Jesupa jarada Tachi Ak'õre te t'eet'aa chedait'ee
(Marcos 13.1-2; Lucas 21.5-6)
24
1 Jesús uchiak'ãri Tachi Ak'õre tedeepa, chi k'õp'ãyoorãpa jara chejida ma te pi–ia oo k'obù. 2 Mãpai Jesupa mãgaji:—¿Parãpa na te jõma pia unu p'anù–ek'ã? aji. Mùa wãarata jararu. Ewari cherude nama mãu apida bee–e pait'ee awaraa mãu ârù. Na jõmaweda t'eek'oo chedait'eeda aji.
Tachi Ak'õre ewari waibùa ewate pai naaweda
(Marcos 13.3-23; Lucas 17.22-24; 21.7-24)
3 Maap'eda wãjida Olivo Eedee. Jesús ituaba su–ak'ù beek'ãri, chi k'õp'ãyoorãpa iidi chejida:
—Jaráji sãapai Tachi Ak'õre te t'eet'aa chedait'ee. ¿Sãga nâbeeyama ajida, pù chei naaweda mãik'aapa Tachi Ak'õre ewari waibùa ewate pai naaweda?
4 Jesupa p'anauji:
—Tauk'a nipapatáatù apidaamaa k'ûrapiamaapa. 5 Mù jîak'a chok'ara chedait'ee. Seewata jaradait'ee: “Mù Cristopù, Tachi Ak'õrepa pëida.” Mãga jara p'anùùpa eperãarã chok'ara k'ûradait'ee. 6 Mù chei naaweda parãpa ûridait'ee nama mãik'aapa awara ãi jura chõo jõnù. Mamîda p'eranáatù. Ichita mãga p'asait'ee. Mamîda at'ãri na p'ek'au eujã jõ–e pait'ee. 7 Aù naaweda eperãarã awaraarã ome chõodait'ee. Jarra oodait'ee mãik'aapa awêrachai wãyaapariit'ee, eujã awara–awaraade. 8 Mamîda mãga p'asak'ãri, ewaapù na p'ek'au eujãdepemaarã miamaa p'aneedait'ee.
9 +Maapai parã jita atadak'ãri, p'ua oodait'ee mãik'aapa peedait'ee. Jõmaarãpa parã k'îra unuamaa iru p'anapataadait'ee mùde ijãapata k'aurepa. 10 Mãga oo p'anadak'ãri, eperãarã chok'ara mùde ijãa amaadait'ee mãik'aapa chik'îra unuamaa jõnadait'ee, ãchi k'õp'ãyoorã traicionaarutamaa. 11 Seewa–idaa beerã chok'ara uchiadait'ee Ak'õre pedee jarapataarã jîak'a. Mãùrãpa eperãarã chok'ara k'ûradait'ee. 12 Mãgá na p'ek'au eujãdepemaarãpa audú ne–inaa k'achia oodait'ee perã, eperãarã chok'araarãpa awaraarã waa k'inia iru p'anada–e pait'ee. 13 Mamîda Tachi Ak'õrepa k'aripait'ee atuanaadamerã k'îra jîp'a nipapataarã Ak'õre ode jai–idaarutamaa. 14 Mùa pëiit'ee eperãarãpa mãga jaradait'ee na p'ek'au eujã jõmaade, p'uuru pidaarã jõmaarãpa k'awaadamerã. Mãpaipù na p'ek'au eujã jõit'ee.
