Judiorãpa ãchi k'îsiadoopa jarateedap'edaa
(Marcos 7.1-13)
15
1 Maapai ûk'uru fariseorã mãik'aapa Moisepa p'ãda jarateepataarã pachejida Jerusalendeepa. Jesumaa iidijida:2 —¿Sãap'eda pù k'õp'ãyoorãpa ooda–e p'anùma ajida, tachi chonaarãpa chonaarãweda oopatap'edaak'a? ¿Sãap'eda nek'odai naaweda, ãchi jua sùùdak'aama ajida, tachi chonaarãpa jarateedap'edaak'a?
3 P'anaui k'ãyaara, Jesupa iidiji:
—¿Sãap'eda parãpa oodak'aama aji, Tachi Ak'õrepa jara bùk'a? Ma k'ãyaara chonaarãweda oopatap'edaak'a oo k'inia p'anapata. 4 Tachi Ak'õrepa jaraji:
‘Pùchi ak'õre mãik'aapa pùchi nawe k'inia iru baparíiji mãik'aapa ãra pedee ûriparíiji.’ (Éxodo 20.12)
Ma awara jaraji:
‘Warrapa ik'achia jararu pùrã ichi ak'õremaa wa ichi nawemaa, peet'aadaipia bù.’ (Éxodo 21.17)
5 Mamîda parãpa jarateepata eperãpa jarai chi ak'õremaa wa chi nawemaa: “Pù p'oyaa k'aripa–epù, jõma mùa iru bù primiciak'a teeda perã Tachi Ak'õremaa.” 6 Eperãpa mãga jarak'ãri, pia bùda apata, chi ak'õreerã k'aripanaamerã. Mamîda parãpa mãga jarateedak'ãri, jarateemaa p'anù piara bù oodait'ee pãchia jarapatak'a, Tachi Ak'õre Ûraa p'ãdade jara bùk'a oodai k'ãyaara. ¡Tachi Ak'õre Ûraa yiaraa iru p'anù! 7 ¡Seewata Tachi Ak'õrede ijãapataarãda apata! Chonaarãweda Ak'õre pedee jarapari Isaiapa parã ãpùte wãara pedee baji jarak'ãri:
8 ‘Na eperãarãpa mù k'inia iru p'anùda apata it'aipa. Mamîda ãchi t'ãripa wãara mù k'iniada–e p'anù. 9 Páripù mù k'îrapite ùt'aa t'âpata, oo k'inia p'anapata perã eperãarãpa jara p'anùk'a, mùa jara bùk'a oodai k'ãyaara.’ (Isaías 29.13)
Ne–inaa tachi k'achia beepipari Ak'õre k'îrapite
(Marcos 7.14-23)
10 Maap'eda, Jesupa eperãarã t'â p'e ataji mãik'aapa mãgaji:
—Ûrítù k'awaadamerã mùa jararu. 11 Chik'o k'odak'ãri, tachi k'ap'ùade edú banapari. Ma chik'o k'odap'edaa k'aurepa tachi k'achia p'aneedak'aa Tachi Ak'õre k'îrapite. Ma k'ãyaara, ne–inaa eperã t'ãrideepa uchiarúpata, k'achia beepiparida aji.
12 Mãpai chi k'õp'ãyoorã Jesús k'ait'a chedap'eda, iidijida:
—¿K'awa–e bùk'ã ajida, fariseorãpa ma pedee ûridak'ãri, k'îrau p'aneedap'edaa?
13 Jesupa p'anauji:
—Mù Ak'õre ùt'ari bùpa pak'uru jau–e pada êt'ak'oodait'eeda aji, chi k'arra paara. 14 Ichiak'au bàtù ma tau p'ãriu pùk'a beerãpa awaraa tau p'ãriu pùk'a beerã jarateedamerã. Tau p'ãriu bùpa awaraa tau p'ãriu bùmaa o jarateeru pùrã, omeeweda uriade baainadait'eeda aji.
15 Mãpai Pedropa Jesumaa mãgaji:
—Pùa nepùrùda eperãarãmaa taimaa jarateepáde aji.
16 Jesupa p'anauji:
—¿Parãpa pida k'awada–ek'ã aji, k'ãata jara k'inia bù? 17 Ne–inaa jõmaweda t'îuru eperã it'aide bide banapari, maap'eda uchiapari. 18 Mamîda pedee k'achia it'aideepa uchiaru iru t'ãrideepa uchiada. Mápata eperã k'achia beepipari Tachi Ak'õre k'îrapite. 19 Eperã t'ãrideepa nãgee k'îsia k'achia uchiaparida aji: chîara peeit'ee; miak'ãi bù awaraarã ome k'ãiit'ee; p'ek'au ooit'ee awaraarã ome; nechùait'ee; seewa jarait'ee; ik'achia jarait'ee; jãgee k'îsia. 20 Mãgee k'îsia k'aurépata eperã k'achia beepipari Tachi Ak'õre k'îrapite. Mamîda nek'oit'ee jua sùù–ee chonaarãweda tachi chonaarãpa oopatap'edaak'a apidaamaa k'achia beepik'aa.
