Net'a tau p'oparide nepùrùda
(Marcos 4.1-9; Lucas 8.4-8)
13
1 Ma ewate Jesús uchiaji temãiipa mãik'aapa lago ide su–ak'ù banaji. 2 Eperãarã chedap'edaa irumãi see nâbada perã, Jesús barcode bataudachi mãik'aapa su–ak'ù beeji. Jõdee eperãarã ipude para beeji. 3 Mãpai Jesupa eperãarãmaa nepùrùmaa beeji Ak'õre Ûraa jarateeit'ee:—Eperã wãji net'a tau p'ode. 4 Ma p'o wãk'ãri, ûk'uru baaijida o jãde. Mãpai ipanaarãpa k'ok'oo chejida. 5 Ûk'uru baaijida mãu–idaade, mak'ùara yooro wêe badamãi. Mãgà isapai t'onojida, mak'ùara yooro wêe bada perã. 6 Mamîda ak'õrejîru jêrak'ãri, pùùdachi chi k'arra ârùù bada perã. 7 Ûk'uru baaijida ne–ùùrù–idaade. Mamîda ne–ùùrù k'ap'ip'iara waripari perã, mãgà net'a tau t'ono wãdap'edaa piuk'oodachida. 8 Jõdee awaraa net'a tau baaijida eujã piade. Mãgà t'onop'eda, chau nâbeeji. Ûk'uru net'a tau abaadeepa uchiajida cien, sesenta maa–e pùrã treinta. 9 Pia k'îsíatù parãpa et'ewa ûridap'edaade k'awaadamerã k'ãata jara k'inia bù.
Sãap'eda Jesupa nepùrùpachi jarateeit'ee
(Marcos 4.10-12; Lucas 8.9-10)
10 Maap'eda chi k'õp'ãyoorã k'ait'aara chejida mãik'aapa iidijida:
—¿K'ãare–it'ee nepùrùparima ajida, jarateeit'ee?
11 Jesupa p'anauji:
—Tachi Ak'õrepa parãmaa k'awapimaa bùda aji, ne–inaa naaweda k'awapik'aa pada awaraarãmaa; sãga ichideerã p'aneedai. 12 Parã Ak'õre ûraa pia k'awa beerãmaa waapùara k'awapiit'ee; awaraarã k'ãyaara ne–inaa chok'araara k'awarutamaa. Mamîda chi ne–inaa mak'ùara k'awa–ee beerãmaa, ãchia k'awa p'anù paara irua wêpapiit'ee, waa k'awa k'iniada–e p'anadairã. 13 Maperãpù mùa nepùrùpari. Ãchia ak'ù p'anù mîda, wãara unuda–e. Ûri p'anù mîda, k'awada–e. 14 Ãrapa oomaa p'anù Tachi Ak'õre pedee jarapari Isaiapa jaradak'a:
‘Ûri p'anù mîda, k'awada–e. Ak'ù p'anù mîda, unuda–e. 15 Na eperãarã k'ùùrù k'isua p'anadairã, mùa jara bù ûridaamaa p'anù; mùa oo bù unudaamaa p'anù mãik'aapa k'awadaamaa p'anù. Mãga p'anada–e pada paara, mùde ijãak'ajida mãik'aapa mùa ãchia p'ek'au k'achia oopata wêpapik'aji.’ (Isaías 6.9-10)
16 +Parã t'ãri o–îa p'anù mùa oo bù unu p'anadairã mãik'aapa mùa jara bù ûri p'anadairã. 17 Mùa wãarata jararu. Chonaarãweda Ak'õre pedee jarapataarãpa mãik'aapa Tachi Ak'õrede ijãapataarãpa unu k'inia p'anajida parãpa unu p'anù. Mamîda unuda–e paji. Ichiaba ûri k'inia p'anajida parãpa nama ûri p'anù. Mamîda ûrida–e paji.
