Jesús Nazaret p'uurudee wãda
(Mateo 13.53-58; Lucas 4.16-30)
6
1 Mamãik'aapa Jesús wãji ichi warida p'uurudee chi k'õp'ãyoorã ome. 2 Âipata ewate Ak'õre Ûraa jarateemaa beeji mãpema Ak'õre Ûraa jarateepata tede. Eperãarãpa Jesupa jarateeda ûridak'ãri, p'era pùk'a iidi para beeji:—¿Sãmapù k'awaajima ajida, ichia jarateemaa bù? ¿Sãgapù k'îsia k'awaa beejima? Ma awara, ¿Sãga ooparima ne–inaa eperãarãpa p'oyaa oodak'aa ãchi juadoopa? 3 ¿Jãgùpa ne–inaa pak'urudee oopari–ek'ã? ¿Ichi María warra–ek'ã? ¿Santiago, José, Judas mãik'aapa Simón chi âpemaarã–ek'ã? Ichiaba, ¿ichi âpewêraarã nama p'anapata–ek'ã ajida, tachi t'ãide?
—Jõmaarã t'ãide ûri k'inia p'anapata Tachi Ak'õre pedee jaraparipa jara bù. Mamîda ichi p'uurudepemaarãmaa jaratee chek'ãri, ijãadak'aa. Auk'a ijãadak'aa jarateek'ãri ichi ëreerãmaa mãik'aapa ichi tedepemaarãmaa.
5 Mama irua ne–inaa eperãarãpa p'oyaa oodak'aa oo–e paji, ichide ijãada–e p'anadap'edaa perã. K'ayaa beerã chok'ara–eepai jùpaji ichi juapa t'õbaik'ãri. 6 P'era pùk'a beeji ichi p'uurudepemaarãpa ichide pia ijãada–e pada perã.
Jesupa chi k'õp'ãyoorã pëida Ak'õre Ûraa jarateenadamerã
(Mateo 10.5-15; Lucas 9.1-6)
Jesús p'uuru bee chaa nipaji jarateede. 7 Mãgá nidade chi k'õp'ãyoorã doce t'â p'eji mãik'aapa omee–omee pëiji netuara uchiapidamerã ichi t'âde, ichi jõmaarã k'ãyaara waibùara bairã. 8 Jaraji ne–inaa ateenaadamerã; jîp'a ateedamerã pak'uru t'ùdùk'adait'ee ode wãdak'ãri. Wãdaipia bù muchila wêe, chik'o wêe mãik'aapa p'arat'a wêe. 9 Ãchi chancla mãik'aapa p'aru jâdaipia bù, mamîda awaraa p'aru ateedaik'araa bù jâdait'ee. 10 Mãpai mãgaji:
—Parã teedaa wãdak'ãri, aù tede p'anéetù, mamãik'aapa wãruta misa. 11 Mamîda eperãarãpa parã auteebaida–e pùrã, ichiaba parãpa jarateeruta ûri k'iniada–e pùrã, mamãik'aapa uchíatù. Uchiadak'ãri, bùùrùdepema yooro p'ora nêep'edapáde aji, ak'ùpidait'ee Ak'õrepa mãga k'inia–e bù. [Ãra k'achiara uchiadait'ee Sodoma pidaarã mãik'aapa Gomorra pidaarã k'ãyaara Tachi Ak'õre k'îrapite panadak'ãri, iru ewari waibùa ewate.]
12 Mãpai chi k'õp'ãyoorã wãjida jarateede. Eperãarãpa ma jarateeda ûridak'ãri, ãchia p'ek'au k'achia oopata oo amaajida mãik'aapa Tachi Ak'õrede ijãajida. 13 Ichiaba netuara chok'ara uchiapipachida eperãarã k'ap'ùadeepa mãik'aapa aceitepa p'urudak'ãri, k'ayaa beerã chok'ara jùpapachida.
Juan Bautista piuda
(Mateo 14.1-12; Lucas 9.7-9)
14 Awaraarã ideepa Rey Herodepaa ûriji Jesupa ooda, iru t'o p'anadap'edaa perã. Jarapachida:
—Mãgà eperã Juan Bautistada apachida, chi piuda chok'ai p'irabaida. Mapa ne–inaa eperãarãpa p'oyaa oodak'aa oopari.
15 Ûk'uruurãpa jarapachida:
—Jãgà Elías,b chonaarãwedapema Ak'õre pedee jarapari.
Jõdee awaraarãpa jarapachida:
—Ak'õre pedee jarateeparipù, chonaarãwedapema Ak'õre pedee jarapataarã jîak'a.
