Âipata ewate trigo k'ùmù chak'eerã p'edap'edaa
(Marcos 2.23-28; Lucas 6.1-5)
12
1 Maapai judiorã âipata ewate Jesús nipaji trigo k'ãide. Chi k'õp'ãyoorã jarrapisia p'anadap'edaa perã, trigo k'ùmù chak'eerã oro atadap'eda, chi tau jonamaa p'aneejida k'odait'ee. 2 Arii p'anadap'edaa fariseorãpa mãga unudak'ãri, Jesumaa mãgajida:—¡Pùchá ak'àji! Pùchi k'õp'ãyoorãpa ne–inaa oomaa p'anùda ajida, âipata ewate oodaik'araa bùta.
3 Jesupa p'anauji:
—¿Parãpa Ak'õre Ûraa p'ãdade leeda–e p'anùk'ã aji, Rey Davidpa ooda chonaarãweda jarrapisiadaidak'ãri chi k'õp'ãyoorã ome? 4 Iru t'îuji Tachi Ak'õre te ne–edee oodade mãik'aapa ma tedepema pan awara bùdap'edaa Tachi Ak'õre–it'ee atap'eda, k'oji chi k'õp'ãyoorã ome. Mãga oojida p'aareerãpapai mãgà pan k'odaipia baji mîda. 5 Ichiaba Moisepa p'ãdade parãpa leedooda p'aareerãpa ne–inaa k'achia ooda–e paji âipata ewate, Tachi Ak'õre tede âida–ee mimiadak'ãri. 6 Mùa jara bù: Nama ne–inaa pipùara paraa Tachi Ak'õre te k'ãyaara. 7 Wãara parãpa k'awada–e na p'ãdade jara k'inia bù:
‘Mùa k'inia bù awaraarã chupùria k'awaadamerã, mù–it'ee ne–animalaarã peedap'eda, paadai k'ãyaara.’ (Oseas 6.6)
Parãpa k'awadap'edaa paara ma pedee jara k'inia bù, ne–inaa k'achia ooda–e p'anùùrã peepida–e pak'aji. 8 Âipata ewate mù, chi Eperã Ak'õre Truadepema jua ek'ari bùda aji.
Eperã jua chiwa bada
(Marcos 3.1-6; Lucas 6.6-11)
9 Mamãik'aapa Jesús wãji Tachi Ak'õre Ûraa jarateepata tedee. 10 Mama baji eperã jua chiwa bù. Jesús ùmùatee k'inia p'anadap'edaarãpa iidijida irumaa:
—¿Eperã k'ayaa bù pùrã, âipata ewate jùpaipia bùk'ã? ajida.
11 Jesupa p'anauji:
—Âipata ewate pùchi oveja toidú padarida paara, ¿taawaa uchia ata–e pak'ajik'ã? 12 ¿Eperã pipùara bù–ek'ã oveja k'ãyaara? Mapa âipata ewate ne–inaa pia ooipia bùda aji.
13 Mãpai Jesupa ma jua chiwa bùmaa mãgaji:
—Pùchi jua jîrupáde aji.
Mãpai jua jîruji. Aramata jùpa beeji chi apema juak'a. 14 Mãpai fariseorã taawaa uchiadak'ãri, pedeeteemaa p'aneejida Jesús peepit'aadait'ee.
