Jesupa chiwa bada jùpada
(Mateo 9.1-8; Lucas 5.17-26)
2
1 Ma t'êepai Jesús waya wãji ichi bapatamaa Capernaum p'uurudee. Mamîda eperãarãpa k'awaadak'ãri iru mama bù, 2 taarã–ee eperãarã chok'ara teeda see nâba cheji. T'îupatamãi pida araa–ee nâbeeji. Irua Ak'õre Ûraa jaratee bù misa, 3 eperãarã k'îmariirãpa irumaa aneejida eperã chiwa bù. 4 Mamîda Jesumãi p'oyaa t'îuda–e paji, chok'ara see nâbada perã ma tede. Maperã terrazade wãjida mãik'aapa uria ewa atajida. Mãgà uriadeepa chi chiwa bù ùrabai atajida ichi p'arude. 5 Jesupa mãga unuk'ãri, k'awaji wãara ichide ijãa p'anù. Mapa mãgaji ma chiwa bùmaa:—Warra, pùa p'ek'au k'achia oopata jõmaweda wêpajipù.
6 Moisepa p'ãda jarateepataarã ûk'uru mama su–ak'ù p'anajida. Mãga ûridak'ãri, k'îsiajida: 7 “Jã eperã ik'achia pedeemaa bù Tachi Ak'õre ãpùte. Na eujãdepemaarãpa p'ek'au k'achia wêpapidak'aa; Tachi Ak'õrepapaita mãga ooi.”
8 Mamîda Jesupa ichi t'ãride k'awaji ãchia k'achia k'îsia p'anù. Mapa mãgaji:
—¿Sãap'eda parãpa k'îsia k'achia k'îsia p'anùma? aji. 9 Mùa irumaa jarai: “Pùa p'ek'au k'achia oopata wêpajipù” maa–e pùrã jarai: “P'irabáiji mãik'aapa wåji”. 10 Mù chi Eperã Ak'õre Truadepema.a Mapa Tachi Ak'õre jua ek'ari mùa p'ek'au k'achia wêpapipari na p'ek'au eujãde. Parãpa mãgà k'awaadamerã mùa jarait'ee: 11 ¡P'irabáiji! Pùchi p'aru atáji mãik'aapa wåji pùchi temaa.
12 Mãpai ma chiwa bada p'irabaidachi mãik'aapa ichi p'aru atap'eda, uchiadachi jõmaarã taide. Mãpai jõmaarãta ak'ùtrua para beeji. O–îapa jarapachida Tachi Ak'õre jõmaarã k'ãyaara waibùara bù:
—Waide nãga unudak'aada apachida.
Jesupa Leví jùrùda ichi ome nipapariimerã
(Mateo 9.9-13; Lucas 5.27-32)
13 Maap'eda Jesús waya wãji Galilea Lago idee. Eperãarã irumaa chepachida. Mãpai Ak'õre Ûraa jarateepachi. 14 Wãyaa wãde, unuji Leví.b Mãgà Alfeo warra paji. Su–ak'ù baji Cesar–it'ee impuesto p'aapatamãi. Jesupa mãgaji irumaa:
—Mù ome nipaparíiji.
Aramata p'irabaip'eda wãji Jesús ome.
15 Maap'eda chok'ara impuesto p'epataarã Roma pidaarã rey–it'ee mãik'aapa awaraa eperãarã k'achia–idaa beerã apatap'edaa Jesús ome nipapachida. Maapai Jesús nek'onaji Leví tede. Jesús mãik'aapa ichi ome nipapataarã su–ak'ù p'aneejida mesade. Auk'a mãgà eperãarã su–ak'ù p'aneejida mama Jesús ome. 16 Moisepa p'ãda jarateepataarã, fariseorã eere p'anapatap'edaarãpa mãga unudak'ãri, iidijida Jesús k'õp'ãyoorãmaa:
—¿Sãap'eda parã jarateepari nek'omaa bùma ajida, impuesto p'epataarã ome mãik'aapa awaraa p'ek'au k'achia oopataarã ome? Jãga ooik'araa bùda ajida.
