Judiorãpa ãchi k'îsiadoopa jarateedap'edaa
(Mateo 15.1-9)
7
1 Moisepa p'ãda jarateepataarã Jerusalendeepa chejida Jesús badamaa fariseorã ome. 2 Mãùrãpa unudak'ãri Jesús k'õp'ãyoorã ûk'uru jua sùùda–ee nek'o p'anù, pedee k'achia jarapachida ãra ãpùte. 3 (Fariseorãpa mãik'aapa awaraa judiorã pia bee k'inia p'anùùrãpa jua pi–ia sùùpata. Mãga jarateepachida chonaarãweda mãik'aapa at'ãri mãga oopata ãchi naawedapemaarãpa oopatap'edaak'a. Ãchi k'îsiade judiorã pia beerã nek'odaik'araa bù, mãgá ãchi jua sùùda–ee. 4 Ne–inaa k'oparii netodap'eda p'uurude, nek'odak'aa pia sùùdai naaweda. Ichiaba oopata nãgee ne–inaa awaraa ãchi naawedapemaarãpa oopatap'edaak'a: nek'odai naaweda ne–inaa mesade sùùpata; vaso, k'uuru metaldee, chok'o mãik'aapa ãchi sîu–ak'ù p'aneepatamãi.) 5 Mãga oopata perã iidijida k'ûradait'ee:—¿Sãap'eda pù ome nipapataarãpa ooda–e p'anùma ajida, tachi chonaarãpa chonaarãweda oopatap'edaak'a? Ma k'ãyaara jua pia sùùda–e p'anù nek'odai naaweda.
6 Jesupa p'anauji:
—Chonaarãweda Ak'õre pedee jarapari Isaiapa parã ãpùte wãara pedeeji. ¡Seewata Tachi Ak'õrede ijãapataarãda apata! Isaiapa mãgaji:
‘Na eperãarãpa mù k'inia iru p'anùda apata it'aipa. Mamîda ãchi t'ãripa wãara mù k'iniadak'aa. 7 Páripù mù k'îrapite ùt'aa t'âpata, oo k'inia p'anapata perã eperãarãpa jara p'anùk'a, mùa jara bùk'a oodai k'ãyaara.’ (Isaías 29.13)
8 Mãpai Jesupa mãgaji:
—Parãpa audupùara ijãapata eperãarãpa ãchi k'îsiadeepa jarateepata. Jõdee Ak'õre Ûraade p'ã jêra bùk'a oodait'ee k'îsiadak'aa.
9 Ichiaba mãgaji:
—Ak'õre Ûraa yiaraa iru p'anù. Jõdee chonaarãweda oopatap'edaak'a oo k'inia p'anapata. ¿Mãga–ek'ã? aji. 10 Chonaarãweda Tachi Ak'õrepa jaraji Moisés it'aideepa:
‘Pùchi ak'õre mãik'aapa pùchi nawe k'inia iru baparíiji mãik'aapa ãra pedee ûriparíiji.’ (Éxodo 20.12)
Ma awara jaraji:
‘Warrapa ik'achia jararu pùrã ichi ak'õremaa wa ichi nawemaa, peet'aadaipia bù.’ (Éxodo 21.17)
11 Mamîda parãpa jarateepata eperãpa jarai chi ak'õremaa wa chi nawemaa: “Pù p'oyaa k'aripa–epù, jõma mùa iru bù Corbána perã.” 12 Eperãpa mãga jarak'ãri, pia bùda apata chi ak'õreerã k'aripanaamerã. 13 Mãgà ûraa uchiapari eperãarã k'îsiadeepa. Mãgùde ijãadak'ãri, Tachi Ak'õre Ûraa yiaraa iru p'aneepata. Ichiaba awaraa ûraa jarateepata mãik'aapa ma k'aurepa eperãarãpa oodak'aa Tachi Ak'õre Ûraade jara bùk'a.
Ne–inaa tachi k'achia beepipari<R>Tachi Ak'õre k'îrapite
(Mateo 15.10-20)
14 T'êepai Jesupa eperãarã t'â p'e atap'eda, maaji:
—Jõmaarãpa mù pedee ûrítù, mãik'aapa k'awáatù mùa jararu. 15 Chik'o k'odak'ãri, tachi k'ap'ùade edú banapari. Ma chik'o k'odap'edaa k'aurepa tachi k'achia p'aneedak'aa Tachi Ak'õre k'îrapite. Ma k'ãyaara, ne–inaa eperã t'ãrideepa uchiarúpata k'achia beepipari. 16 [Pia k'îsiadapáde aji, mùa jaradade.]
17 Jesupa eperãarã atabëip'eda, t'îuji teedaa. Mama chi k'õp'ãyoorãpa iidijida:
—¿K'ãata jara k'inia bùma ajida, pùa eperãarãmaa jarateeda?