Wêra judio–ee bùpa Jesude ijãada
(Marcos 7.24-30)
21 Mamãik'aapa Jesús wãji Tiro p'uuru mãik'aapa Sidón p'uuru k'ait'a bùmaa. 22 Canaán eujãdepema wêraa bapachi ma eujãde. Mãgùpa Jesús unuk'ãri, irumaa chupùria iidi cheji:
—Tachi Waibùa, Rey David Warra, ¡mù chupùria k'awáaji! ¡Mù k'au k'ap'ùade netuara merãtùa bùda! aji.
23 Mamîda Jesupa p'anau–e paji. Mãpai chi k'õp'ãyoorã k'ait'aara chedap'eda, Jesumaa mãgajida:
—Jarapáde ajida, jã wêramaa ãyaa wãmerã, tachi t'êe bia cheru perã.
24 Mãpai Jesupa mãgaji:
—Tachi Ak'õrepa mù pëijida aji, k'aripamerã israelitaarã, ovejaarã atua p'anùk'a p'anadairã.
25 Mamîda ma wêra bedabai nâbanaji Jesús k'îrapite mãik'aapa mãgaji:
—Tachi Waibùa, ¡mù k'aripáji!
26 Mãpai Jesupa p'anauji:
—Pia–e bù warrarã chik'o jãri atait'ee mãik'aapa usaarãmaa tee baibùit'ee. Naapùara judiorãmaa ita–aria chupùria iidipipáde aji.
27 Ma wêrapa mãgaji:
—Wãarapù, Tachi Waibùa. Mamîda usaarãpa paara k'opata chipari mesadeepa baaida juajãra. Mapa, mù judio–e mîda, pùmaa chupùria iidi bùda aji.
28 Mãpai Jesupa mãgaji:
—Wêra, ¡pùa wãara ijãa bùda! aji. Oojida aji, pùchia k'inia badak'a.
Aramata ma wêrapa k'au iru bada jùpa beeji.
Jesupa k'ayaa beerã chok'ara jùpada
29 Jesús mamãik'aapa uchiak'ãri, wãji Galilea Lago idee. Mama bùde ee nok'odee wãji mãik'aapa su–ak'ù beeji. 30 Eperãarã seedachida irumãi. Aneepachida bùùrù chiwa beerã; tau p'ãriu beerã; jua k'achia beerã; pedee atua beerã; awaraa k'ayaa beerã ome. Ma jõmaweda Jesús bùùrùmãi bù chepachida. Mãpai ichia jùpak'ooji. 31 Eperãarã ak'ùtrua para beeji unudak'ãri pedee atua p'anadap'edaarã pedee jîwaa para bee; jua k'achia beeda jùpa bee; bùùrù chiwa beeda ãchi bùùrùpa nîutee; tau p'ãriu p'anadap'edaarã unu bee. Ma jõma unudak'ãri, o–îa ùt'aa t'â p'aneejida israelitaarã Ak'õre Waibùamaa.b
Jesupa eperãarã cuatro mil nek'opida
(Marcos 8.1-10)
32 Jesupa chi k'õp'ãyoorã t'â p'eji mãik'aapa mãgaji:
—Mùa na eperãarã chupùria k'awaa bùda aji, k'ãima õpee p'anadairã nama mù ome nek'oda–ee. Ãyaa pëi k'inia–e bùda aji, ewaa ode wãdade k'ap'ùa t'ûmaadaridai jîak'aapa.
33 Mãpai chi k'õp'ãyoorãpa mãgajida:
—Mamîda ¿sãma taipa unudayama ajida, chik'o na eperãarã chok'ara–it'ee, nama eperãarã wê–e perã taimaa chik'o neto pëidamerã?
34 Jesupa ãchimaa iidiji:
—¿Pan jõmasaa iru p'anùma? aji.
P'anaujida:
—Iru p'anùda ajida, pan siete, chik'o chok'ara–ee.
35 Mãpai Jesupa eperãarãmaa jaraji eujãde su–ak'ù p'aneedamerã. 36 Maap'eda ma pan siete chik'o ome juade ataji mãik'aapa ùt'aa t'âji gracias jarait'ee Tachi Ak'õremaa. Ma pan k'õrak'ook'ãri, chok'ara eepadachi. Mãpai chi k'õp'ãyoorãpa eperãarãmaa jedenajida. 37 Jõmaarãpa k'ojida bi jãwaadarutamaa. Ma pan pite chik'o ome nâbeeda p'ejida k'oraa siete. 38 Chi nek'odap'edaarã ùmùk'îraarã cuatro mil paji; wêraarã, warrarã juasiada–ee. 39 Maap'eda Jesupa eperãarã pëiji ãchi temaa mãik'aapa barcode bataup'eda, wãji Magadán eujãdee.