Jesupa k'awapida net'a tau p'oparide
(Marcos 4.13-20; Lucas 8.11-15)
18 —Ûrítù k'awaadamerã mùa nepùrùda net'a tau p'oparide k'ãata jara k'inia bù. 19 Net'a tau ode baaida jara k'inia bù chi ûri p'anùùrã Tachi Ak'õrepa eperãarã bù k'inia bù ichi jua ek'ari ichideerã p'aneedamerã. Mamîda mãgùùrãpa k'awada–e k'ãata jara k'inia bù. Ipanaarã chedap'edaak'a ma net'a tau k'ok'oodait'ee, mãga pùk'a Netuara Poro Waibùa chepari ne–inaa ooit'ee, t'ãripa ma pedee ijãanaadamerã. 20 Jõdee chi net'a tau mãu–idaade baaidap'edaa jara k'inia bù eperãarãpa ma jara pëida o–îa ûri p'anù. 21 Mamîda chi mãu–idaade t'onoda taarã–eweda pùùdaiparik'a, mãga pùk'a mãgùùrãpa ma jara pëida taarã–epai ijãapata. Ma ûraade ijãadap'edaa k'aurepa nepùrade baairuta pùrã maa–e pùrã awaraarãpa ãchi jùrùruta pùrã miapidait'ee, ijãa amaapata. 22 Jõdee chi net'a tau ne–ùùrù–idaade baaidap'edaa jara k'inia bù eperãarãpa ma jara pëida pia ûri p'anù. Mamîda audupùara k'îsiapata ne–inaa netodait'ee maa–e pùrã p'arat'a waibùa atadait'ee, ãchia ûridap'edaa k'îra atuadarutamaa. Mãgá p'aneepata ne–uu warip'eda, chauk'aa bùk'a. 23 Mamîda chi net'a tau eujã piade baaidap'edaa jara k'inia bù eperãarãpa ma jara pëida ûridap'eda, k'awaa wãpata ma ûraa jara k'inia bù mãik'aapa t'ãride wãara ijãapata. Net'a tau aba p'oda eujã piade pia t'onop'eda, chauparik'a net'a tau cien, sesenta wa treinta; mãga pùk'a ma eperãarãpa oo k'awaa wãpata ma ûraade jara bùk'a.
Jesupa nepùrùda p'ûajara t'onoda trigo p'odade
24 Mãpai Jesupa awaraa nepùrùji jarateeit'ee:
—Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Eperãpa trigo tau pia p'oji ichi eujãde. 25 Mamîda p'ãrik'ua, eperãarã k'ãi p'anù misa, ichi k'îra unuamaa iru bùpa cheji mãik'aapa ma trigo p'odade merã p'oji p'ûajara tau chak'eerã, aùdee neera k'achia oopata. Mãpai jirabodoji. 26 Maap'eda ma eperãpa trigo p'oda t'onop'eda, wari wãji ma p'ûajara ome. 27 Mãga unudak'ãri, ma eujã chipari mimiapataarãpa irumaa jaranajida: “Señor, pùa trigo tau p'oda pia badata, ¿sãmãik'aapa uchiajima ajida, jãgee p'ûajara?” 28 Chiparipa p'anauji: “¿Tachi k'îra unuamaa iru bàpata jãga ooji–ek'ã?” aji. Mãpai chi mimiapataarãpa iidijida: “¿Pùa k'inia bùk'ã ajida, taipa jã p'ûajara êt'anadamerã?” 29 Mamîda chiparipa mãgaji: “Nãgaweda ichiak'au bùdapáde aji. Âraweda parãpa jã p'ûajara êt'at'aarutara, auk'a êt'adariit'ee chi trigo k'arra, aù ik'aawa nâbù. 30 Piara bù ichiak'au bùdamerã trigo ewarutamaa. Mamãik'áapata mùa ewapataarã naapùara pëiit'ee jã p'ûajara êt'ak'oodamerã mãik'aapa p'edamerã k'õrajâmade paat'aadait'ee. T'êepai trigo ewadak'ãri, ùadait'ee mù ne–inaa ùaparide.”