17 Jesupa ãchia jaradap'edaa ûrik'ãri, mãgaji:
—Médico pëidak'aa k'ap'ùa pia beerãmaa. Jîp'a pëipata k'ayaa beerãmaa. Mãga pùk'a Tachi Ak'õrepa mù pëi–e paji t'ãri pia beerã jùrùde; ma k'ãyaara p'ek'au k'achia oopataarã jùrùdeta pëiji.
Sãapai nek'oda–ee p'anadaipia bù
(Mateo 9.14-15; Lucas 5.33-35)
18 Ewari aba Juan Bautista k'õp'ãyoorã mãik'aapa fariseorã ùt'aa t'âmaa p'anajida nek'oda–ee Tachi Ak'õre waaweepa. Eperãarã ûk'uruurãpa mãga unudak'ãri, Jesumaa iidinajida:
—Juan ome nipapataarã mãik'aapa fariseorã ome nipapataarã edaare nek'odak'aa. ¿Sãap'eda pù k'õp'ãyoorãpa auk'a oodak'aama? ajida.
19 Jesupa p'anauji:
—Eperãarã miak'ãipata fiesta oodak'ãri, o–îa p'anapata. Mapa k'õp'ãyoorã miak'ãidait'ee p'anùùrã ome p'anù misa, nek'opata o–îa p'anadairã. 20 Mamîda ewari aba miak'ãiit'ee bada ùmùk'îra ata chedait'ee chi k'õp'ãyoorã ik'aawaapa. Wãara, ma ewate chi k'õp'ãyoorã nek'oda–e pait'ee t'ãri p'uapa.
Ûraa chiwidi mãik'aapa ûraa chonaarãwedapema
(Mateo 9.16-17; Lucas 5.36-39)
21 —Eperã apidaapa p'aru chiwididepema pite aba t'ùùik'araa bùda aji, p'aru sorede parchaait'ee. Mãga ooru pùrã, chi p'aru chiwidi ãridariit'ee mãik'aapa ma pite auk'a bee–e pait'ee chi p'aru sore ome. 22 Ichiaba vino ewaa juda t'ùdak'aa ne–e sorede. Mãga ooruta pùrã, baak'adaipari mãik'aapa ne–e jîadaipari. Vino jida ichiaba atuadaipari. ¡Maperã vino ewaa juda t'ùdaipia bù ne–e chiwidi bùde!
Trigo k'ùmù chak'eerã jonadap'edaa âipata ewate
(Mateo 12.1-8; Lucas 6.1-5)
23 Judiorã âipata ewate Jesús nipaji trigo k'ãide mãik'aapa chi k'õp'ãyoorã wãyaa wãdak'ãri, trigo k'ùmù chak'eerã oro ata wãjida chi tau k'odait'ee.+\fr 24 Arii p'anadap'edaa fariseorãpa mãga unudak'ãri, Jesumaa mãgajida:
—¡Pùchá ak'àji! ¿Sãap'eda pù k'õp'ãyoorãpa jãga oomaa p'anùma? ajida. Chonaarãweda Moisepa jaraji mimiadaik'araa bù âipata ewate.
25 Jesupa mãgaji:
—Parãpa Tachi Ak'õre Ûraa p'ã jêra bùde pia k'îsiada–e p'anù. Chonaarãweda Rey David chi k'õp'ãyoorã ome audú jarrapisia p'anadak'ãri, 26 ichi t'îuji Tachi Ak'õre te ne–edee oodade. Abiatar, p'aareerã poro waibùapa, pan k'opiji Davidmaa, aù naaweda Tachi Ak'õrepa jaraji mîda p'aareerãpa aupai mãgee pan k'odamerã. Davidpa ma pan k'op'eda, ichi ome nipapataarãmaa teeji. Tachi Ak'õrepa ãra miapi–e paji mãga oodap'edaa k'aurepa. 27 Tachi Ak'õrepa eperãarã oo–e paji âipata ewari ùadamerã. Naapùara Tachi Ak'õrepa eperã ooji. T'êepai ooji âipata ewari eperãarã âidamerã mimiada–ee. 28 Âipata ewate paara mù, chi Eperã Ak'õre Truadepema jua ek'ari bùda aji.