16 Herodepa eperãarãpa jaradap'edaa ûrik'ãri, maaji:
—Mãgà Juanpù, mùa otau t'ùap'epit'aada; mãik'aapa ârá chok'ai p'irabaida.
17 Aù naaweda Herodepa Juan cadenapa jâ atapiji mãik'aapa carcelde t'ùpit'aaji chi âpema Filipo wêra Herodías k'aurepa. Herodepa ma wêra ataji ichi ome beemerã. 18 Juanpa mãga k'awaa atak'ãri, mãgapachi Herodemaa: “Pùa pùchi âpema wêra iru baik'araa bù pùchi wêrak'a.”
19 Maperã Herodiapa Juan k'îra unuamaa iru beeji mãik'aapa peepit'aa k'inia baji Herodemaa. Mamîda p'oyaa oo–e paji. 20 Herodepa Juan waawee baji, irua Ak'õrepa oopi bùk'a oopachi perã mãik'aapa Tachi Ak'õrepa iru pia ak'ù bapachi perã. Maperã Juan jâa paraa iru bapachi. Ma awara Juanpa jaratee bù ûri k'inia bapachi, k'awak'aa paji mîda irua k'ãata jara k'inia bù.
21 Mamîda Herodiapa k'îsia ataji Herodepa ichi t'oda fiesta ook'ãri. Ichi ek'ariirã poroorã, soldaorã poroorã, mãik'aapa eperãarã waibùarã Galilea eujãdepemaarã pachejida ma nek'opari fiesta oode. 22 Ma fiesta oomaa p'anùde Herodías k'au t'îuji nek'odap'edaamãi mãik'aapa pëiramaa beeji. Rey Herodepa mãik'aapa ichi ome p'anadap'edaarãpa ma pëira bada audú k'inia p'anajida. Mapa reypa mãgaji ma awêramaa:
—Mùmaa iidíji, pùchia iidi k'iniata. Mùa teeit'ee. 23 Wãarapù; Tachi Ak'õre k'îrapite mùa juraa bù, mùa teeit'ee pùchia iidiruta. Mùa eujã ak'ù bù esajîak'a teeit'ee, k'inia bù pùrã.
24 Ma awêra taawaa uchiap'eda, iidinaji chi nawemaa:
—¿K'ãata iidiyama? aji.
Chi nawepa p'anauji:
—Iidipáde aji, Juan Bautista poro.
25 Ma awêra isapai waya t'îuji rey badamãi mãik'aapa maaji:
—K'inia bùda aji, âraweda teemerã Juan Bautista poro p'arat'ude.
26 Rey Herodes k'îra pia–ee beeji, Juan peepi k'inia–e bada perã. Mamîda chi che p'anadap'edaarã k'îrapite juraada k'aurepa merã k'inia–e paji. 27 Aramata pëiji soldao Juan poro aneemerã. Soldao wãp'eda carcelde, Juan otau t'ùap'et'aaji 28 mãik'aapa ma awêra nawepa jaradak'a aneeji iru poro p'arat'ude. Ma awêramaa tee cheji. Maap'eda ichia teenaji ichi nawemaa.
29 Juan k'õp'ãyoorãpa ûri atadak'ãri iru peedap'edaa, chi piuda k'ap'ùa iidinajida ùadait'ee.
Mãga paji Juan Bautista peepidap'edaa.
Jesupa eperãarã cinco mil nek'opida
(Mateo 14.13-21; Lucas 9.10-17; Juan 6.1-15)
30 Jesús k'õp'ãyoorã waya araa p'anadak'ãri iru ome, irumaa nepùrùjida jõma ãchia oodap'edaa mãik'aapa jarateedap'edaa. 31 Eperãarã chok'ara wãpachida mãik'aapa chepachida. Maperã chi k'õp'ãyoorã ome p'oyaa nek'odak'aa paji. Mapa Jesupa mãgaji ãchimaa:
—K'õp'ãyoorã, chétù. T'ùmà âinadáma eperãarã wãdak'aamaa.
32 Mãpai barcode bataujida awara ãyaa wãdait'ee. 33 Mamîda chok'araarãpa unujida ãra wã nidá mãik'aapa k'awaajida Jesús aùde wã. Maperã eperãarã jõmaweda p'irajida, naapùara nùde. 34 Jesús barcodeepa batauk'ãri, eperãarã chok'ara unuji. Ãra chupùria k'awaaji ovejaarãk'a para bada perã, ak'ùpari wêe. Mãpai Jesupa Ak'õre Ûraa jarateemaa beeji. 35 K'eupodopa chi k'õp'ãyoorã ik'aawa chejida mãik'aapa mãgajida:
—K'eu wãpù; nama eperãarã p'anadak'aa. 36 Pëipáde ajida, eperãarã wãdamerã te chaa mãik'aapa p'uuru bee chaa ne–inaa k'oparii netonadamerã.
