Jesupa awêraarã diezde nepùrùda
25
1 —Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Diez wêraarã ùmùk'îra ome waide k'ãida–ee beerã wãjida miak'ãipata fiestadee. Ãchi lámpara atadap'eda, nùjida k'îrachuudait'ee chi ùmùk'îra miak'ãiit'ee bù ome, iru k'õp'ãyaadait'ee pada perã fiesta oo p'anùmãi.a 2 Ma wêraarã diezdepema joisomaa pia k'îsiada–e paji, ne–inaa oodai naaweda. Jõdee chi apema joisomaa pia k'îsiapachida, ne–inaa oodai naaweda. 3 Chi pia k'îsiada–e p'anadap'edaarãpa ãchi lámpara atadak'ãri, k'îsiada–e paji aceite waapùara ateedait'ee ãchi ome. Mapa ãchi lamparade bada aupai anipajida. 4 Jõdee chi pia k'îsia p'anadap'edaarãpa ãchi lamparade bù awara ateejida aceite botella aba–abaa. 5 Mamîda chi miak'ãiit'ee bù taarã nâbada perã cheit'ee, ma wêraarã jõmaweda k'ãidachida ãchia nù p'anadap'edaamãi. 6 Esapùte pa wãk'ãri, ûrijida bia cheruta: “¡Miak'ãiit'ee bù pacheruda! ajida. ¡Uchiadapáde ajida, iru k'îrachuude!” 7 Ma wêraarã k'ãi jõnadap'edaa aramata p'irabaik'oodachida mãik'aapa ãchi lamparadepema mecha t'ùùk'oojida pia unudait'ee. 8 Mãpai chi pia k'îsiada–ee p'anadap'edaarãpa mãgajida apemaarãmaa: “Taimaa aceite ma–ãri teedapáde ajida, tai lámpara k'îik'oodaruta perã.” 9 Mamîda apemaarãpa p'anaujida: “Taipa teeda–eda ajida, jõmaarã–it'ee araa–e perã. Wãdapáde ajida, aceite netopatamaa pãchi–it'ee netode.” 10 Mamîda ma wêraarãpa aceite netonaruta misa, pacheji chi ùmùk'îra miak'ãiit'ee bada. Mãgá ma awêraarã pia k'îsiadap'edaarã auk'a t'îujida iru ome fiesta oodait'eemãi. T'îudak'ãri, irua ma te t'îupata jâa nâbùji. 11 Taarã–e nùde pachejida chi aceite netonadap'edaarã. Te taawaik'a eereepa mãgajida: “¡Tachi Waibùa, Tachi Waibùa, ewapáde ajida, tai t'îudait'ee!” 12 Mamîda irua p'anauji: “Mùa wãarata jararu. Parã k'awa–e bùda” aji.13 Mãga nepùrùp'eda, Jesupa mãgaji chi k'õp'ãyoorãmaa:
—Mãga pait'ee perã, tauk'a p'anapatáatù parãpa k'awada–e p'anadairã sãapai mù cheit'ee.
Jesupa p'arat'a teedade nepùrùda
(Lucas 19.11-27)
14 —Ichiaba nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Eperã awara ãyaa wãi naaweda, ichi mimiapataarã t'â p'eji mãik'aapa p'arat'a teeji ãchi chaachaa ak'ù p'anadamerã, ichi cheru misa. 15 Mimiapari abaamaa teeji p'arat'a tau cinco mil;b awaraamaa teeji p'arat'a tau dos mil; apemamaa p'arat'a tau mil. Mãgá p'arat'a tau awara–awaraa teeji, k'awa bada perã ãchi auk'a mimiadak'aa. Maap'eda ãyaa wãji. 16 Ma t'êepai ma mimiapari cinco mil jitadapa ne–inaa netomaa beeji ma p'arat'apa. Mãgá ne–inaa neto bùpa awaraa cinco mil eepa ataji. 17 Mãgá ichiaba ma p'arat'a tau dos mil jitadapa awaraa dos mil eepa ataji. 18 Mamîda ma p'arat'a tau mil jitadapa chi poro waibùa p'arat'a eujãde jau nâbùnaji, atuadarii jîak'aapa.
