Miak'ãipata fiestade nepùrùda
(Lucas 14.15-24)
22
1 Jesupa waya jarateemaa beek'ãri, nepùrùji:2 —Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Reypa k'îsia iru baji miak'ãipata fiesta ooit'ee ichi warra–it'ee. 3 Chi mimiapataarã pëiji ichia eperãarã t'â pëida p'e atanadamerã. Mamîda che k'iniada–e paji. 4 Waya awaraa mimiapataarã chok'ak'ãri, mãgaji: “Jaranadapáde aji, mùa t'â pëida eperãarã chedamerã chik'o îipa nâbairã. Peepiji p'ak'a, awaraa ne–animal poreera iru bada ome. Mãgà jõma îipa ak'ùnâ bairã, chedapáde aji, miak'ãipata fiesta oode.” 5 Mamîda ma eperãarãpa ûri k'iniada–e paji irua jara pëida. Fiesta oode chedai k'ãyaara, aba wãji ichi eujãdee. Jõdee awaraa wãji net'aa netode. 6 Apemaarãpa eperãarã reypa pëida jita atadak'ãri, p'ua oojida peet'aarutamaa. 7 Reypa mãga k'awaa atak'ãri, k'îraudachi. Mapa pëiji ichi soldaorã ma eperãarã peenadamerã mãik'aapa ãchi p'uuru paat'aadamerã. 8 Maap'eda mãgaji chi mimiapataarãmaa: “Miak'ãipata fiesta at'ãri oodait'ee. Mamîda ooda–e ma t'â pëida eperãarã ome, chedaamaa p'anadap'edaa perã. 9 Mapa wãdapáde aji, calle jãdee mãik'aapa chi unurutaarãmaa jaradapáde aji, mù ome fiesta oode chedamerã.” 10 Aramãgá chi mimiapataarã wãjida calle jãdee. Chok'ara p'e aneejida; eperãarã pia beerã, k'achia beerã paara. Mãgá ma rey te p'îu nâbeeji eperãarãpa.
11 +Mamîda rey t'îuk'ãri ma p'e aneedap'edaarã ak'ùde, unuji eperã miak'ãipata fiestade jâpata p'aru jâ–ee bù. 12 Mapa mãgaji: “K'õp'ãyo, ¿sãga t'îujima aji, nama, fiestade p'aru jâpata jâ–ee?” Mamîda ma eperã k'îup'ee beeji. 13 Maperã reypa jaraji chi mesa ak'ùpataarãmaa: “Jã eperã bùùrù, jua ome jâ nâbùdapáde aji, mãik'aapa taawaa p'ãriudee ateedapáde aji, mama jêemerã, k'ida kierrkierree para bamerã p'uapa.” 14 Tachi Ak'õrepa chok'ara t'â pëipari. Mamîda chok'ara–ee jùrùt'erapari wãpiit'ee ichi truadee.
Impuesto–it'ee reymaa p'arat'a p'aapatap'edaa
(Marcos 12.13-17; Lucas 20.20-26)
15 Ma t'êepai fariseorã chip'edaidap'eda, pedeeteejida Jesús k'ûradait'ee. P'anauru pùrã, ùmùateedai mãik'aapa peepit'aadai. 16 Ma–it'ee pëijida ãchi eere p'anadap'edaarã, Rey Herodes eere p'anadap'edaarã ome Jesumaa. Mãùrãpa mãgajida:
—Tachi Jarateepari, taipa k'awa p'anù pùa wãarata jarapari mãik'aapa jarateepari p'anapataadamerã Tachi Ak'õrepa k'inia bùk'a, eperãarãpa ãchia k'iniata oopata mîda. K'awa p'anù pùa eperãarã ârùpai ak'ùk'aa; ma k'ãyaara tachi t'ãride iru bù ak'ùpari. 17 Maperã k'awa k'inia p'anù pùa k'ãata k'îsia bù. ¿Pia bùk'ã ajida, impuesto p'aadait'ee Cesarmaa, wa mãga–e?
18 Jesupa k'awa bada perã mãùrãpa k'îsia k'achia iru p'anù, mãgaji:
—¡Seewata parãpa Tachi Ak'õrede ijãapatada apata! ¿Sãap'eda mù k'ûra k'inia p'anùma? 19 Ak'ùpidapáde aji, p'arat'a tau impuesto p'aapata.
—¿K'ai k'îrata nade bù mãik'aapa k'ai t'âta p'ã bùma? aji.
21 P'anaujida:
—César k'îra mãik'aapa ichi t'âta p'ã bùda ajida.
Mãpai Jesupa mãgaji:
—Mãgara téetù Cesarmaa irua net'aa iidipari, mãik'aapa auk'a téetù Tachi Ak'õremaa irua iidipari.
