Jesupa mimiapataarãde nepùrùda
20
1 —Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Tap'eda eujã chipari uchiaji mimiapataarã jùrùde ichi uva k'ãide mimianadamerã. 2 Mimiapataarãmaa jaraji ewari aba mimiada pari denario aba p'aait'ee ma mimiapataarã chaachaa. Mãpai pëiji mimiade. 3 Ãstaawa ma eujã chipari waya uchiaji mimiapataarã jùrùde. P'uuru jãde net'aa netopatamãi unu cheji mimiapataarã mimia wêe para bù. 4 Mãga unuk'ãri, mãgaji: “Parã ichiaba wãdapáde aji, mimiade mù uva k'ãide. Mùa pia p'aayada aji, parã mimia pari.” Mãpai wãjida mimiade. 5 Imat'ùpa ma eujã chipari waya uchiaji mimiapataarã jùrùde, aù naaweda oodak'a. Ichiaba k'ewara auk'a ooji. 6 Mata waya k'ewaraa uchiaji mãik'aapa waya unu cheji awaraa mimiapataarã p'uuru jãde p'anù, mimia wêe para bù. Mapa mãgaji: “¿Sãap'eda parã nama mimiada–ee k'eu wãdama?” aji. 7 P'anaujida: “Apidaapa taimaa mimia teeda–e perã, mimiada–e p'anùda” ajida. Mãpai ma eujã chiparipa mãgaji: “Mimianadapáde aji, mù uva k'ãide.”8 +P'ãriupodopa ma eujã chiparipa mãgaji chi mimiapataarã poro waibùamaa: “T'âpáde aji, mimiapataarã jõmaweda. Naapùara p'aapáde aji, chi t'êe t'îudap'edaarãmaa mãik'aapa jõmaarã k'ãyaara t'êe p'aapáde aji, chi naapùara t'îudap'edaarãmaa.” 9 Mãga ooji. K'ewara t'îudap'edaarãmaa p'aaji denario aba, eperã chaachaa. 10 Apemaarãmaa p'aa aupak'ãri, pachejida chi naa mimiadap'edaarã. Mãgùùrãpa k'îsiajida p'arat'a audupùara jitadait'ee apemaarã k'ãyaara. Mamîda mãga–e paji. Ãchimaa ichiaba denario abapai p'aaji ãchi mimiadap'edaa pari. 11 Ãchi p'arat'a jitadak'ãri, ik'achia pedee p'aneejida ma eujã chiparimaa: 12 “Ma t'êe hora apai mimiadap'edaarãmaa pùa denario aba p'aajida ajida. Jõdee tai tap'edaweda ak'õrejîrumaa mimia k'eudap'edaa párita ãchi ome auk'a p'aaji. ¡Taimaa audupùara teeipia bùda!” ajida. 13 Mamîda ma eujã chiparipa ãchidepema abaamaa p'anauji: “Mùa parã k'ûra–eda aji. ¿Parãpa jarajida–ek'ã aji, ewari aba mimiada pari denario abapai iididait'ee? 14 Pùchi p'arat'a jitapáde aji, mãik'aapa k'ãiwee wãpáde aji. Mùa auk'a p'aa k'inia bù pùrã chi t'êe t'îudap'edaarãmaa, mãga ooit'eeda aji. 15 ¿Mù na eujã chipari–ek'ã? aji. Mùchi p'arat'a ome ooi mùchia oo k'inia bùk'a, mëré perã. ¿Parã t'ãri k'achia jõnùk'ã aji, mù t'ãri pia bairã?”
16 Mãga nepùrùp'eda, Jesupa mãgaji:
—Mãga bù Tachi Ak'õre ome. Ârapema t'êe chedap'edaarã Tachi Ak'õrepa ãchi bùmerã ichi jua ek'ari, naapùara ichideerã p'aneedait'ee ichi k'îrapite. Mamîda chi naapùara chedap'edaarã Tachi Ak'õrepa ãchi bùmerã ichi jua ek'ari, mãga p'aneeda–e payada aji, t'êe p'aneedait'ee perã ichi k'îrapite.
