Chisãgà eperãta waibùara bù Tachi Ak'õre k'îrapite
(Marcos 9.33-37; Lucas 9.46-48)
18
1 Mama p'anùde chi k'õp'ãyoorã Jesumaa chedap'eda, iidijida:—¿Chisãgà Ak'õredeerã waibùara bùma ajida, iru jua ek'ari?
—Mùa wãarata jararu. Parãpa awaraa k'îsia atada–e pùrã mãik'aapa na warra chak'ek'a t'ãripa ijãada–e pùrã, p'oyaa p'aneeda–e pai Tachi Ak'õre jua ek'ari ichideerã ome. 4 Chi ijãapari chok'ek'ee bù na warra chak'ek'a; mãgà waibùara bù apema Tachi Ak'õre jua ek'ari p'anùùrã k'ãyaara. 5 Mùde ijãa bù k'aurepa nãgà warra chaik'a auteebairu pùrã, mù jida auteebaiit'ee.
Jesupa jarada p'ek'au k'achia oonaadamerã
(Marcos 9.42-48; Lucas 17.1-2)
6 —Apidaapa p'ek'au k'achia oopiru pùrã nãgee warra chaik'a mùde t'ãripa ijãa bùmaa, piara bak'aji k'ûruma iru otaude jâ atadap'eda, to t'ai nãpùa bùmãi toidú bat'at'aadait'ee, âyapa jâa piumerã. 7 Na p'ek'au eujãdepemaarã k'achiade p'anapata p'ek'au k'achia oopipataarã nama p'anapata perã. Ichita mãgeerã paraait'ee. Mamîda ¡aai, chi eperãpa chîaramaa ne–inaa k'achia oopiru, Tachi Ak'õrepa miapiit'ee perã!
8 +Mapa pùchi juapa maa–e pùrã pùchi bùùrùpa ne–inaa ooda k'aurepa pù k'achiade baairu pùrã, ma k'achia oo amáaji, pùchi jua maa–e pùrã bùùrù t'ùap'et'aak'ajik'a. Piara bù ùt'aa wãit'ee jua mosaa maa–e pùrã bùùrù mosaa, k'ap'ùa jõmaweda atuai k'ãyaara t'ùpùtau ichita jêrajêraa jira bùde. 9 Ichiaba pùchi taupa ne–inaa unuda k'aurepa pù k'achiade baairu pùrã, ma k'achia oo amáaji pùchi tau êt'ak'ajik'a mãik'aapa t'ùmà bat'at'aak'ajik'a. Piara bù ùt'aa wãit'ee tau apai ome, k'ap'ùa pia tau omeepa atuai k'ãyaara t'ùpùtau ichita jêrajêraa jira bùde tok'arradee.
10 +Nãgee warrarã apida unuamaa iru p'ananáatù. Mùa jara bù: Ùt'aripema angeleerã Tachi Ak'õre k'îrapite p'anùùrãpa ãra chaachaa ak'ùpata. 11 [Mù, chi Eperã Ak'õre Truadepema cheji atua beerã o k'achiadeepa k'aripa atade.]
Jesupa oveja atua badade nepùrùda
(Lucas 15.3-7)
12 —K'îsíatù nãgà nepùrùrude. Eperãpa cien oveja p'e iru bùdepema aba atuadaru pùrã, ¿atabëi–e paik'ã chi apemaarã noventa y nueve ãchi p'anapatamãi, chi atuadaida jùrùnait'ee? 13 Unu ataru pùrã, o–îara bait'ee ma oveja k'aurepa, chi apemaarã atuada–e p'anù k'ãyaara. 14 Mãga bù ichiaba parã ùt'aripema Ak'õre Waibùa ome. Apida atuapiamaa bù, ma–ãriara bù pùjida.
Jesupa jarateeda perdonaa k'awaadamerã
(Lucas 17.3-4)
15 —Awaraa ijãaparipa pùmaa ne–inaa k'achia ooru pùrã, iru k'îrapite pedéeji k'awaapiit'ee irua k'achia ooda. Irua pù pedee ûriru pùrã, t'ãri auk'a bùdai. 16 Mamîda irua pù pedee ûri k'inia–e bù pùrã, t'â atáji eperã omé maa–e pùrã õpee, mãùrã wãdamerã pù ome mãik'aapa auk'a ûridamerã pùa ùmùateeru.a 17 At'ãri ûri k'inia–e bù pùrã, jaráji ijãapataarã jõmaarãmaa; pù ome chip'epataarã ùt'aa t'âpataadait'ee. Mãgùùrã pedee paara ûri k'inia–e bù pùrã, mãgara ichi beeit'ee Ak'õrede ijãak'aa bùk'a, maa–e pùrã impuesto p'eparik'a Roma pidaarã pari.
