Ne–inaa eperãarãpa p'oyaa oodak'aa unu k'inia p'anadap'edaa
(Marcos 8.11-13; Lucas 12.54-56)
16
1 Mama p'anùde fariseorã saduceorã ome chejida Jesumaa. Iru ùmùatee k'inia p'anadap'edaa perã, iidijida ne–inaa oomerã Tachi Ak'õrepapai oopari ak'ùpimerã wãara ichi Tachi Ak'õrepa pëida.2 Mãpai Jesupa p'anauji:
—K'ewaraa parãpa jarapata: “Eu pia wãit'ee, pajã p'oree wã perã.” 3 Ichiaba tap'eweda jarapata: “Idi eu k'achia bait'ee pajã p'oree nâbairã mãik'aapa jâararara nâbairã.” Parãpa mãgá pajã ak'ù p'anùùpa eu k'achia wa eu pia k'awa p'anù pùrã, ¿sãap'eda ne–inaa nãgaweda p'asamaa bù k'awada–e p'anù? 4 Ârapemaarã t'ãri k'achia–idaa p'anù Tachi Ak'õrede ijãadak'aa perã. Iidi p'anù mùa oomerã ne–inaa eperãarãpa p'oyaa oodak'aa ãchi juadoopa. Mamîda mùa mãga oo–e pait'ee. Jîp'a Tachi Ak'õrepa ooit'eeda aji, ichia oodak'a Jonás ome.a
Mãga jarap'eda, ãchi atabëiji.
Jesupa jarada fariseorãpa oopatak'a oonaadamerã
(Marcos 8.14-21)
5 Lago k'îraik'a eere panadak'ãri, k'irãpajida pan aneeda–e padap'edaa. 6 Ma t'êepai Jesupa mãgaji ãchimaa:
—¡Ûrítù! K'îra k'awaa nipapatáatù fariseorã pan, saduceorã pan k'onaadamerã, ãchi levadura k'achia bairã.
7 Mãga ûridak'ãri, chi k'õp'ãyoorã ãchi pitapai pedee para beeji:
—¡Pan aneeda–e paji!
Mãga jarajida irua jara k'inia bada k'awada–e p'anadap'edaa perã.
8 Jesupa k'awaji ãrapa k'îsiadap'edaa. Mapa mãgaji:
—¿Sãap'eda pan wêe p'anùda a p'anùma? ¿At'ãri ijãada–e p'anùk'ã? aji. 9 ¿At'ãri k'awada–e p'anùk'ã mùa jaratee k'inia bù? ¿K'irãpada–e p'anùk'ã pan joisomaadeepa ùmùk'îraarã cinco milmaa k'opida mãik'aapa parãpa chi beeda k'oraa docede p'e atadap'edaa? 10 Maa–e pùrã ¿k'irãpada–e p'anùk'ã pan sietedeepa jedepida ùmùk'îraarã cuatro milmaa mãik'aapa parãpa chi beeda k'oraa sietede p'e atadap'edaa? 11 ¿Sãap'eda mùa jarada k'awada–e p'anùma? aji. Mùa pande pedee–e paji jarak'ãri k'onaadamerã fariseorã pan saduceorã pan ome, ãchi levadura k'achia bairã.
12 Mãpai k'awaajida Jesupa jara–e baji levadura jîp'aade, pan jîp'aa k'onaadamerã. Jara baji ijãanaadamerã fariseorãpa jarateepata saduceorãpa jarateepata ome.
Pedropa jarada Jesús Tachi Ak'õre Warra
(Marcos 8.27-30; Lucas 9.18-21)
13 Cesarea de Filipo p'uuru k'ait'a panadak'ãri, Jesupa iidiji chi k'õp'ãyoorãmaa:
—¿K'aita chi Eperã Ak'õre Truadepema a p'anùma aji, eperãarãpa?
14 P'anaujida:
—Ûk'uruurãpa jara p'anù pù Juan Bautista, piup'eda p'irabaida. Awaraarãpa jara p'anù pù Elías maa–e pùrã Jeremías maa–e pùrã awaraa Ak'õre pedee jarapari.
15 Mãpai Jesupa iidiji:
—Parãpárama, ¿mù k'aima adaima? aji.
16 Simón Pedropa p'anauji:
—Pù Cristoda aji; Tachi Ak'õrepa pëida eperãarã rey pamerã. Pù Tachi Ak'õre Waibùa ichita chok'ai bapari Warra.
