Net'a tau p'opari nepùrùda
(Mateo 13.1-9; Lucas 8.4-8)
4
1 Waya Jesús jarateemaa beek'ãri lago ide, eperãarã chok'ara chejida. Audú chok'ara chedap'edaa perã, Jesús batauji barco lago jãde badade mãik'aapa su–ak'ù beeji. Jõdee eperãarã jõmaweda p'aneejida lago ide. 2 Mamãik'aapa Jesupa eperãarãmaa nepùrùmaa beeji Ak'õre Ûraa jarateeit'ee:3 —Mùa nepùrùru pia k'îsíatù. Eperã wãji net'a tau p'ode. 4 Ma p'o wãk'ãri, ûk'uru baaijida o jãde. Mãpai ipanaarãpa k'ok'oo chejida. 5 Ûk'uru baaijida mãu–idaade mak'ùara yooro wêe badamãi. Mãgà isapai t'onojida, mak'ùara yooro wêe bada perã. 6 Mamîda ak'õrejîru jêrak'ãri, chi k'iru pùùdachi, chi k'arra ârùù bada perã. 7 Ûk'uru baaijida ne–ùùrù–idaade. Mamîda ne–ùùrù k'ap'ip'iara waripari perã, mãgà net'a tau t'ono wãdap'edaa piuk'oodachida. Maperã chauda–e paji. 8 Jõdee awaraa net'a tau baaijida eujã piade. Mãgà t'onojida, warijida mãik'aapa pia chaujida. Ûk'uru net'a tau abaadeepa uchiajida treinta, sesenta maa–e pùrã cien.
9 Mãpai Jesupa mãgaji:
—¡Pia k'îsíatù parãpa et'ewa ûridap'edaade k'awaadamerã k'ãata jara k'inia bù!a
Sãap'eda Jesupa nepùrùpachi jarateeit'ee
(Mateo 13.10-17; Lucas 8.9-10)
10 T'êepai Jesús ituaba beeji chi k'õp'ãyoorã doce ome, awaraa ichi ome nipapatap'edaarã paara. Mãpai ãchia iidijida:
—¿K'ãata jara k'inia bùma ajida, pùa nepùrù bada?
11 Jesupa p'anauji:
—Tachi Ak'õrepa parãmaa k'awapimaa bù ne–inaa naaweda k'awapik'aa pada; sãga ichideerã p'aneedai. Mamîda awaraarãmaa mùa nepùrùpari jarateeit'ee, k'awada–ee p'aneedamerã.
12 ‘Mùa oo bù ak'ù p'anù mîda, wãara unuda–e mãik'aapa mùa jara bù ûri p'anù mîda, k'awada–e. Mùa jarateepari pia k'awadap'edaa paara, Tachi Ak'õrede ijãak'ajida mãik'aapa irua ãchia p'ek'au k'achia oopata wêpapik'aji. Mamîda wãara mãga k'iniadak'aa.’ (Isaías 6.9-10)
Jesupa k'awapida net'a tau p'oparide
(Mateo 13.18-23; Lucas 8.11-15)
13 Mãpai Jesupa iidiji chi k'õp'ãyoorãmaa:
—¿Parãpa k'awada–e p'anùk'ã mùa jaratee k'inia bù ma nepùrùdade? ¿Sãga k'awaadait'ee awaraa nepùrùk'ãri jarateeit'ee? Nãga jara k'inia bù:
14 +Ma net'a tau p'opari Ak'õre Ûraa jarateeparik'a bù mãik'aapa ma net'a tau Ak'õre ûráak'ata bù. 15 Net'a tau baairutamãi eperãarã Ak'õre Ûraa ûripataaråk'ata bù. Mamîda ûridap'eda, Netuara Poro Waibùa chepari ne–inaa ooit'ee, t'ãripa ma pedee ijãanaadamerã. 16 Awaraa eperãarã chi net'a tau mãu–idaade baaidap'edáak'apù p'anù. Tachi Ak'õre Ûraa o–îa ûripata. 17 Mamîda ma net'a tau t'onoda taarã–eweda pùùdaiparik'a, mãga pùk'a mãgùùrãpa ma jara pëida taarã ijãada–e. Maperã ma ûraade ijãadap'edaa k'aurepa awaraarãpa nepùra jùrù cheruta pùrã ãchi ome, maa–e pùrã awaraarãpa ãchi jùrùruta pùrã miapidait'ee, ijãa amaapata. 18 Awaraa eperãarã chi net'a tau ne–ùùrù–idaade baaidap'edáak'apù p'anù. Ak'õre Ûraa ûri p'anù. 19 Mamîda ãchia na p'ek'au eujãdepema net'aa k'îsia p'aneepata ãchi–it'ee atadait'ee. Tachi Ak'õre Ûraa ûridai k'ãyaara, p'arat'a mãik'aapa awaraa ne–inaa waapùara k'inia p'anapata. Maperã Tachi Ak'õrepa oopi k'inia bùk'a oodak'aa. 20 Jõdee awaraa eperãarã chi net'a tau eujã piade baaidap'edáak'apù p'anù. Net'a tau aba eujã piade uuda chauparik'a tau treinta maa–e pùrã sesenta maa–e pùrã cien, mãga pùk'a ma eperãarãpa Ak'õre Ûraa ûridak'ãri, t'ãride ijãa p'aneepata. Mãgá Tachi Ak'õre Ûraa waapùara k'awaa wãpata mãik'aapa oopata irua k'inia bùk'a.
