Judiorã poroorãpa pedeeteedap'edaa Jesús jita atapidait'ee
(Marcos 14.1-2; Lucas 22.1-2; Juan 11.45-53)
26
1 Ma jõma jara aupak'ãri, Jesupa mãgaji chi k'õp'ãyoorãmaa:2 —Parãpa k'awa p'anù k'ãima omeemaa Pascua fiesta pait'ee. Maapaita mù, chi Eperã Ak'õre Truadepema, jita atapidait'ee mãik'aapa kurusode baijira bùpidait'ee piumerã.
3 Jesupa mãga jaradadeepa p'aareerã poroorã judiorã poro waibùarã ome chip'ejida p'aareerã poro waibùara bù, Caifás palaciode. 4 Mama p'anùde pedeeteejida Jesús merã jita atapidait'ee mãik'aapa peepit'aadait'ee. 5 Mamîda mãgajida:
—Fiestade ooda–eda ajida, eperãarã k'îrau para beepiamaapa tachi ome.
Mariapa k'era weeda Jesús poro ârù
(Marcos 14.3-9; Juan 12.1-8)
6 Jesús Betania p'uurude bak'ãri, Simón, chi leprapa k'ayaa bada apatap'edaa tede baji. 7 Mãga nùde wêra Jesús k'ait'a cheji chok'o chak'ek'a mãu pi–ia alabastrodee ooda ome. Ma chok'o chak'e ipuru baji k'era âpùapa. Jesús mesade su–ak'ù bùde mãgà wêrapa ma k'era weet'aaji iru poro ârù. 8 Chi k'õp'ãyoorãpa mãga unudak'ãri, k'îraudachida mãik'aapa pedee para beeji:
—¿Sãap'eda jã k'era ichi k'inia weemaa bùma? ajida. 9 ¿Âpùa netot'aak'aji–ek'ã ajida, mãik'aapa ma p'arat'a chupùria beerãmaa teek'aji–ek'ã? ajida.
10 Jesupa ma pedee ûrik'ãri, mãgaji:
—Ita–aria bàtù. Irua mùmaa oo bù pia bùda aji. 11 Chupùria beerã ichita paraait'ee parã t'ãide. Mamîda mù parã ome ichita ba–e pait'ee. 12 Na wêrapa mù ârù k'era weeji, mak'ùara taarã–e mù peedap'eda, ùadait'ee perã. 13 Mùa wãarata jararu. Na p'ek'au eujãde jarateepata chaa mùa ooda eperãarã k'aripait'ee, ichiaba nepùrùpataadait'ee na wêrapa ooda mù–it'ee. Mãgá iru ichita k'irãpadait'eeda aji.
Judapa Jesús traicionaada
(Marcos 14.10-11; Lucas 22.3-6)
14 Maap'eda Jesús k'õp'ãyoorã docedepema aba, Judas Iscariote, wãji p'aareerã poroorãmaa. 15 Iidiji:
—Parãpa, ¿jõmasaa mùmaa p'aadayama aji, Jesús jita teeru pari?
—Teedayada ajida, p'arat'a tau treinta.a
16 Maadak'ãriipa Judapa jùrù bapachi sãga Jesús ãchimaa jitapiit'ee.
Jesús chi k'õp'ãyoorã ome nek'oda
(Marcos 14.12-25; Lucas 22.7-23; Juan 13.1-2, 21-30)
17 Naapema ewaride fiesta pan levadura wêe k'opatade Jesús k'õp'ãyoorãpa irumaa iidi chejida:
—¿Sãma k'inia bùma ajida, k'odait'ee Pascua fiesta ewatepema chik'o?
18 Jesupa p'anauji:
—Wåtù p'uurudee parãpa k'awa p'anù tede mãik'aapa jaranátù chi te chiparimaa: “Tachi Jarateeparipa jara pëiji: ‘Mù ewari k'ait'a bù. Wãit'ee pù temaa Pascua fiesta ewatepema chik'o k'ode mùchi k'õp'ãyoorã ome.’ ”
19 Chi k'õp'ãyoorãpa oojida Jesupa jaradak'a mãik'aapa mama ne–inaa jõma oojida Pascua chik'o k'odait'ee.
—Mùa wãarata jararu. Parãdepema abaapa mù traicionaait'eeda aji.
22 Mãga ûridak'ãri, chi k'õp'ãyoorã k'îra pia–ee para beeji mãik'aapa aba–abaa iidijida:
—Tachi Waibùa, ¿mùk'ã? apachida.