15 +Tachi Ak'õre pedee jarapari Danielpa p'ãdade jara bù abaapa ne–inaa audú k'achia ooit'ee Tachi Ak'õre te edajãde.a Chi nãgà leerupa pia k'îsíaji k'awaait'ee k'ãata jara k'inia bù. 16 Mapa Judea eujãde p'anùùrãpa mãga unudak'ãri, p'ira mirudaipia bù eera jêra bùmaa. 17 Ichiaba eperã terrazade bù pùrã, teedaa t'îuik'araa bù ichi net'aa p'e atade. 18 Ma awara eperã ichi ne–uu k'ãide ni pùrã, teedaa cheik'araa bù p'aru p'ede pida. Aramata wãipia bù. 19 ¡Aai, maapai chupùria jõneedait'ee wêraarã biak'oo bee maa–e pùrã warra chak'eerã jude iru bee! 20 Chupùria iidítù Tachi Ak'õremaa ma ewari p'asapinaamerã k'oijara nâbùde maa–e pùrã âipata ewate. 21 Maapai eperãarã audupùara chupùria mia jõnadait'ee, na p'ek'au eujã ooruweda chupùria para bada k'ãyaara mãik'aapa ma t'êepai waa mãgá chupùriara p'anada–e pait'ee. 22 Tachi Ak'õrepa ma ewari isapai wãyaapi–e pùrã, apida chok'ai p'aneeda–e pai. Mamîda isapai wãyaapiit'ee ichia jùrùt'eradaarã k'aurepa, ãra chupùria k'awaa bapari perã.
23 +Maapai apidaapa parãmaa jararuta pùrã: “¡Pùchá, ak'àtù! ¡Nama bù Cristo, Tachi Ak'õrepa pëida!” maa–e pùrã jararuta pùrã: “¡Ara bùta Cristo!” ijãanáatù. 24 Mù jîak'aarã mãik'aapa Tachi Ak'õre pedee jarapataarã jîak'aarã chok'ara chedait'ee. Mamîda mãùrãpa jara p'anù ijãanáatù, seewa–idaa bee perã. Ne–inaa k'îra t'ãdoo eperãarãpa p'oyaa oodak'aa ãchi juadoopa oo p'anùùpa eperãarã k'ûradait'ee, perá Tachi Ak'õrepa jùrùt'eradaarã k'ûrarutamaa. 25 Mùa parãmaa ûraapari k'awaadamerã mãga p'asai naaweda. 26 Mapa parãmaa jararuta pùrã: “¡Ak'àtù! Achú bù Tachi K'aripapari, eujã pania wêe bùde,” mamaa wãnáatù mù jùrùde. Maa–e pùrã jararuta pùrã: “¡Ak'àtù! Ichi nama miru bù,” ijãanáatù. 27 Atu p'anùde pa tau jêra t'îuparik'a ak'õrejîru uchiapari eereepa baaiparimaa, mãga pùk'a eperãarã atu p'anùde mù, chi Eperã Ak'õre Truadepema waya cheit'ee. 28 Piuda k'ap'ùa bùmãi ãkoso seedaipatada aji.
Jesupa jarateeda Eperã Ak'õre Truadepema waya cheit'ee
(Marcos 13.24-27; Lucas 21.25-28)
29 —Ma chupùria jõnadap'edaa t'êepai, nãga pait'ee:
‘Tachi Ak'õrepa pajã wërepiit'ee. Ak'õrejîru p'ãriudariit'ee; atane waa âdaa–e pait'ee mãik'aapa lucero baaik'oodaridait'ee pajãdeepa.’ (Isaías 13.10)
30 Mãpai pajãde eperãarãpa ne–inaa unudait'ee. Ma k'aurepa k'awaadait'ee mù, chi Eperã Ak'õre Truadepema, cheru. Mãpai na p'ek'au eujãdepemaarã jêe para beeit'ee ãchobeepa. Unudait'ee mù, chi Eperã Ak'õre Truadepema, jõmaarã k'ãyaara waibùara bù k'îra wãree cheru jâararade. 31 Mãpai mùa trompeta golpe chaapiit'ee angeleerãmaa, p'e chedamerã eperãarã mùa jùrùt'era iru bùùrã na p'ek'au eujã jõmaade, t'ùmà bee pùjida.