37 Mamîda Jesupa p'anauji:
—Parãpa chik'o téetù k'odamerã.
Mãpai mãgajida:
—¿Pùa k'inia bùk'ã taipa pan netonadamerã k'opidait'ee ãramaa? ¿K'ãare p'arat'apa netodayama ajida? ¿Atane ocho mimiada valortac pande netonadaik'ã? ajida.
38 Mãpai Jesupa iidiji:
—¿Pan jõmasaa iru p'anùma? aji. Ak'ùnátù.
K'awaadak'ãri, jara chejida:
—Pan joisomaa mãik'aapa chik'o omé iru p'anùda ajida.
39 Mãpai jaraji eperãarã su–ak'ù p'aneepidamerã awara–awaraa chok'ara, eujãde p'ûajara ârù. 40 Su–ak'ù p'aneejida awara–awaraa cien mãik'aapa cincuenta. 41 Mãpai Jesupa pan chik'o ome jitaji ichi juade, maap'eda ùt'aa ak'ùji. Ùt'aa t'âp'eda gracias jarait'ee Tachi Ak'õremaa, ma pan k'õrak'ooji. Mãga oop'eda, pan chok'ara teeji chi k'õp'ãyoorãpa eperãarãmaa jedenadamerã. Ichiaba chik'o jedejida jõmaarãmaa mãgà chik'o omé iru p'anadap'edaadepema. 42 Jõmaweda nek'ojida bi jãwaa p'aneerutamaa. 43 Jesús k'õp'ãyoorãpa k'oraa docena aba p'ejida pan pite mãik'aapa chik'o nâbeeda. 44 Chi mãgà pan k'odap'edaarã ùmùk'îraarã cinco mil paji.
Jesús lago ârù t'ùa nipada
(Mateo 14.22-33; Juan 6.16-21)
45 Ma t'êepai Jesupa chi k'õp'ãyoorã barcode bataupiji ichi naa lago sîadamerã Betsaida p'uurudee ichi eperãarã ome despediiru misa. 46 Eperãarã erreuk'oodaidak'ãri, iru wãji ee nok'odee ùt'aa t'âde. 47 K'eudaik'ãri, chi k'õp'ãyoorã barcode lago esa–auk'a ewaa wã nipajida. Mãùmisa Jesús truwá bee baji. 48 Jesupa unu baji chupùria jõnù, ãchimaa nãu p'ua nâbada perã. Mãpai taujaaweda wãji ãramaa lago ârù. 49 Barco k'ait'a wã nipak'ãri, unujida mãik'aapa k'îsiajida netuara*. Mapa biajida. 50 Jõmaweda audú p'eradachida. Mamîda irua mãgaji:
—¡P'eranáatù! ¡Mùda! aji.
51 Mãpai batauji ãra ome mãik'aapa nãu p'ua nâbada t'umãtùdachi. Ak'ùtrua para beeji 52 ãra waide ijãada–e p'anadap'edaa perã Tachi Ak'õrepa ne–inaa mãgá chaaree bee oopipari Jesumaa. Mãgá p'anajida, unujida mîda irua pan k'opida eperãarãmaa, pan wêe p'anadak'ãri.
Jesupa k'ayaa beerã chok'ara jùpada<R>Genesaret eujãde
(Mateo 14.34-36)
53 Panadak'ãri lago k'îraik'a eere, wiibainajida Genesaret eujãde. Mama barco jâ bùjida to ide. 54 Barcodeepa bataurutade, eperãarã mama p'anapataarãpa Jesús k'awa atajida. 55 Isapai jõmaarãmaa jara wãjida. Mapa k'ayaa beerã chok'ara aneejida Jesús wãyaait'ee ûridap'edaamãi. 56 Iru wãrumaa p'uuru beede mãik'aapa p'uuru awara ãi te beede, ichiaba k'ayaa beerã ateepachida ãchi p'arude. Ata bùpachida eperãarã ode wãyaapatamãi mãik'aapa Jesús wãyaa wãk'ãri, chupùria iidipachida ichi p'aru ide pùjida t'õbaipimerã. K'ayaa beerãpa t'õbaidak'ãri, jõmaweda jùpa p'aneejida.