19 +Taarãpai pacheji chi p'arat'a chipari. Juasia k'inia baji ma p'arat'a atabëida chi mimiapataarã ome. Mapa ãchi t'â pëiji. 20 Naapùara pacheji chi mimiapari p'arat'a tau cinco mil jitada. Mãgùpa chi p'arat'a chiparimaa mãgaji: “Señor, pùa mùmaa teejida aji, p'arat'a tau cinco mil. Nama bùda aji, waa awaraa cinco mil uchiada ne–inaa neto bùpa.” 21 Chi p'arat'a chiparipa mãgaji: “¡Pù pia bùda aji, pia mimiapari perã! Mùa atabëida pia ak'ùji mãik'aapa aù ârù waapùara uchiapiji. Mãga ooda perã ârá pù jua ek'ari bùit'eeda aji, ne–inaa audupùara ak'ùmerã. Teedaa t'îupáde aji, o–îa bapariimerã mù ome.” 22 Mãgà t'êe pacheji chi mimiapari p'arat'a tau dos mil jitada. Ichia mãgaji: “Señor, pùa mùmaa teejida aji, p'arat'a tau dos mil. Nama bùda aji, waa awaraa dos mil, uchiada ne–inaa neto bùpa.” 23 Chi p'arat'a chiparipa mãgaji: “¡Pù pia bùda aji, pia mimiapari perã! Mùa atabëida pia ak'ùji mãik'aapa aù ârù waapùara uchiapiji. Mãga ooda perã ârá pù jua ek'ari bùit'eeda aji, ne–inaa audupùara ak'ùmerã. Teedaa t'îupáde aji, o–îa bapariimerã mù ome.”
24 +Mamîda chi mimiapari p'arat'a tau mil jitada pachek'ãri, mãgaji chiparimaa: “Señor, mùa k'awa bùda aji, pùa eperãarã pia chupùria k'awak'aa. K'awa bù pùchia ne–inaa jõma p'e atapari awaraarã mimiadap'edaa pari. 25 Mùa waawee baji pùchi p'arat'a atuadarii jîak'aapa. Mapa ma p'arat'a jau iru baji eujãde. Nama bùda aji, pùchi p'arat'a.” 26 Mãpai chi p'arat'a chiparipa mãgaji: “¡Pù k'achia bùda aji, pia mimiak'aa perã mãik'aapa k'oo–idaa bapari perã! Wãara k'awa baji pùrã mùa mùchi–it'ee ne–inaa jõma p'e atapari awaraarã mimiadap'edaa pari, 27 mãgara ¿sãap'eda mù p'arat'a ùana–e pajima aji, p'arat'a ùapata tede, mãpemaarãpa aù ârù p'aadamerã, mù p'arat'a taarã iru p'anadap'edaa pari?” 28 Mãpai ma p'arat'a chiparipa mãgaji arii p'anadap'edaarãmaa: “Ma p'arat'a tau mil jãri atadapáde aji, mãik'aapa teedapáde aji, chi diez mil iru bùmaa. 29 Eperãpa iru bùmaa waapùara teeit'ee, audupùara iru bamerã. Mamîda chi mak'ùara wêe bùpa ma–ãri iru bù paara jãri atait'eeda aji. 30 Na mimiapari k'achia taawaa ateedapáde aji, p'ãriudee jêenamerã mãik'aapa k'ida kierrkierree nâbamerã p'uapa.”
