa, nek'odap'eda, ¿k'oraa jõmasaa ipurujidama? aji.
Maajida:
—K'oraa siete.
21 Mãpai maaji:
—¿Parãpa at'ãri k'awada–ek'ã? aji. K'îra k'aupai ijãadai fariseorã pedee mãik'aapa Herodes pedee.
Jesupa Betsaida p'uurude tau p'ãriu bada jùpada
22 Betsaida p'uurude panadak'ãri, tau p'ãriu bù ateejida Jesumaa chupùria iidide irua t'õbaimerã. 23 Jesupa ma tau p'ãriu bù juade jitap'eda, p'uuru k'idaa ateeji. Mãpai ma eperã tau jãde idut'aaji mãik'aapa ichi tau wãk'a atap'eda juapa, Jesupa maaji:
—¿Ârá pia unuruk'ã? aji.
24 Ak'ùp'eda, maaji:
—Unu bùpù eperãarã pak'uruk'a nîutee.
25 Jesupa jua waya tau ârù bùji mãik'aapa ãyaa atak'ãri, ma eperãpa pia unu beeji. Mãgá jùpa beeji. 26 Mãpai Jesupa ichi temaa pëiji mãik'aapa maaji:
—P'uurudee wãnaapáde aji, mãik'aapa p'uuru pidaarãmaa maarepida jaranaapáde aji.
Pedropa Jesús Tachi K'aripaparida ada
(Mateo 16.13-20; Lucas 9.18-20)
27 Ma t'êepai, Jesús chi k'õp'ãyoorã ome wãji p'uuru k'aipee beedee, Cesarea de Filipo p'uuru k'ait'a bù eujãde. Ode wãdade, Jesupa iidiji chi k'õp'ãyoorãmaa:
—¿Mù k'aima a p'anùma aji, eperãarãpa?
28 P'anaujida:
—Ûk'uruurãpa jara p'anù pù Juan Bautista, piup'eda p'irabaida. Awaraarãpa jara p'anù Elías. Ichiaba ûk'uruurãpa jara p'anù pù awaraa Ak'õre pedee jarapari.
29 —Parãpárama, ¿mù k'aima adaima? aji.
Pedropa p'anauji:
—Pù Cristo; Tachi Ak'õrepa pëida tachi k'aripamerã.a
30 Mamîda Jesupa jaraji:
—Awaraarãmaa mãga nepùrùnaadapáde aji.
Jesupa jarada ichi peedait'ee
(Mateo 16.21-23; Lucas 9.21-22)
31 Jesupa jarateemaa beeji:
—Mùde ijãadak'aa p'anadairã, tachi judiorã poro waibùarãpa, p'aareerã poroorãpa, mãik'aapa Moisepa p'ãda jarateepataarãpa mù miapidait'ee mãik'aapa yiaraa iru p'anadait'ee. Maap'eda mù, chi Eperã Ak'õre Truadepema, peepit'aadait'ee. Mamîda ewari õpeemaa mù chok'ai p'irabaiit'ee.
32 Mãgà pedee jaraji jõmaarã k'îrapite. Mãpai Pedropa Jesús awara ãyaa ateeji mãik'aapa ùtrùamaa beeji, mãgá pedee bada perã. 33 Mamîda Jesús p'ùrrabaiji mãik'aapa chi k'õp'ãyoorã k'îra ak'ùp'eda, mãgaji Pedromaa:
—¡Mù ik'aawaapa ãyaa wåji, Satanapa mãga jarapida perã! Pùa k'îsia–e Ak'õrepa k'îsia bùk'a. Jîp'a k'îsiamaa bùda aji, eperãarãpa k'îsiapatak'a.
Sãga nipadai Jesús ome
(Mateo 16.24-28; Lucas 9.23-27)
34 Mãga bap'eda, Jesupa chi k'õp'ãyoorã t'â p'e ataji awaraarã ome mãik'aapa maaji:
—Eperã mù ome nipa k'inia bù pùrã, k'îsiaik'araa bù ichia ne–inaa oo k'inia bùdepai. Ichi kuruso ãp'aipia bù eperã peenadait'eek'a. Ooipia bù mùa ooparik'a, ma k'aurepa miapiruta pùjida piurumaa. 35 Eperã piuamaa bù pùrã mùde ijãapari k'aurepa, mãgà piuk'ãri atuait'ee. Mamîda eperã piuru pùrã mùde ijãapari k'aurepa, mãgà ùt'aa wãit'ee ichi piuk'ãri. 36 Ma awara ¿k'ãare piata baima eperãpa ne–inaa pia na p'ek'au eujãde nâbù jõmaweda ataru pùrã, mamîda piup'eda chok'ai p'irabai–e pùrã Ak'õre eujãde? 37 Ichiaba, ¿k'ãata teeima Tachi Ak'õremaa, tachi piudap'eda chok'ai p'irabaipimerã? Mãga p'oyaa ooda–e. 38 Ârapema eperãarã audú p'ek'au oo k'inia p'anapata mùde ijãadak'aa perã. Mãùrã taide eperã k'îra nejasia bù pùrã jarait'ee mùde ijãa bù maa–e pùrã mù ûraa jarait'ee awaraarãmaa, mãgara mù, chi Eperã Ak'õre Truadepema jida k'îra nejasia bait'ee mëreda ait'ee, mù Ak'õre Waibùa k'îra wãreede chek'ãri iru angeleerã ome.