Mostaza taude nepùrùda
(Marcos 4.30-32; Lucas 13.18-19)
31 Jesupa ichiaba awaraa nepùrùji jarateeit'ee:
—Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Eperãpa mostaza tau uuji ichi eujãde. 32 Chi tau ma–ãriara bù awaraa net'a tau tachia uupata k'ãyaara. Mamîda warik'ãri, waibùara waripari awaraa ne–uu k'ãyaara pak'uruk'a nâbeerumaa. Mãgá waibùara waripari perã, chi jua t'aide ipanaarã chepata âidait'ee.
Levadurade nepùrùda
(Lucas 13.20-21)
33 Ichiaba Jesupa nãga nepùrùji jarateeit'ee:
—Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Wêrapa levadura p'oiraparik'a bù harina waibùa ome, pan masa pia warimerã.
Jesupa nepùrùda chonaarãweda eperãarãpa jaradap'edaak'a
(Marcos 4.33-34)
34 Jesús jarateek'ãri, audú nepùrùpachi. Nepùrù–ee jarateek'aa paji. 35 Mãga ooji uchiamerã Tachi Ak'õre chonaarãwedapema pedee jaraparipa irudé jaradak'a:
‘Jarateek'ãri, mùa nepùrùit'ee mãik'aapa jarait'ee ne–inaa Tachi Ak'õrepa waide k'awapi–e pada na p'ek'au eujã ooruwedapema.’ (Salmos 78.2)
Jesupa k'awapida p'ûajara tau p'oda trigo k'ãide
36 Ma jõma nepùrùp'eda, Jesupa eperãarã bëiji mãik'aapa t'îuji chi k'õp'ãyoorã p'anadap'edaamãi. Mãpai ãchi iru k'ait'a chedak'ãri, iidijida k'ãata jara k'inia bù ma nepùrùda p'ûajara tau p'oda trigo k'ãide. 37 Jesupa p'anauji:
—Chi eperã net'a tau pia p'oda jara k'inia bù Eperã Ak'õre Truadepema. 38 Ma net'a tau p'oda eujã jara k'inia bù na p'ek'au eujã. Ma trigo tau pia jara k'inia bù Tachi Ak'õrede ijãapataarã. Jõdee p'ûajara k'achia jara k'inia bù Netuara Poro Waibùa jua ek'ari p'anùùrã. 39 Ma k'îra unuamaa iru bada, chi ma p'ûajara k'achia p'oda jara k'inia bù Netuara Poro Waibùa. Ma ne–inaa p'oda ewadap'edaa ewate jara k'inia bù Tachi Ak'õre ewari waibùa ewate, ichi angeleerãpa eperãarã p'e ateedak'ãri iru k'îrapite. 40 Mùa nepùrùdade ma p'ûajara k'achia p'edap'edaak'a paat'aadait'ee, mãga pùk'a oodait'ee na p'ek'au eujã jõt'aak'ãri. 41 Mù, chi Eperã Ak'õre Truadepemapa angeleerã pëiit'ee mù jua ek'ari p'anùùrã t'ãide k'achia beerã jõmaweda p'ede; chi awaraarãmaa p'ek'au k'achia oopidap'edaarã, awaraa ne–inaa k'achia ooi awaa p'anapatap'edaarã ome. 42 Ma k'achia beerã jõmaweda bat'ak'oodait'ee t'ùpùtau jêrajêraa jira bùde. Mama jêe para bait'ee mãik'aapa k'ida kierrkierree para bait'ee p'uapa. 43 Jõdee Tachi Ak'õrepa jara bùk'a oopataarã urua pùk'a para beeit'ee ak'õrejîruk'a, ùt'ari p'anù perã ãchi ak'õre waibùa ome. Pia k'îsíatù parãpa et'ewa ûridap'edaade k'awaadamerã k'ãata jara k'inia bù.
Jesupa nêe waibùa unu atadade nepùrùda
44 —Nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Chok'o unuji jau bù nêe ome. Eperãpa mãgà unu atak'ãri, waya merã nâbùp'eda chi badamãi, t'ãri o–îa wãji jõmaweda ichi net'aa iru bada netok'oode. Mãpai ãpùtee cheji ma nêe merã bada eujã neto atade.