Tachi Ak'õre ewari waibùa ewatede jarateeda
31 —Mù, chi Eperã Ak'õre Truadepema, chek'ãri mù angeleerã ome, su–ak'ù beeit'ee rey su–ak'ù beepari k'îra wãreede. 32 Na p'ek'au eujãdepemaarã k'îra t'ãdoo cheepurudait'ee mù k'îrapite. Mãpai mùa eperãarã awara–awaraa bùit'ee, ne–animalaarã chiparipa ichi oveja, cabra awara–awaraa bùparik'a. 33 Ovejaarãk'a bee pëiit'ee mù juaraare; jõdee cabrak'a bee mù juabi eere.
34 +Maap'eda mù, jõmaarã Reypa mãgait'ee mù juaraare p'anùùrãmaa: “¡Chétù, mù Ak'õrepa parã pia ak'ùda perã! Chétù Tachi Ak'õre truadee, na p'ek'au eujã ewaa oodak'ãriipa irua parã jùrùt'erada perã. 35 Mù jarrapisia nâbak'ãri, parãpa mùmaa nek'opijida mãik'aapa opisia nâbak'ãri, ne–inaa topijida. Ma awara mù chîara eujãde nipak'ãri, mù auteebaijida pãchi tede. 36 P'aru wêe chidi pak'ãri, parãpa p'aru teejida. K'ayaa bak'ãri, parã wãjida mù ak'ùde. Carcelde bak'ãri, ichiaba mù ak'ùnajida.” 37 Mãpai ichi juaraare k'achia wêe p'anùùrãpa iididait'ee: “Tachi Waibùa, ¿sãaweda unujidama ajida, pù jarrapisia nâbù mãik'aapa nek'opijida? Maa–e pùrã ¿sãaweda unujidama opisia nâbù mãik'aapa ne–inaa topijida? 38 ¿Sãaweda unujidama pù chîara eujãde ni mãik'aapa auteebaijida tai tede maa–e pùrã p'aru wêe ni mãik'aapa p'aru teejida pùmaa? 39 ¿Sãaweda pù ak'ùnajidama ajida, k'ayaa bak'ãri maa–e pùrã carcelde bak'ãri?” 40 Mãpai Reypa p'anauit'ee: “Mùa wãarata jararu. Parãpa mãgee ne–inaa oodap'edaa mù âpemaarã, na chupùria beerãmaa, auk'a mùmaa oojida.”
41 +Maap'eda Reypa ichi juabi eere p'anùùrãmaa mãgait'ee: “¡Parã, chi k'achia–idaa beerã, ãyaa wåtù mù ik'aawaapa! Wåtù t'ùpùtau ichita jêrajêraa jira bùdee, ooda Netuara Poro Waibùa–it'ee; ichideerã–it'ee. 42 Mù jarrapisia nâbak'ãri, parãpa mùmaa nek'opida–e paji mãik'aapa opisia nâbak'ãri, ne–inaa topida–e paji. 43 Ma awara chîara eujãde t'ùmà nipak'ãri, mù auteebaida–e paji pãchi tede. P'aru wêe nipak'ãri, parãpa p'aru teeda–e paji. Mù k'ayaa bak'ãri mãik'aapa carcelde bak'ãri, mù ak'ùnada–e paji.” 44 Mãpai mãùrãpa iididait'ee: “Tachi Waibùa, ¿sãaweda pù unujidama ajida, jarrapisia nâbù maa–e pùrã opisia nâbù; chîara eujãde t'ùmà ni maa–e pùrã p'aru wêe ni; k'ayaa bù maa–e pùrã carcelde bù, taipa pù k'aripada–eeta?” 45 Mãpai Reypa p'anauit'ee: “Mùa wãarata jararu. Parãpa mãgee ne–inaa ooda–e p'anadap'edaa eperãarã chupùria beerãmaa, auk'a mùmaa ooda–e paji.” 46 Mãpai ma k'achia beerã pëiit'ee t'ùpùtau ichita jêrajêraa jira bùdee. Jõdee chi pia beerã Tachi Ak'õre ome ichita p'anapataadait'ee.