23 Jesupa p'anauji:
—Mù ome auk'a p'arat'ude pan sã atarúpata mù traicionaait'ee. 24 Mù, chi Eperã Ak'õre Truadepema, ichita piuit'ee Tachi Ak'õre Ûraa p'ãdade jara bùk'a. Mamîda ¡aai, Tachi Ak'õrepa k'achiadee pëiit'ee chi mù traicionaait'ee bù! Piara bak'ajida aji, mãgà t'o–e pada paara.
25 Mãpai Judas, chi traicionaait'ee badapa, iidiji:
—Tachi Jarateepari, ¿mùk'ã? aji.
Jesupa mãgaji:
—Pùchia jara bùk'ada aji.
Pan k'opata vino ome Jesús piuda k'irãpadait'ee
(Marcos 14.22-26; Lucas 22.19-20; 1 Corintios 11.23-26)
26 Nek'omaa p'anùde Jesupa pan ataji mãik'aapa ùt'aa t'âji gracias jarait'ee Tachi Ak'õremaa. Ma pan k'õrat'aaji mãik'aapa chi k'õp'ãyoorãmaa teeji. Mãpai mãgaji:
—Jitátù mãik'aapa k'ótù. Nãgà pan mù k'ap'ùa.
27 Nek'odap'edaa t'êepai ichiaba mãgá ooji ma vino ome. Ùt'aa t'âp'eda, gracias jaraji Tachi Ak'õremaa mãik'aapa chi k'õp'ãyoorãmaa teeji. Mãpai mãgaji:
—Nãgà vino mù waa. Todapáde aji, pãchi jõmaarãpa. 28 Tachi Ak'õrepa nãgà ûraa chiwidi jara bù. Mù piuk'ãri, mùchi waa bat'ait'ee k'aurepa irua wêpapiit'ee eperãarã chok'araarãpa p'ek'au k'achia oopata mãik'aapa mùchideerã papiit'ee. 29 Mamîda mùa jara bù: Parã ome vino waa to–e pait'eeda aji, ùt'aripema vino torumaa mù Ak'õre truade.
30 Tachi Ak'õre Ûraa p'ãdadepema k'ari k'aridap'eda,b Olivo Eedee wãjida.
Jesupa jarada Pedropa iru k'awa–e bùda ait'ee
(Marcos 14.26-31; Lucas 22.31-34; Juan 13.36-38)
31 Mama Jesupa mãgaji:
—Idi p'ãrik'ua parã jõmaweda ijãadaamaa p'aneedait'ee mãik'aapa mù ituaba atabëidait'ee Tachi Ak'õre Ûraa p'ã jêra bùde jara bùk'a:
‘Mùa oveja ak'ùpari peepiit'ee mãik'aapa chi ovejaarã jîchoodaridait'ee.’ (Sofonías 13.7)
32 Mamîda mù chok'ai p'irabaik'ãri, Galilea eujãdee wãit'ee parã naa.
33 Mãpai Pedropa mãgaji:
—Apemaarãpa pù atabëiruta pùjida, mùa pù atabëi–eda aji.
34 Jesupa p'anauji:
—Mùa wãarata jararu. Idi p'ãrik'ua et'erre k'arii naaweda, jarada õpee pùa mù k'awa–e bùda ait'ee.
35 Waapùara Pedropa mãgaji:
—Pù ome auk'a piuru pùjida, mùa jara–eda aji.
Apemaarã k'õp'ãyoorãpa ichiaba auk'a jarapachida.
Jesús ùt'aa t'âda Getsemanide
(Marcos 14.32-42; Lucas 22.39-46)
36 Maap'eda Jesús wãji chi k'õp'ãyoorã ome Getsemaní ne–uu eujã apatap'edaamaa. Mama panadak'ãri, mãgaji:
—Nama su–ak'ù p'anéetù mù ùt'aa t'ânaru misa.
37 Ichi ome ateeji Pedro mãik'aapa Zebedeo warrarã omé. Mãga nùde Jesús k'îsia paraa nâbeeji t'ãri p'uapa. 38 Mapa mãgaji ãchimaa:
—Mù piuit'ee pùk'a nâbù t'ãri p'uapa. Nama p'anéetù, k'ãida–ee. Chok'ai p'anadapáde aji, mù ome auk'a.