17 Mãpai Jesupa mãgaji:
—¡Simón, Juanb warra, pù t'ãri o–îa bùda aji, eperã apidaapa pùmaa mãga k'awapi–e pada perã! Jîp'a mù Ak'õre ùt'ari bùpata mãga k'awapiji. 18 Mùa jara bù: Pù t'âjarapataadait'ee Pedro; jara k'inia bù “mãu”. Mãu ârù te oopatak'a pia beemerã, mãga pùk'a pùa et'ewa jarada eperãarãpa jaradak'ãri, mùchideerã p'aneedait'ee. Mãga p'aneedak'ãri, ichita chok'ai p'anapataadait'ee, piuruta pùjida. 19 Llave teepatak'a puerta ewadamerã, mãga pùk'a mùa pù k'aripait'ee eperãarã p'anapimerã Tachi Ak'õre jua ek'ari, mãgá ichideerã p'aneedamerã mãik'aapa ichi truadee wãdamerã. Na p'ek'au eujãde bù misa, pùa ne–inaa oopi–e bù pùrã ichideerãmaa, Tachi Ak'õrepa auk'a oopi–e pait'ee. Jõdee ne–inaa oopi bù ichideerãmaa, irua auk'a oopiit'ee.
20 Maap'eda Jesupa jaraji chi k'õp'ãyoorãmaa awaraarãmaa nepùrùnaadamerã ichi Cristo, Tachi Ak'õrepa pëida eperãarã rey pamerã.
Jesupa ichi peedait'eeda ada
(Marcos 8.31-33; Lucas 9.21-22)
21 Maadamãiipa Jesupa jaramaa beeji chi k'õp'ãyoorãmaa ichi wãit'ee Jerusalendee. Mama judiorã poro waibùarãpa, p'aareerã poroorãpa mãik'aapa Moisepa p'ãda jarateepataarãpa iru miapidait'ee mãik'aapa peepit'aadait'ee. Mamîda ewari õpeemaa chok'ai p'irabaiit'ee.
22 Mãga ûrik'ãri, Pedropa Jesús awara ãyaa ateeji mãik'aapa ùtrùamaa beeji:
—¡Tachi Ak'õrepa mãga k'inia–e! ¡Pùmaa mãga oopi–eda! aji.
23 Mãpai Jesús p'ùrrabaiji mãik'aapa Pedromaa mãgaji:
—¡Mù ik'aawaapa ãyaa wåji, Satanapa mãga jarapida perã! ¿Pùa mù wãpiamaata bùk'ã? Mãgara k'îsia–e bù Tachi Ak'õrepa k'îsia bùk'a. Jîp'a k'îsiamaa bùda aji, eperãarãpa k'îsiapatak'a.
Sãga nipapataadai Jesús ome
(Marcos 8.34—9.1; Lucas 9.23-27)
24 Maap'eda, Jesupa mãgaji chi k'õp'ãyoorãmaa:
—Eperã mù ome nipa k'inia bù pùrã, k'îsiaik'araa bù ichia ne–inaa oo k'inia bùdepai. Ichi kuruso ãp'aipia bù eperã peenadait'eek'a. Pia jarait'eera, ooipia bù mùa oopi bùk'a, ma k'aurepa miapiruta pùjida piurumaa. 25 Eperã piuamaa bù pùrã mùde ijãapari k'aurepa, mãgà piuk'ãri, atuait'ee. Mamîda eperã mùde ijãapari k'aurepa piuru pùrã, ùt'aa wãit'ee ichi piuk'ãri. 26 ¿K'ãare piata baima eperãpa na p'ek'au eujãde nâbù jõmaweda ataru pùrã, mamîda piup'eda chok'ai p'irabai–e pùrã Ak'õre eujãde? Maa–e pùrã, ¿k'ãata teeima Tachi Ak'õremaa ùt'aa wãpimerã? 27 Mù, chi Eperã Ak'õre Truadepemapa mù Ak'õre k'îra wãree unupiit'ee, ùt'ariipa chek'ãri iru angeleerã ome. Maapaita ak'ùit'ee na p'ek'au eujãdepemaarãpa oopata mãik'aapa jarait'ee pia wa k'achia. Ne–inaa pia ooit'ee chi ne–inaa pia oodap'edaarãmaa. Jõdee k'achiadee pëiit'ee chi ne–inaa k'achia oopatap'edaarã. 28 Mùa wãarata jararu. Nama p'anùùrã ûk'uru piudai naaweda, unudait'ee mù, chi Eperã Ak'õre Truadepema, reyk'a pacheru.