22 Mãga ûridak'ãri, ak'ùtrua para beeji mãik'aapa erreujida.
Chok'ai p'irabaidait'eerãde iididap'edaa
(Marcos 12.18-27; Lucas 20.27-40)
23 Ma ewateweda saduceorã ûk'uru Jesumaa chejida. Mãgùùrãpa ijãadak'aa tachi piup'eda chok'ai p'irabai. Maperã mãgajida:
24 —Tachi Jarateepari, Moisepa jaraji eperã miak'ãi bù warra wêe piuru pùrã, chi âpemapa iru wêra ataipia bù mãik'aapa aù ome warra ooipia bù chi âpema piuda k'ap'ùa pari.a 25 Tai t'ãide p'anapachida âpemaarã siete. Chi naapema miak'ãiji. Mamîda warra wêe piuji. Mãgá chi wêra beeji chi araarepema âpema ome. 26 Mamîda mãgà ichiaba warra wêe piuji. Chi araarepema mãik'aapa araarepema miak'ãijida ma p'êtrãa ome. Mamîda auk'a warra wêe piujida. Ma t'êepai chi apemaarã jida miak'ãijida ma p'êtrãa ome. Mamîda ãchi jõmaweda warra wêe piujida. 27 Maap'eda, ma wêra ichiaba piuji. 28 ¿K'ãata k'îsia bùma? ajida. Eperãarã piudap'eda chok'ai p'irabaidak'ãri, ¿chisãgà âpemata ma wêra ùmùk'îra pait'eema ajida, ãchi jõmaweda iru ome miak'ãi p'anadap'edaa perã?
29 Jesupa p'anauji:
—Parãpa pia k'awada–e p'anù Tachi Ak'õre Ûraa p'ãda mãik'aapa k'awada–e p'anù ne–inaa jõmaweda iru juapa oopari. Mapa parãpa pia k'îsiada–e p'anù. 30 Eperãarã piudap'eda chok'ai p'irabaidak'ãri, ùmùk'îraarã wêraarã ome waa miak'ãida–e pait'ee. Angeleerã ichi truade p'anùùråk'apù p'anadait'ee. 31 Ma awara parãpa k'achia k'îsia p'anapata jaradak'ãri piudap'edaarã chok'ai p'irabaidak'aa. ¿Parãpa leeda–e p'anùk'ã Tachi Ak'õre Ûraa p'ãdade jara bù?
32 ‘Mù pù chonaarã Ak'õre Waibùa; Abraham, Isaac, Jacob ijãadap'edaa Ak'õre Waibùa.’ (Éxodo 3.6)
¡Tachi Ak'õre piudap'edaarã Ak'õre Waibùa–epù. Chok'ai p'anùùrã Ak'õre Waibùa!
33 Mãga ûridak'ãri, eperãarã ak'ùtrua para beeji, Jesupa mãgá k'îsia k'awaa jarateeda perã.
Tachi Ak'õre Ûraa waibùara bù
(Marcos 12.28-34)
34 Fariseorãpa k'awaa atadak'ãri Jesupa ma saduceorã k'îup'eepik'ooda, chip'ejida. 35 Maap'eda Jesús k'ûra k'iniapa Moisepa p'ãda jarateeparipa iidiji:
36 —Tachi Jarateepari, ¿chisãgà ûraata waibùara bùma aji, apema Ak'õre Ûraa p'ãdadepema k'ãyaara?
37 Jesupa p'anauji:
—‘Tachi Ak'õre Waibùa k'inia iru baparíiji pùchi t'ãripa mãik'aapa ne–inaa jõmaa k'ãyaara iru k'inia iru baparíiji. Ewari chaa k'îsíaji irude pùchi t'ãripa.’ (Deuteronomio 6.5)
‘Awaraarã k'inia iru baparíiji pùchi k'ap'ùa k'inia iru baparik'a.’ (Levítico 19.18)
40 Ma ûraa omeeweda waibùara p'anù, madeepa uchiadap'edaa perã awaraa ûraa jõmaweda Moisepa p'ãda mãik'aapa Tachi Ak'õre pedee jarapataarãpa p'ãdap'edaa.
K'aideepa uchiada Tachi Ak'õrepa pëida
(Marcos 12.35-37; Lucas 20.41-44)
—¿K'ãata k'îsia p'anùma aji, parãpa? ¿K'aideepa uchiayama aji, Tachi Ak'õrepa pëiit'ee bù, Mesías apata?
P'anaujida:
—Rey Daviddeepa uchiait'eeda ajida.
43 Mãpai Jesupa mãgaji:
—Mãgara, ¿sãap'eda Rey Davidpa irumaa: “Tachi Waibùa” aji, Tachi Ak'õre Jaurepa nãga jarapik'ãri?
44 ‘Tachi Ak'õrepa jaraji Tachi Waibùamaa: “Pù mù ome auk'a waibùa bairã, su–ak'ù beepáde aji, mù juaraare, mùa pù k'îra unuamaa iru p'anapataarã p'oyaaru misa.” ’b (Salmos 110.1)
45 Davidpa ichi ëreerãdeepa uchiait'ee bùmaa t'âjaraji “Tachi Waibùa”. ¿Mapa k'awada–ek'ã aji, Mesías waibùara bù chonaarãwedapema Rey David k'ãyaara?
46 Ma fariseorãpa maarepida p'oyaa p'anauda–e paji. Maadamãiipa waawee p'aneejida waa iididait'ee.