Jesupa jarateeda miak'ãi p'anùùrã mia amaanaadamerã
(Marcos 10.1-12; Lucas 16.18)
19
1 Ma pedee jarap'eda, Jesús wãji Galilea eujãdeepa. Panaji Judea eujãde, Jordán to k'îraik'a eere. 2 Eperãarã chok'ara wãjida Jesús t'êe. Mãgá irua ãchi k'ayaa jùpak'ooji.3 Mama fariseorã ûk'uru irumaa chejida. Moisepa p'ãda merapii jîak'aapa, iidijida:
—¿Ùmùk'îrapa ichi wêra ichi k'inia amaaipia bùk'ã? ajida.
4 Jesupa p'anauji:
—¿Tachi Ak'õre Ûraa p'ã bùde parãpa nãga leeda–e p'anùk'ã? aji. Na eujã ook'ãri,
‘Ooji ùmùk'îra mãik'aapa wêra’. (Génesis 1.27)
5 ‘Mapa ùmùk'îrapa atabëiit'ee chi ak'õre chi nawe ome, araa p'anapataadait'ee chi wêra ome. Mãgá eperã omeeweda eperã apai pùk'a p'aneedait'ee.’ (Génesis 2.24)
6 Eperã omé p'anù mîda, jîp'a eperã apai pùk'a p'aneepata. Mapa Tachi Ak'õrepa eperãarã omé araa papik'ãri, apidaapa amaapidaik'araa bùda aji.
7 Mãpai ma fariseorãpa iidijida:
—Mãgara, ¿sãap'eda Moisepa jarajima ajida, wêra amaaru pùrã, mia amaada k'art'a p'ã teeipia bù jëret'aadai naaweda?
8 Jesupa p'anauji:
—Mãga jaraji parã k'ùùrù k'isua p'anadairã. Moisepa pãchi wêra amaapiji. Mamîda Tachi Ak'õrepa na eujã ewaa ook'ãri, mãga–e paji. 9 Mùa jara bù: Eperãpa amaat'aaru pùrã chi wêra awaraa ùmùk'îra ome bù–eeta, maap'eda awaraa wêra ome miak'ãiru pùrã, p'ek'au oomaa bùda aji, ma t'êepema wêra ome.
10 Mãpai chi k'õp'ãyoorãpa mãgajida:
—Mãga pùrã, ùmùk'îra miak'ãik'araa bùda ajida, wêra ome.
11 Mãpai Jesupa mãgaji:
—Jõmaarãpa k'awada–e mùa et'ewa jarada. Jîp'a k'awadait'ee Tachi Ak'õrepa k'awapi k'inia bùùrãmaa. 12 Edaare ùmùk'îraarã wêra ata k'iniadak'aa. Ùmùk'îraarã ûk'uru ãchi t'orutaweda p'oyaa warra oodak'aa. Ûk'uru k'ap'adap'edaa perã p'oyaa warra oodak'aa. Awaraarã miak'ãi k'iniadak'aa jîp'a ùt'aa t'âdait'ee Tachi Ak'õremaa mãik'aapa oodait'ee irua oopi bùk'a, wêrade k'îsia–ee. Mãga p'oyaa ooruta pùrã, oodapáde aji.
Jesupa warrarã bendiciada
(Marcos 10.13-16; Lucas 18.15-17)
13 Maap'eda eperãarãpa ãchi warrarã aneejida Jesumaa iru jua bùmerã ãra ârù mãik'aapa ùt'aa t'âmerã ãra pari. Mamîda Jesús k'õp'ãyoorãpa mãga unudak'ãri, ma warrarã aneedap'edaarã ùtrùajida. 14 Mãpai Jesupa mãgaji:
—¡Ùtrùanáatù! Ichiak'au mùmaa warrarã chepítù, Tachi Ak'õrepa ãra jîak'aarã bùit'ee perã ichi jua ek'ari, ichideerã p'aneedamerã.
15 Mãga jarap'eda, ichi jua ãra ârù bù wãpachi mãik'aapa ùt'aa t'âji ãra pari. Maap'eda ichi ode wãji.
K'ûtrãa p'arat'ara bù pedeeda Jesús ome
(Marcos 10.17-31; Lucas 18.18-30)
16 Maapai k'ûtrãapa Jesumaa iidi cheji:
—Tachi Jarateepari, ¿k'ãare ne–inaa piata ooipia bùma aji, ùt'aa wãit'ee?