Jesupa jarada õpee jarada ichi peedait'ee
(Marcos 10.32-34; Lucas 18.31-34)
17 Jesús wãrude Jerusalén p'uurudee, chi k'õp'ãyoorã doce awara ãi t'â p'e ataji mãik'aapa mãgaji:
18 —Tachi wãruta Jerusalendee. Mama mù, chi Eperã Ak'õre Truadepema, jita atadait'ee mãik'aapa ateedait'ee p'aareerã poroorãmaa mãik'aapa Moisepa p'ãda jarateepataarãmaa peepit'aadamerã. 19 Mãùrãpa mù teedait'ee k'îra tewaraarãmaa mù oo iru p'anadamerã, wùdamerã, mãik'aapa kurusode peet'aadamerã. Mamîda ewari õpeemaa waya chok'ai p'irabaiit'eeda aji.
Zebedeo wêrapa Jesumaa chupùria iidida
(Marcos 10.35-45)
20 Zebedeo wêra chi warrarã Santiago, Juan ome Jesús k'ait'a chejida. Ma wêra iru k'îrapite bedabai nâba cheji chupùria iidiit'ee. 21 Mãga unuk'ãri, Jesupa iidiji:
—¿K'ãata k'inia bùma? aji.
Ma wêrapa p'anauji:
—Jarapáde aji, pù eperãarã rey beek'ãri, mù warrarã su–ak'ù p'aneedamerã pù ik'aawa, aba juaraare, aba juabi eere.
22 Mãpai Jesupa mãgaji ma warrarãmaa:
—Parãpa wãara k'awada–e p'anù k'ãata iidi p'anù. ¿Parãpa ne–inaa k'achia choodaik'ã aji, mùa chooit'ee bùk'a?
P'anaujida:
—¡P'oyaadaipù!
23 Mãpai Jesupa mãgaji:
—Parãpa ne–inaa k'achia choodait'eeda aji, mùa chooit'ee bùk'a. Mamîda mùa p'oyaa jara–e k'airãta mù juaraare wa juabi eere su–ak'ù p'aneedait'ee. Mù Ak'õrepapai jarayada aji.
24 Apemaarã diez k'õp'ãyoorãpa ûridak'ãri Santiago Juan ome iididap'edaa, k'îraudachida ãchi ome. 25 Mapa Jesupa chi k'õp'ãyoorã jõmaweda t'â p'e atap'eda, mãgaji:
—Parãpa k'awa p'anù ijãadak'aa beerã poro waibùarãpa ãchia oo k'iniata oopipata eperãarãmaa. Waaweepa ãchi jua ek'ari p'anùùrãpa oopata ãchia jara p'anùk'a. 26 Mamîda parãpa oodaik'araa bù ma poro waibùarãpa oopatak'a. Ma k'ãyaara ijãapataarã t'ãide chi waibùara pa k'inia bùpa apemaarã chupùria k'awaaipia bù mãik'aapa k'aripaipia bù. 27 Pia jarait'eera, parãdepema aba poro waibùa pa k'inia bù pùrã, awaraarã k'aripaipia bù esclavopa chipari k'aripaparik'a. 28 Mù, chi Eperã Ak'õre Truadepema mîda, na p'ek'au eujãde che–e paji eperãarãpa mù jîia ùadamerã. Jîp'a cheji eperãarã k'aripa atait'ee o k'achiadeepa. Piuit'ee eperãarã chok'ara uchiadamerã p'ek'au k'achia jua ek'ariipa.
Jesupa tau p'ãriu bee omé jùpada
(Marcos 10.46-52; Lucas 18.35-43)
29 Jesús chi k'õp'ãyoorã ome Jericó p'uurudeepa uchia wãdak'ãri, eperãarã chok'ara t'êe nipajida. 30 Mama tau p'ãriu bee omé o bi ik'aawa su–ak'ù p'anajida. Ûridak'ãri Jesuta wãyaa wã, biajida:
—¡Tachi Waibùa, Rey David Warra, tai chupùria k'awaapáde! ajida.
31 Eperãarã auk'a wã nipadap'edaarãpa ùtrùat'aapachida k'îup'ee p'aneedamerã. Mamîda waapùara biapachida:
—¡Tachi Waibùa, Rey David Warra, tai chupùria k'awaapáde! ajida.
32 Mãpai Jesús ak'ùnâ beep'eda, t'â ataji mãik'aapa iidiji:
—¿K'ãata k'inia p'anùma aji, mùa oomerã parã ome?
33 P'anaujida:
—Tachi Waibùa, tachi taupa pia unu k'inia p'anùda ajida.
34 Mãga ûrik'ãri, Jesupa chupùria k'awaaji mãik'aapa taumãi t'õbaiji. Aweda tau pia unujida. Mãpai wãjida Jesús t'êe.