39 Mãpai Jesús waawipai wãp'eda, bedabaidachi tau bùùrù eujãde t'õbairumaa mãik'aapa ùt'aa iidiji:
—Ak'õre, k'inia bù pùrã, mù k'aripáji na miait'ee bùdeepa. Mamîda oonaapáde aji, mùa k'inia bùk'a. Jîp'a pùa k'inia bàk'ata oopáde aji.
40 Maap'eda, ak'ù chek'ãri, chi k'õp'ãyoorã k'ãi jõnùta unu cheji. Mãpai Pedromaa mãgaji:
—¿Hora apida p'oyaa chok'ai p'anada–ek'ã aji, k'ãida–ee? 41 Chok'ai p'anátù mãik'aapa ùt'aa t'çtù p'ek'au k'achiade baaipiamaapa. Tachi Ak'õrepa oopi k'inia bùk'a t'ãripa oo k'inia p'anù. Mamîda pãchi k'ap'ùapa chooda–e p'anù.
42 Waya wãji nãga ùt'aa iidide:
—Ak'õre, mù na miait'ee bùta uchia ata–e pùrã, mãgara pia bùda aji. Pùa oo k'inia bàk'ata oopáde aji.
43 Waya chek'ãri, naa unu chedak'a unu cheji; k'ãi jõnù tap'ok'eepa. 44 Mãpai ichiak'au bùji mãik'aapa wãda õpee ùt'aa t'ânaji. Wãru chaa ichi aù pedeeta jarapachi. 45 Maap'eda waya chek'ãri chi k'õp'ãyoorã p'anadap'edaamaa, mãgaji:
—¿At'ãri parã k'ãi jõnùk'ã? aji. Mù peepidait'ee hora pajipù. Eperã Ak'õre Truadepema teedait'ee p'ek'au k'achia oopataarã juade. 46 Eperã mù traicionaait'ee bù k'ait'a cheru. ¡P'irabáitù mãik'aapa wãdáma apemaarãmaa!
Jesús jita atapidap'edaa
(Marcos 14.43-50; Lucas 22.47-53; Juan 18.2-11)
47 Jesús at'ãri pedeemaa bùde, ichi k'õp'ãyo Judas pacheji eperãarã chok'ara ome. Espadac pak'uru ome anipajida. P'aareerã poroorãpa mãik'aapa judiorã poro waibùarãpa ma eperãarã pëijida ãchi pari. 48 Panadai naaweda, Judapa mãùrãmaa jaraji:
—Chi mùa k'îra âruta saludaak'ãri, mãgùta jita atadapáde aji.
49 Mapa pachedak'ãri Jesumãi, Judas pedee cheji:
—Tachi Jarateepari, ¿k'ap'ùa pia bùk'ã? aji.
—K'õp'ãyo, oopáde aji, pùa ne–inaa oode cheda.
Mãpai Judas ome che p'anadap'edaarãpa Jesús jita atadap'eda, mamãik'aapa ateejida.
51 Mãga nùde Jesús ik'aawa badapa ichi espada êt'a atap'eda, p'aareerã poro waibùa mimiapari k'ùùrù orp'et'aaji. 52 Mãpai Jesupa mãgaji:
—¡Pùchi espada ata bàji ichi badamãi! Chi espadapa chõopataarã piupata espadapa.
53 ¿K'awa–e bùk'ã aji, mù Ak'õremaa k'aripa iidiru pùrã, irua angeleerã setenta y dos mild âraweda pëik'aji? 54 Mamîda mãga ooru pùrã, uchia–e pai Tachi Ak'õre Ûraa p'ã jêra bùde nãga p'asait'ee jara bùk'a.
55 Mãpai Jesupa iidiji ichi jita ata chedap'edaarãmaa:
—¿Sãap'eda parã chejidama aji, espada ome mãik'aapa pak'uru ome mù jita atade, eperã nechùayaa bù jita atapatak'a? Ewari chaa mù Tachi Ak'õre tede bapari iru pedee jarateemaa. Mamîda mù jitada–e paji. 56 Na jõma p'asaruda aji, Tachi Ak'õre pedee jarapataarãpa jaradap'edaak'a iru Ûraa p'ãdade.
Jesupa mãga jaramaa bùde jõmaweda chi k'õp'ãyoorãpa atabaibëijida mãik'aapa miruk'oodachida.