17 Jesupa p'anauji:
—¿Sãap'eda mùmaa mãga iidi bùma? aji. Tachi Ak'õre aupaita pia bù. Pù ùt'aa wã k'inia bù pùrã, oopáde aji, Tachi Ak'õrepa Moisemaa p'ãpidade jara bùk'a.
18 Ma k'ûtrãapa iidiji:
—¿Chisãgà ûraade jara bùk'a ooipia bùma? aji.
Jesupa p'anauji:
—‘Eperã peenáaji; miak'ãi bù pùrã, awaraarã ome k'ãináaji; nechùanáaji; seewa jaranáaji chîara k'achiade baaipiit'ee. 19 Pùchi ak'õre mãik'aapa pùchi nawe k'inia iru baparíiji mãik'aapa ãra pedee ûriparíiji.a (Éxodo 20.12-16)
Awaraarã k'inia iru baparíiji pùchi k'ap'ùa k'inia iru baparik'a.’ (Levítico 19.18)
20 Mãpai ma k'ûtrãapa mãgaji:
—Ma jõma ooparida aji. ¿K'ãata waa ooyama? aji.
21 Jesupa p'anauji:
—Ne–inaa jõma oo k'inia bù pùrã Tachi Ak'õrepa k'inia bùk'a, pùchi net'aa netok'oonáji mãik'aapa chupùria beerãmaa ma p'arat'a téeji. Mãga ooru pùrã, ne–inaa pipùara iru bait'ee Tachi Ak'õre eujãde. Mãga oop'eda, mù ome nipa chéji.
22 Ma k'ûtrãapa mãga ûrik'ãri, k'îra pia–ee wãji, p'arat'a audú k'inia bada perã.
23 Maap'eda Jesupa mãgaji chi k'õp'ãyoorãmaa:
—Mùa wãarata jararu. Chaaree bait'ee p'arat'ara bù beeit'ee Tachi Ak'õre jua ek'ari ichideerã ome. 24 Waya jarait'ee. Chaareera bùda aji, p'arat'ara bù beeit'ee Tachi Ak'õre jua ek'ari, camello aguja taude wãyaai k'ãyaara.
25 Chi k'õp'ãyoorãpa mãga ûridak'ãri, waapùara p'era pùk'a para beeji. Mãpai iidijida:
—Mãgara, ¿k'aita p'oyaa ùt'aa wãyama? ajida.
26 Jesupa ãchimaa ak'ùji mãik'aapa p'anauji:
—Eperãarãpa p'oyaa ooda–e, audú chaaree bairã. Mamîda Tachi Ak'õre–it'ee ne–inaa chaaree wê–eda aji.
27 Mãpai Pedropa mãgaji:
—Tai net'aa jõmaweda atabëijida pù ome nipapataadait'ee. ¿K'ãata atadait'eema aji, ma pari?
28 Jesupa p'anauji:
—Mùa wãarata jararu. Tachi Ak'õrepa k'inia bak'ãri, mù, chi Eperã Ak'õre Truadepema, su–ak'ù beepiit'ee ichi rey su–ak'ù beeparide ùt'ari ichi k'îra wãreede. Maapai parã mù ome nipapatap'edaarã auk'a mama su–ak'ù p'aneedait'ee rey su–ak'ù beepari docede. Mama parãpa Israeldeepa ëreerã doce uchiadap'edaarã iru p'anadait'ee parã jua ek'ari mãik'aapa jaradait'ee mãùrãpa oopatap'edaa pia wa k'achia. 29 Eperã mùde ijãa bù k'aurepa atabëiru pùrã ichi te, âpemaarã, âpewêraarã, ak'õre, nawe, warrarã maa–e pùrã eujã, ma k'ãyaara mãgee ne–inaa pia atada cien atait'ee na p'ek'au eujãde bù misa. Ma awara piuk'ãri, ùt'aa wãit'ee. 30 Mamîda ârapema waibùara p'anùùrã eperãarã k'îrapite, ek'ariara p'anadait'ee Tachi Ak'õre k'îrapite. Jõdee ek'ariara p'anùùrã eperãarã k'îrapite waibùara p'anadait'ee Tachi Ak'õre k'îrapite.