18 Irua jaraji:
—¿Mãgara, parãpa ichiaba k'awada–e p'anùk'ã? Chik'o k'odak'ãri, tachi k'achia beepik'aa Tachi Ak'õre k'îrapite, 19 t'ãride banak'aa perã. Jîp'a bide banapari, maap'eda uchiapari. (Mãga jarak'ãri, Jesupa jara k'inia baji Tachi Ak'õrede ijãapataarãpa chik'o k'îra t'ãdoo k'odaipia bù.)
20 Ichiaba jaraji:
—Mamîda ne–inaa k'achia eperã t'ãrideepa uchiadapa tachi k'achia beepipari Tachi Ak'õre k'îrapite. 21 Eperã t'ãrideepa nãgee k'îsia k'achia uchiaparida aji: p'ek'au ooit'ee awaraarã ome; nechùait'ee; chîara peeit'ee; 22 miak'ãi bù awaraarã ome k'ãiit'ee; chîara net'aa k'âait'ee; chîaramaa ne–inaa k'achia ooit'ee; chîara k'ûrait'ee; ne–inaa k'achia ooi awaa bapariit'ee; chîara k'îra unuamaa iru bapariit'ee irua ne–inaa iru bù k'aurepa; chîara ãpùte seewa jara nipait'ee; audua bapariit'ee mãik'aapa ne–inaa pariatua oopariit'ee. 23 Jõmaweda ma ne–inaa k'achia uchiapari eperã t'ãrideepa. Ma ne–inaa oodak'ãri, k'achia p'aneepata Tachi Ak'õre k'îrapite.
Wêra judio–ee bùpa Jesude ijãada
(Mateo 15.21-28)
24 Mamãik'aapa Jesús Tiro p'uuru k'ait'a wãji chi k'õp'ãyoorã ome. Wãji teedaa ichi unupi k'inia–e bada perã. Mamîda p'oyaa miru–e paji. 25-26 Mãga nùde wêra k'au netuara merãtùa bada nawepa ûriji Jesús mama bù. Ma wêra judio–e paji; Sirofenicia eujãdepema paji.b Teedaa wãp'eda, bedabai nâbanaji Jesús k'îrapite mãik'aapa irumaa chupùria iidiji:
—Mù k'au k'ap'ùade netuara merãtùa bù. Chupùria k'awáaji mãik'aapa uchiapit'aapáde aji, iru k'ap'ùadeepa.
27 Mamîda Jesupa mãgaji:
—Judiorãmaa ita–aria naa mùmaa chupùria iidipíji. Pia–e bùda aji, warrarã chik'o jãri atait'ee mãik'aapa usaarãmaa tee baibùit'ee.
28 Ma wêrapa p'anauji:
—Mãgada aji, Tachi Waibùa. Mamîda usaarãpa paara k'opata warrarã juadeepa baaida mesa ek'ari. Mapa, mù judio–e mîda, pùmaa chupùria iidi bùda aji.
29 Mãpai Jesupa maaji:
—Pia p'anauji. Wãpáde aji, pù k'au k'ap'ùadeepa netuara uchiada perã.
30 Ma wêra teedaa panak'ãri, chi k'au p'arude k'ãiwee ununaji. Netuara uchiadai baji chi k'au k'ap'ùadeepa.
Jesupa eperã k'ùùrù k'î bù mãik'aapa pedee atua bù jùpada
31 Jesús uchiaji Tiro p'uuru k'ait'a bù eujãdeepa chi k'õp'ãyoorã ome. Wãyaaji Sidón p'uurude panait'ee Decápolis eujãde, Galilea Lago k'ait'a. 32 Mama Jesumaa eperã ateejida. Ma eperã k'ùùrù k'î baji mãik'aapa pedee atua baji. Chupùria iidijida Jesumaa iru jua bùmerã ma eperã ârù, jùpa beemerã. 33 Jesupa awara ãyaa ateeji see nâbadamãiipa mãik'aapa ichi jua chak'epa t'ùt'aaji ma eperã k'ùùrù chaa. Ichiaba idubapa t'õbait'aaji iru k'îrame. 34 Maap'eda ùt'aa ak'ùji, golpe îyapaaji mãik'aapa mãgaji ma eperãmaa:
—¡Efatá! (Jara k'inia bù: “¡K'ùùrù êesáaji!”)
35 Aramata pedee atua bada pia pedeeji mãik'aapa k'ùùrù êesaadachi. 36 Mãpai Jesupa jaraji apidaamaa jaranaadamerã. Mãga jarapachi mîda, waapùara jara wãpachida. 37 Chi ûridap'edaarã o–îa ak'ùtrua para beeji mãik'aapa pedee para beeji:
—Jesupa jõma pia ooparipù. ¡K'ùùrù k'î bù ûripipari mãik'aapa pedee atua bù paara pedeepipari!