Juan Bautista piuda
(Marcos 6.14-29; Lucas 9.7-9)
14
1 Maapai Galilea eujãdepema poro waibùa t'âjarapachida Herodes.a Ichia ûrik'ãri Jesupa oo bù, 2 ichi ek'ariirãmaa mãgaji:—¿Mãgà Juan Bautista–epaa, piup'eda p'irabaida? Maperãpù oopari ne–inaa eperãarãpa p'oyaa oodak'aa ãchi juadoopa.
3 Aù naaweda Herodepa Juan jâ atapiji mãik'aapa carcelde t'ùpit'aaji. Mãga ooji chi âpema Filipo wêra Herodías k'aurepa. 4 Aù naaweda Juanpa Herodemaa mãgaji: “Pùa p'ek'au k'achia oomaa bùda aji, pù âpema wêra iru bairã pùchi wêrak'a.”
5 Mãga ûrik'ãri, Herodepa Juan pee k'inia bapachi. Mamîda mãga oo–e paji eperãarã waawee bada perã. Jõmaarãpa ijãajida Juan Tachi Ak'õre pedee jarapari paji.
6 Mamîda ewari aba Herodepa jara pëiji eperãarã chedamerã ichi t'oda fiesta oode. Ma fiesta o–îa oo jõnù misa, Herodías k'au pëirade cheji see nâbadaarã taide. Mãga unuk'ãri, Herodes audupùara o–îadachi. 7 Maperã jaraji ma awêramaa:
—Tachi Ak'õre k'îrapite mùa juraa bù teeit'ee pùchia iidiruta.
8 Mãpai chi nawepa jaradak'a jaraji:
—Âraweda Juan Bautista poro mù–it'ee p'arat'ude teepáde aji.
9 Mãga ûrik'ãri, Rey Herodes k'îra pia–eedachi. Mamîda Tachi Ak'õre k'îrapite mãik'aapa jõmaweda arii p'anadap'edaarã k'îrapite juraada perã, 10 jaraji chi ek'ariirãmaa Juan poro t'ùap'e atanadamerã carcelde. 11 Mãga oojida. Ma awêra nawepa jaradak'a aneejida p'arat'ude mãik'aapa teejida ma awêramaa. Mãpai ichia teenaji chi nawemaa.
12 Juan k'õp'ãyoorãpa ûri atadak'ãri iru peedap'edaa, chejida iru k'ap'ùa ùanadait'ee. Maap'eda jaranajida Jesumaa.
Jesupa eperãarã cinco mil nek'opida
(Marcos 6.30-44; Lucas 9.10-17; Juan 6.1-14)
13 Jesupa Juan piuda ûrik'ãri, barcode t'ùmà wãji eperãarã mak'ùara wêemaa. Mamîda eperãarãpa k'awaadak'ãri, t'êe wãjida ode. 14 Jesús barcodeepa batauk'ãri, eperãarã chok'ara unuji. Mapa ãra chupùria k'awaaji mãik'aapa ode wãdap'edaarãpa k'ayaa beerã ateedap'edaa jùpak'ooji. 15 K'eu wãda perã chi k'õp'ãyoorã ichi k'ait'a chedap'eda, mãgajida:
—K'eu wãpù; nama te wê–epù. Mapa eperãarã pëipáde ajida, p'uuru beemaa chik'o netonadamerã.
16 Jesupa p'anauji:
—Ãra ãyaa wãdaik'araa bù. Parãpa chik'o téetù k'odamerã.
17 Mãpai mãgajida:
—Mamîda taipa iru p'anùda ajida, pan joisomaa mãik'aapa chik'o omé; mãgà aupai.
18 Jesupa p'anauji:
—Mùmaa aneedapáde aji.
19 Mãpai Jesupa jaraji eperãarã su–ak'ù p'aneedamerã eujãde p'ûajara ârù. Maap'eda jita ataji ma pan joisomaa chik'o omé ome mãik'aapa ùt'aa ak'ùp'eda, gracias jaraji Tachi Ak'õremaa. Ma pan k'õrak'ook'ãri, chok'ara eepadachi. Mãpai chi k'õp'ãyoorãpa eperãarãmaa jedenajida. 20 Jõmaweda nek'ojida bi jãwaa p'aneerutamaa. Ma pan pite chik'o ome nâbeeda p'ejida k'oraa docena aba. 21 Chi nek'odap'edaarã ùmùk'îraarã cinco mil paji, wêraarã, warrarã juasiada–ee.
Jesús pania ârù t'ùa nipada
(Marcos 6.45-52; Juan 6.16-21)
22 Ma t'êepai Jesupa chi k'õp'ãyoorã barcode bataupiji ichi naa lago sîadamerã. Mãga ooji ãra k'îraik'a eere panadamerã, ichia eperãarã pëiru misa ãchi temaa. 23 Eperãarã erreuk'oodaidak'ãri, Jesús ituaba wãji ee nok'odee ùt'aa t'âde. Mama bùde k'eudachi. 24 Mãùmisa chi barcode wãdap'edaarã tok'esá panadak'ãri, p'usara nâbeeji, ãchimaa nãu p'ua nâbada perã. 25 Taujaaweda Jesús chi k'õp'ãyoorãmaa t'ùa wã nipaji pania ârù. 26 Chi k'õp'ãyoorãpa mãga unudak'ãri, p'eradachida mãik'aapa ãchobeepa biajida:
—¡Netuarada! ajida.
27 Mãpai Jesupa mãgaji:
—¡P'eranáatù! ¡Mùda! aji.
28 Mãpai Pedropa mãgaji:
—Tachi Waibùa, wãara pù pùrã, pùmaa mù wãpipáde aji, pania ârù.
29 Jesupa:
—Chepáde, aji.
Mãpai Pedro toida bataup'eda, t'ùa wãji pania ârù Jesumaa. 30 Mamîda nãu audú p'ua nâbù unuk'ãri, ãchobeedachi mãik'aapa pirubaai wãji. Mãpai biaji:
—Tachi Waibùa, ¡mù k'aripáji!
31 Aramata Jesupa juade jita ataji mãik'aapa mãgaji:
—¿At'ãri pùa ijãa–e bùk'ã? aji. ¿Sãap'eda pia ijãa–e bùma? aji.
32 Barcode bataudak'ãri, nãu p'ua–edachi mãik'aapa p'usa t'umãtùdachi. 33 Mãpai ma barcode nipadap'edaarã Jesús k'îrapite bedabaik'oodachida mãik'aapa mãgajida:
—¡Wãarada ajida, pù Tachi Ak'õre Warra!
Jesupa k'ayaa beerã chok'ara jùpada Genesaret eujãde
(Marcos 6.53-56)
34 Mata panajida lago k'îraik'a eere mãik'aapa wiibainajida Genesaret eujãde. 35 Ariipemaarãpa Jesús pacheru k'awaadak'ãri, ma eujãdepema jõmaarãmaa jara pëijida. Mapa k'ayaa beerã ateepachida irumaa 36 mãik'aapa chupùria iidipachida ichi p'aru ide pùjida t'õbaipimerã. Mãgá chi t'õbaidap'edaarã jùpa p'aneejida.