Jesús Junta Suprema k'îrapite
(Marcos 14.53-65; Lucas 22.54-55, 63-71; Juan 18.12-14, 19-24)
57 Jesús jita atadap'edaarãpa ateejida Caifás temaa. Caifás p'aareerã poro waibùa paji. Mama Junta Supremadepemaarã see nâbaji. 58 Pedro t'ùmùùpapai t'êe wãk'ãtù wãji. Mãgá wãpa panaji Caifás temãi. Ma te t'ùak'au badamãi edú t'îup'eda, Tachi Ak'õre te jâapataarã ome su–ak'ù banaji ak'ùit'ee sãga oodai Jesús ome.
59 P'aareerã poroorãpa jõmaweda Junta Supremadepemaarã ome testigo jùrù p'anapachida. Mãgá Jesús peepit'aadait'ee. 60 Eperãarã chok'ara seewa jarade chejida mîda, maarepida unuda–e paji ùmùateedait'ee. Mamîda seewa–idaa beerã omé pachejida. 61 Mãùrãpa mãgajida:
—Na eperãpa jaraji: “Mùa Tachi Ak'õre te t'eet'aap'eda, k'ãima õpeemaa waya oo atai.”
62 Mãga ûrik'ãri, p'aareerã poro waibùa bainâ beeji mãik'aapa iidiji Jesumaa:
—¿Wãarak'ã aji, pù k'îrapite jara p'anù pedee? ¿Maarepida p'anau–ek'ã? aji.
63 Mamîda Jesupa maarepida p'anau–e paji; k'îup'ee beeji. Mãpai p'aareerã poro waibùapa mãgaji:
—¡Tachi Ak'õre ichita chok'ai bù k'îrapite wãarata jaráji! ¿Pùk'ã Tachi Ak'õrepa pëida eperãarã rey pamerã? ¿Pùk'ã aji, Tachi Ak'õre Waibùa Warra?
64 Jesupa p'anauji:
—Mùda aji, pùa jara bùk'a. Mùa jara bù: Parãpa Eperã Ak'õre Truadepema unudait'ee su–ak'ù bù Tachi Ak'õre Waibùa juaraare mãik'aapa jâararade cheru.
65 Mãpai Caifapa ichi p'aru jêt'aaji t'ãri k'achiapa mãik'aapa mãgaji:
—¡Na eperãpa pedee k'achia jaramaa bùda aji, Tachi Ak'õre ãpùte! ¿K'ãare–it'ee waa jùrùdayama aji, eperãarãpa ichia ooda jaradamerã? ¿Parãpa ûrijida–ek'ã ichia ma pedee k'achia jarada? 66 ¿K'ãata k'îsia p'anùma? aji.
P'anaujida:
—Piuipia bùda ajida, ichia jarada k'aurepa.
67 Mãpai Jesús k'îramaa idujida mãik'aapa p'ua oo wãjida. Awaraarãpa k'îramaa sîjida. 68 Mãga oo jõnùde mãgajida:
—¡Pù wãara Tachi Ak'õre Warra pùrã, jarapáde ajida, k'áipata pù sîji!
Pedropa Jesús k'awa–e bùda ada
(Marcos 14.66-72; Lucas 22.56-62; Juan 18.15-18, 25-27)
69 Mãùmisa Pedro taawa su–ak'ù baji te ãuk'idaa. Mãga nùde awêra mama mimiapari cheji mãik'aapa mãgaji Pedromaa:
—Pù auk'a nipajida aji, jã eperã Jesús Galileadepema ome.
70 Mamîda Pedropa meraji jõmaarã taide:
—Mùa k'awa–e bùda aji, k'ãaredeta pùa jara bù.
71 Maap'eda Pedro wãji puerta edú t'îupatamãi. Mama awaraa awêra mimiaparipa iru unuk'ãri, arii p'anadap'edaarãmaa mãgaji:
—Pùchá, na eperã nipajida aji, Jesús Nazaretdepema ome.
72 Waya Pedropa meraji:
—Tachi Ak'õre k'îrapite mùa juraaru: ¡Jã eperã k'awa–e bùda! aji.
73 Taarã–e nùde arii see nâbadaarã Pedro k'ait'a chejida mãik'aapa mãgajida:
—Wãara pù ãchi k'õp'ãyo. Pedeedeepa p'oyaa mera–eda aji, pù Galilea eujãdepema.
74 Mãpai Pedropa juraaji Tachi Ak'õre k'îrapite:
—¡Mùa jã eperã k'awa–e bùda! aji. ¡Seewa jaramaa bù pùrã, Tachi Ak'õrepa mù miapiipia bùda! aji.