Eperã k'ap'ùade netuara merãtùa bada
(Mateo 8.28-34; Lucas 8.26-39)
5
1 Lago k'îraik'a eere panajida Gerasa eujãde. 2 Jesús barcodeepa batauk'ãri, irumaa cheji jãùradeepa eperã k'ap'ùade netuara merãtùa bù. 3 Ma eperã ãk'adaa bapachi jãùra mãu te uriade. Ichi ome p'oyaadak'aa paji; cadenapa pida. 4 Edaare cadenapa bùùrùde mãik'aapa juade jâ nâbùpachida. Mamîda t'ùùt'aapachi. Mapa p'oyaadak'aa paji. 5 Ãstaawa, p'ãrik'ua pida bia nipapachi ee beede mãik'aapa jãùra bee chaa. Ichi itu p'u oo nipapachi mãupa. 6 Mamîda t'ùmùweda mãgà eperãpa Jesús unuk'ãri, p'iradachi irumaa mãik'aapa bedabaidachi. 7-8 Mãpai Jesupa mãgaji:—¡Netuara, uchiapáde aji, na eperã k'ap'ùadeepa!
Biaji:
—Jesús, pù Ak'õre Waibùa Warrapù. ¿K'ãata ooit'eema aji, mù ome? Tachi Ak'õre k'îrapite jaráji mù k'achia oo–e pait'ee. Mù ichiak'au bùpáde aji.
9 Mãpai Jesupa iidiji:
—¿Pù, k'asaa t'âjarapatama? aji.
—Mù t'âjarapatada aji, Legión,a chok'ara nipapata perã.
10 Mãpai Jesumaa chupùria iidipachi awara ãyaa pëinaamerã. 11 Ma ee k'arraya sinaarã chok'ara nek'omaa p'anajida. 12 Mapa netuaraarãpa chupùria iidijida:
—Awara ãyaa pëii k'ãyaara, ara p'anù sina k'ap'ùade t'îupipáde ajida.
13 Mãpai Jesupa netuaraarã mamaa pëiji. Uchiapiji ma eperã k'ap'ùadeepa mãik'aapa t'îupiji sinaarã k'ap'ùade. Mãùrã p'irak'oodachida ee k'õot'ari jira bùdee mãik'aapa lago jãde baainajida. Mama jõmaweda âyapa jâak'oodachida. Sinaarã perá dos mil paji.
14 Ma sina jâa p'anadap'edaarãpa mãga unudak'ãri, p'era p'irak'oodachida. Ãchia unudap'edaa nepùrùnajida p'uuru pidaarãmaa mãik'aapa p'uuru k'ait'a beerãmaa. Eperãarãpa Jesupa ooda k'awaa k'inia p'anadap'edaa perã, chejida ak'ùde. 15 Jesumãi pachedak'ãri, ma eperã netuaraarã merãtùa p'anadap'edaa unujida, p'aru jâp'eda, su–ak'ù bù Jesús ik'aawa mãik'aapa k'îra pia ak'ù baji. Mãga unudak'ãri, p'era para beeji. 16 Chi unudap'edaarãpa nepùrùjida apemaarãmaa netuaraarã merãtùa p'anadap'edaa mãik'aapa sinaarã k'ap'ùade pëik'ooda. 17 Mãpai waaweepa Jesumaa chupùria iidijida ãchi eujãdeepa wãmerã.
18 Jesús barcode batauk'ãri, ma eperã naaweda netuaraarã merãtùa badapa chupùria iidiji Jesupa ichi ome auk'a wãpimerã. 19 Mamîda Jesupa oo–e paji; jîp'a jaraji:
—Wåji pùchi temaa. Nepùrùnapáde aji, jõmaweda Ak'õrepa ooda mãik'aapa pù chupùria k'awaada.
20 Mãpai nepùrù wãpachi Jesupa ooda ichi ome Decápolis eujãde, p'uuru bee chaa. Mãga ûridak'ãri, eperãarã jõmaweda o–îa ak'ùtrua para beeji.