Jesupa perla unudade nepùrùda
45 —Ichiaba nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. Net'aa netoparipa perla jùrù nipaji. 46 Perla âpùa unu atanak'ãri, wãji ichi net'aa jõmaweda netok'oode mãik'aapa ma perla pi–ia neto ata cheji.
Jesupa t'ùrùde nepùrùda
47 —Ichiaba nãga pùk'a pait'ee Tachi Ak'õrepa eperãarã ichi jua ek'ari bùk'ãri, ichideerã p'aneedamerã. To–ùapataarãpa t'ùrù t'aadak'ãri, chik'o k'îra t'ãdoo peejida. 48 Ma t'ùrùde chik'oradaik'ãri, chipariirãpa jidiu atajida ipudee mãik'aapa jùrùt'eramaa p'aneejida chik'o piara bee awara p'edait'ee k'oraade. Jõdee chik'o k'achia bee bat'ak'oojida toidaa. 49 Mãga pùk'a pait'ee na p'ek'au eujã jõk'ãri. Angeleerã chedak'ãri, jùrùt'era chedait'ee eperã pia beerã awara p'edait'ee. 50 Jõdee chi k'achia beerã t'ùpùtau jêrajêraa jira bùde bat'ak'oodait'ee, mama jêe para bamerã mãik'aapa k'ida kierrkierree para bamerã p'uapa.
Ne–inaa chiwidi mãik'aapa ne–inaa sorede nepùrùda
51 Mãpai Jesupa chi k'õp'ãyoorãmaa iidiji:
—¿Parãpa ma nepùrùda jõmaweda k'awajidak'ã? aji.
Mãpai p'anaujida:
—K'awajidapù.
52 Mãpai Jesupa mãgaji:
—Moisepa p'ãda jarateeparipa k'awaa wãk'ãri Tachi Ak'õrepa eperãarã bùit'ee ichi jua ek'ari, ichideerã p'aneedamerã, nãga pùk'a bù. Eperã te chiparipa ichi net'aa ùa p'e iru bùdepema net'aa atak'ãri, k'awa bù chisãgà net'aa chiwidi, chisãgà net'aa sore.
Jesús Nazaret p'uurudee wãda
(Marcos 6.1-6; Lucas 4.16-30)
53 Jesupa ma nepùrùda jaratee aupak'ãri, mamãik'aapa wãji 54 ichi warida p'uurudee. Mama jarateemaa beeji mãpema Ak'õre Ûraa jarateepata tede. Irua jaratee bù ûridak'ãri, eperãarã ak'ùtrua para beeji mãik'aapa mãgapachida:
—¿Sãma k'awaajima ajida, na jõma irua jarateemaa bù? ¿Sãga ooparima ne–inaa eperãarãpa p'oyaa oodak'aa ãchi juadoopa? 55 ¿Jãgà eperã ne–inaa pak'urudee oopari warra–ek'ã? ¿Chi nawe Maria–ek'ã? ¿Santiago, José, Simón, Judas chi âpemaarã–ek'ã? 56 ¿Chi âpewêraarã nama p'anapata–ek'ã? ¿Sãga k'awaajima ajida, na jõma ichia oo bù?
57 Ma eperãarãpa Jesús ichi te pidaarã ome mãgá k'awadap'edaa perã, iru pedee ûri k'iniada–e paji.
Mapa Jesupa mãgaji:
—Jõmaarã t'ãide ûri k'inia p'anapata Tachi Ak'õre pedee jaraparipa jara bù. Mamîda ichi p'uurudepemaarã ichi tedepemaarã ome iru pedee ûridaamaa p'anapata.
58 Mãgá mãpemaarãpa irude ijãada–e p'anadap'edaa perã, mama Jesupa mak'ùara oo–e paji ne–inaa eperãarãpa p'oyaa oodak'aa ãchi juadoopa.