K'ãata oodaipia bù<R>Jesupa jarateeda ûridak'ãri
(Lucas 8.16-18)
21 Ichiaba jarateeji:
—Tachia lámpara k'oodak'aa cajón ek'ari ata bùdait'ee maa–e pùrã cama ek'ari. Ma k'ãyaara lámpara k'oodak'ãri, ùt'à ata bùpata pia âdaamerã. 22 Mãga pùk'a, ârá Tachi Ak'õre net'aa merã pùk'a bù mîda, t'êepai parãpa jõmaarãmaa jaradait'ee.b 23 ¡Pia k'îsíatù parãpa et'ewa ûridap'edaade k'awaadamerã k'ãata jara k'inia bù!
24 Ichiaba jaraji:
—Pia k'îsíatù mùa jararude. Eperãpa ne–inaa pia ook'ãri mùa jarateeda pia k'îsia bairã, pia oo bù. Tachi Ak'õrepa ichi ûraa audú k'awaapii irumaa, mãik'aapa ne–inaa pipùara ooyada aji, iru ome. 25 Tachi Ak'õrepa eperã k'îsia k'awaa bùmaa k'îsia k'awaara bapiit'ee, Ak'õre Ûraa Pia ijãapari perã. Jõdee mùa jarateeda pia k'îsia k'inia–e bak'ãri, ichia naaweda k'awa bada k'îra atuapiit'ee.c
Net'a tau t'onoda nepùrùda
26 Ichiaba Jesupa nepùrùji:
—Tachi Ak'õre jua ek'ari p'anùùrã îwapata net'a tau eujãde p'odak'a. 27 Tachia net'a tau p'odap'eda, k'euru chaa k'ãiruta pùjida mãik'aapa ewari chaa p'irabairuta pùjida, ma net'a tau t'onopari mãik'aapa wari wãpari. Tachia k'awada–e sãga mãgá waripari. 28 Yoorode net'a tau ichi itu t'onopari. Naapùara uchiapari chi t'uk'u; mamãik'aapa chi k'iru. Maap'eda uchiapari chi k'ùmù chak'e; t'êepai net'a tau chok'ara chaupari. 29 P'oo bak'ãri, ewapata. Mãga bù Tachi Ak'õre jua ek'ari p'anùùrã ome.
Mostaza tau nepùrùda
(Mateo 13.31-32; Lucas 13.18-19)
30 Jesupa ichiaba awaraa nepùrùji jarateeit'ee:
—¿K'ãarek'a bùma aji, Tachi Ak'õrepa eperãarã ichi jua ek'ari bùk'ãri, ichideerã p'aneedamerã? ¿K'ãata nepùrùit'eema pia k'awaadamerã? 31 Mostaza tau uudák'apù bù. Mãgà net'a tau apemaarã net'a tau k'ãyaara ma–ãriara bù. 32 Mamîda uup'eda, apemaarã ne–uu k'ãyaara waibùara waripari. Mãgá waibùa warik'ãri, ipanaarãpa ãchi te oopata chi juade.d
Jesupa ooda nepùrùk'ãri
(Mateo 13.34-35)
33 Jesupa mãga nepùrù wãpachi Tachi Ak'õrede k'îsia p'aneedamerã. Ichia nepùrùda pia ûridak'ãri, waa nepùrùpachi. 34 Jarateek'ãri, ichita mãgá nepùrùpachi. Nepùrù–ee jarateek'aa paji. Mamîda chi k'õp'ãyoorã ituaba p'aneedak'ãri, ma nepùrùda jõma jara k'inia bù jarateepachi.
Jesupa nãu p'usa ome t'umãtùpida
(Mateo 8.23-37; Lucas 8.22-25)
35 Ma ewate k'eu wãk'ãri, Jesupa maaji ichi ome nipapataarãmaa:
—Wãdáma aji, lago k'îraik'a eeree.
36 Eperãarã atabëijida mãik'aapa bataujida Jesús su–ak'ù bada barcode. Awaraarã jida auk'a wãjida awaraa barcode. 37 Mãgá lago sîa wãdade nãu golpe p'ua nâbeeji mãik'aapa p'usara t'o nâbeeji. Mapa barco pirubaai wã nipaji. 38 Mãùmisa Jesús k'ãi baji barco trumaa. Su–ak'ù beepata ârù porok'au baji. Aramata ârùmat'aajida mãik'aapa mãgajida:
—¡Tachi Waibùa! ¡P'irabáiji! ¡Tachi pirubaai wãdapù! ¿Pù–it'ee p'ua–ek'ã ajida, tachi pirubaaidaruta pùjida?
39 Mãpai Jesús p'irabaip'eda, mãgaji nãumaa:
—Waa p'uanaapáde aji.
Mãpai nãu waa p'ua–e paji. Ichiaba p'usamaa maaji:
—T'umãtù beepáde aji.
—¿Sãap'eda p'era jõnùma? ¿At'ãri ijãada–eeta p'anùk'ã? aji.
41 Mamîda ãchi p'era para beeji, waide mãga unudak'aa pada perã. Ãchi pitapai iidi para beeji:
—¿K'aima nãgà? Tachi Ak'õrepapaita pedeepari nãumaa, p'usamaa ip'ii beemerã.