Jesupa higuera bùùrùde jarada
(Marcos 13.28-31; Lucas 21.29-33)
32 —K'îsíatù higuera bùùrùde. Higuera k'iru t'u–k'ua uchia nâbeek'ãri mãik'aapa ewaa t'ono nâbeek'ãri, k'awaapata eujã wãsia wã. 33 Mãga pùk'a mùa et'ewa jaradak'a unudak'ãri, k'awa p'anù taarã–e mù, chi Eperã Ak'õre Truadepema cheru. 34 Mùa wãarata jararu. Ârapemaarã piudai naaweda, ma ne–inaa jõmaweda p'asait'ee. 35 Ewari cherude pajã na p'ek'au eujã ome jõdait'ee. Mamîda ichita p'asait'ee mùa pedee jaradak'a.
K'awada–e p'anù sãapai cheit'ee Eperã Ak'õre Truadepema
(Marcos 13.32-37; Lucas 17.26-30)
36 —Eperã apidaapa k'awada–e p'anù Eperã Ak'õre Truadepema cheit'ee ewate; chi hora jida. Ùt'aripema angeleerãpa pida k'awada–e p'anù; mùa pida ichiaba. Mù Ak'õrepapai k'awa bù.
37 +Noé bada ewaride p'asadak'a mãga pùk'a p'asait'ee mù, chi Eperã Ak'õre Truadepema waya chek'ãri. 38 Maapai na p'ek'au eujã ûui naaweda, eperãarã nek'opachida, ne–inaa topachida mãik'aapa miak'ãipachida Noé ichi barcode bataurumaa. 39 Mamîda atu p'anùde k'oi chedachi, eujã ûudachi mãik'aapa jõmaweda k'iniidachida. Mãga pùk'a p'asait'ee ichiaba mù, chi Eperã Ak'õre Truadepema waya chek'ãri. Atu p'anùde cheit'ee. 40 Ma ewate eperãarã omé mimiamaa p'anadait'ee ãchi eujãde. Angeleerãpa aba ùt'aa ateedait'ee; chi apema atabëidait'ee. 41 Ichiaba wêraarã omé trigo bamaa p'anadait'ee k'ûrumade. Aba ùt'aa ateedait'ee; chi apema atabëidait'ee.
42 +Maperã tauk'a p'anapatáatù k'awada–e p'anadairã sãapaita cheit'ee Pãchi Waibùa. 43 Nãgà pedee pia k'awáatù. Te chiparipa k'awa bada paara nechùapari cheit'ee hora p'ãrik'ua ichi net'aa chùa atait'ee, chok'ai bak'aji ma nechùapari ichi tede t'îupiamaapa. 44 Mãgá parã jida chok'ai pùk'a p'anadaipia bù, atu p'anùde mù, chi Eperã Ak'õre Truadepema, cheit'ee perã.
Mimiapari pia mimiapari k'achia ome
(Marcos 13.34-37; Lucas 12.41-48)
45 —¿Sãgá baparima aji, mimiapataarã poro waibùa pia? Mãgùpa k'îsia k'awaa oopari chiparipa oopi bùk'a. Pia ak'ùpari chipari net'aa atabëida ichi juade mãik'aapa chiparimaa nek'opip'eda, mimiapataarãmaa chik'o tawapari. 46 O–îa bapari chipari pachek'ãri, ichi mimiamaa unu chepari perã. 47 Mùa wãarata jararu. Chiparipa mãga unu chek'ãri, jõma ichia net'aa iru bù bùit'ee ma mimiapari jua ek'ari ak'ù bamerã. 48 Mamîda ma mimiapari t'ãri k'achia bù pùrã, nãga k'îsiai: “Taarãit'ee mù chipari.” 49 Mapa apemaarã mimiapataarã wùmaa beei mãik'aapa tomaa beei, nek'omaa beei toyaa beerã ome. 50 Mamîda ma mimiapari k'achia atu bùde chi te chipari pacheit'ee. 51 Mãpai irua ooda k'awaa atak'ãri, iru miapiit'ee mãik'aapa ãyaa pëit'aait'ee mimiapataarã seewata mimiapatada apataarã ome bade. Mama jêe nâbait'ee mãik'aapa k'ida kierrkierree nâbait'ee p'uapa.