Jairo k'au jùpada mãik'aapa wêra abaapa<R>Jesús p'aru i t'õbaida
(Mateo 9.18-26; Lucas 8.40-56)
21 Waya Jesús chek'ãri k'îraik'a eereepa barcode, eperãarã chok'ara chejida irumaa lago ide. 22 Mãga nùde Tachi Ak'õre Ûraa jarateepata tedepema poro pacheji. Ichi t'âjarapachida Jairo. Jesús unu atak'ãri, bùùrùmãi bedabaidachi 23 mãik'aapa chupùria iidiji:
—Mù k'au juak'aya nâbù. Chupùria k'awáaji. Pù jua bùnapáde aji iru ârù, mãgá jùpa beemerã mãik'aapa chok'ai beemerã.
24 Mãpai Jesús ichi ome wãji. Ichiaba eperãarã chok'ara wãjida Jesús ome. Maperã p'îsua wãjida. 25 Ma eperãarã see nâbùde baji wêra bi k'ayaa bù waamiapa. Doce año mãgá baji. 26 At'apai mia baji. Jõma chi p'arat'a jõdai baji jùpapataarã juade nipa, jùpa–ee. Waapùara k'ayaa k'erapachi. 27 Jesupa ooda ûri bada perã awaraarã it'aideepa, k'ait'a wãji ãpùteik'a eereepa iru p'aru t'õbait'aade. 28 Mãga ooji k'îsia bada perã iru p'aru i t'õbairupapai jùpa beei. 29 T'õbaik'ãri, aramata waamia t'ùbaidachi, mãik'aapa ichia k'awaaji Jesupa ichi jùpada. 30 Aweda Jesupa k'awaaji jùparu ichia jara–eeta. Mapa ãpùtee ak'ùp'eda, iidiji:
—¿K'aipa mù p'aru t'õbaijima? aji.
31 Ichi ome nipapataarãpa mãgajida:
—¿Pùa unu–e bùk'ã ajida, eperãarã p'îsua nâbù? Mãga bùta iidi bù: “¿K'aipa mù t'õbaijima?”
32 Mamîda Jesupa tau k'it'aa ak'ù nâbeeji unui jîak'aapa k'aipa paji. 33 Ma wêra k'ap'ùa wëre nâbapachi p'era nâbùpa, k'awa bada perã ichita jùpa bù. Mapa bedabaidachi Jesús k'îrapite mãik'aapa jõmaweda jaraji. 34 Mãpai Jesupa mãgaji irumaa:
—Wêra, pùa mùde ijãa bairã, jùpa beejida aji. K'ãiwee wãpáde aji, pù k'ayaa wêpada perã.
35 Jesús pedeemaa bùde Jairo tedeepa eperãarã chejida mãik'aapa mãgajida Jairomaa:
—Pù k'au jai–idaaji. Mapa ¿k'ãare–it'ee Jesús ateedayama ajida, pùchi temaa?
36 Mamîda Jesupa mãga ûrik'ãri, mãgaji Jairomaa:
—Waaweenáaji; jîp'a mùde ijãapáde aji.
37 Mamãik'aapa k'õp'ãyapi–e paji apemaarãmaa; aba ateeji Pedro, Santiago mãik'aapa chi âpema, Juan. 38 Jairo temãi panadak'ãri, biuk'a nâbaji. Ununajida eperãarã jarajêe para nâbù. 39 T'îujida teedaa mãik'aapa Jesupa mãgaji:
—¿Sãap'eda audupai jêe para bùma? aji. Na wêra k'au jai–idaa–e bù. Jîp'a k'ãita bùda aji.
40 Mãga ûridak'ãri, ëik'oodachida. Mãpai Jesupa jõmaweda taawaa uchiapik'ooji. Aba t'îupiji ma wêra k'au jai–idaada k'ap'ùa badamaa, chi ak'õre, chi nawe mãik'aapa Jesús ome wãdap'edaarã. 41 Juade jita atap'eda mãgaji:
—Talita, cum; (jara k'inia bù: “Wêra k'au, p'irabáiji”.)