18 +Mùa wãarata jararu. Na p'ek'au eujãde p'anù misa, parãpa ne–inaa oopida–e p'anù pùrã, Tachi Ak'õrepa auk'a oopi–e pait'ee. Jõdee ne–inaa oopiruta pùrã, irua auk'a oopiit'ee.
19 +Waya mùa jara bù: Parãdepema omé pedeedak'ãri, t'ãri a–ba ne–inaa ùt'aa iidiruta pùrã, mù Ak'õre ùt'ari bùpa teei. 20 Eperãarã omé maa–e pùrã õpee chip'edaidak'ãri mùde ijãapata k'aurepa, mù auk'a bait'ee ãchi ome.
21 Mãpai Pedropa Jesumaa iidiji:
—Tachi Waibùa, ijãapari awaraapa mùmaa ne–inaa k'achia ook'ãri, ma ooda ¿jõmasaa perdonaaipia bùma? aji. ¿Siete k'achia ooda aupai perdonaaipia bùk'ã? aji.
22 Jesupa p'anauji:
—Mùa pùmaa sietepai jara–e bù. Pùmaa setenta ne–inaa k'achia ooda juasiada siete perdonaaipia bùda aji.b
Jesupa nepùrùda rey ek'ari bùpa tewe<R>perdonaa k'inia–e badade
23 —Maperã nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Reypa ichi ek'ariirãpa p'arat'a p'aa p'anadap'edaa ak'ù k'inia baji k'awaait'ee tewe paraa p'anù wa wêe p'anù ichi ome. 24 Mãga nùde eperã aneejida. Mãgà eperãpa millón chok'ara paraa baji ma reymaa.c 25 Ma mimiaparipa p'oyaa p'aai wêe bada perã, reypa jaraji netot'aadamerã esclavok'a; chi wêra, chi warrarã ome, jõma ichi net'aa iru bù paara. Mãgá chi tewe paraa bada p'aayada aji, reypa. 26 Mamîda ma mimiapari rey k'îrapite bedabaidachi mãik'aapa chupùria iidiji: “Mù chupùria k'awaapáde aji. Choopáde aji, mù ome mùa jõma p'aait'ee perã.” 27 Mãga ûrik'ãri, reypa chupùria k'awaaji. Ma eperã tewe paraa bada perdonaaji mãik'aapa pëiji ichi temaa.
28 +Mamîda ma eperã taawaa uchiarude unuji ichi k'õp'ãyo ome. Mãgùpa ichimaa mak'ùara p'arat'a paraa–e baji. Mamîda ichia chi k'õp'ãyo otaude jita ataji mãik'aapa âyapa jâa wãk'ãri, mãgaji: “¡P'aapáde aji, mùmaa paraa bù!” 29 Mãpai chi k'õp'ãyo bedabaidachi ichi k'îrapite mãik'aapa chupùria iidiji: “Choopáde aji, mù ome. Mùa jõma p'aait'eepù.” 30 Mamîda chi apemapa ûri k'inia–e paji. Ma k'ãyaara carcelde t'ùpit'aaji p'aa jõrumaa chi tewe paraa bada. 31 Mãga unudak'ãri, apema rey ek'ari p'anadap'edaarã k'îra pia–ee p'aneejida mãik'aapa reymaa ma jõma jaranajida. 32 Mãga ûrik'ãri, ma reypa chi tewe paraa bada t'â pëiji. Pachek'ãri, reypa mãgaji: “¡T'ãri k'achia–idaa bùda! aji. ¡Pùa chupùria iidi chek'ãri mùmaa, mùa chupùria k'awaaji mãik'aapa pùa tewe paraa bada perdonaaji! 33 ¿Sãap'eda pùa auk'a oo–e pajima aji, pùchi k'õp'ãyo ome?” 34 Ma rey audú k'îrau bada perã ma mimiapari ome, carcelde t'ùpit'aaji chi tewe p'aa jõrumaa.
35 Mãpai Jesupa mãgaji:
—Mãga pùk'a ooit'ee mù Ak'õre ùt'ari bùpa ichiaba parã ome, parãpa awaraarã chupùria k'awaada–e pùrã mãik'aapa t'ãripa perdonaada–e pùrã ãrapa parãmaa ne–inaa k'achia ooda.