Jesupa ooda Ak'õre Ûraa p'ãdade jara bùk'a
15 Jesupa mãùrã k'îsia k'awaak'ãri, mamãik'aapa wãji. Eperãarã chok'ara iru t'êe wãjida. Jesupa madepema k'ayaa beerã jõmaweda jùpaji. 16 Mamîda jarapachi ichia ooda jõmaarãmaa nepùrùnaadamerã. 17 Mãga jaraji Tachi Ak'õre pedee jarapari, Isaiapa p'ãdade jara bùk'a uchiamerã:
18 ‘Nama bù mù mimiapari, mùa jùrùt'erada. Mùa iru k'inia iru bù; mù t'ãri o–îapipari. Mù Jaure iru ome bapariit'ee. Mù k'ap'ùa pari irua eperãarã jõmaarãpa oopata ak'ùit'ee mãik'aapa jarait'ee pia wa k'achia. 19 Aupedee–e pait'ee; ichiaba bia–e pait'ee. Apidaapa iru biapi ûrida–e pait'ee calle jãde. 20 Irua yiaraa iru ba–e pait'ee chupùria chitoonùùrã wa k'îra pia–ee jõnùùrã. Mãga bait'ee Tachi Ak'õrepa jõmaarãmaa wãarata jara pëida k'awaapirumaa. 21 Mãga pak'ãri, jõmaarãpa irude ijãadait'ee.’ (Isaías 42.1-4)
Jesús Netuara Poro Waibùa jua ek'ari bùda apatap'edaa
(Marcos 3.20-30; Lucas 11.14-23; 12.10)
22 Jesumaa aneejida eperã tau p'ãriu bù mãik'aapa pedee atua bù, netuara iru k'ap'ùade merãtùa bada perã. Jesupa iru tau pia unupiji mãik'aapa pedeepiji. 23 Mãga unudak'ãri, arii p'anadap'edaarãpa ak'ùtrua para beeji mãik'aapa ãchi pitapai iidi para beeji:
—¿Nãgà chonaarãwedapema Rey David Warra–ek'ã? ajida.
24 Mamîda mãga ûridak'ãri, fariseorãpa mãgajida:
—Beelzebú, Netuara Poro Waibùa júapata jãgá netuaraarã uchiapiparida ajida.
25 Jesupa k'awaji ãchia k'îsia p'anù. Mapa mãgaji:
—P'uuru pidaarãpa maa–e pùrã ëreerãpa maa–e pùrã te pidaarãpa ãchi auk'aarã jëreruta pùrã, waa araa p'anapataada–e pai mãik'aapa ãchi p'uuru jõdaridai. 26 Mãga pùk'a Netuara Poro Waibùapa ichi auk'aarã jëreru pùrã, waa araa p'anada–e pai mãik'aapa ãchi itu jõdaridai. 27 Parãpa jara p'anù mùa netuaraarã uchiapipari Beelzebú juapa. Mãgara, ¿k'ai juapa uchiapipatama parã eere p'anùùrãpa? Ãchia ak'ùpipata parã pia k'îsiada–e p'anù. 28 Mùa netuaraarã uchiapipari pùrã Tachi Ak'õre Jaurepa, jara k'inia bù ârá Tachi Ak'õredeerã poro waibùa nama bù.
29 +¿K'aita t'îuyama aji, eperã juataura bù tede iru net'aa chùade? Naapùara jâ nâbù–e pùrã, iru net'aa jãri p'e ata–e pai.
30 +Eperã mù eere bù–e pùrã, mù k'îra unuamaa iru bù. Ichiaba mù k'aripa–e bù pùrã awaraarã Tachi Ak'õre jua ek'ari p'anapataadamerã, eperãarã ãyaa pëipari mù ik'aawaapa.
31 +Maperã mùa jara bù: Tachi Ak'õrepa wêpapii eperãarãpa p'ek'au k'achia oopata jõmaata mãik'aapa iru ãpùte ik'achia jarapata paara. Mamîda iru Jaure ãpùte ik'achia jarapata wêpapi–e pait'ee. 32 Ichiaba wêpapii ik'achia jarapata mù, chi Eperã Ak'õre Truadepema ãpùte. Mamîda wêpapi–e pait'ee ik'achia jararuta pùrã iru Jaure ãpùte. Mãgee p'ek'au k'achia oopata wêpapi–e pait'ee chi ma pedee jarapataarã na p'ek'au eujãde p'anùde maa–e pùrã ùt'ari iru k'îrapite p'anùde paara, iru ewari waibùa ewate.
Jesupa jarateeda pak'uru k'awapata chi nejõdeepa
(Lucas 6.43-45)
33 —Nejõ bùùrù pia iru bù pùrã, chauk'ãri, nejõ pia iru bait'ee. Jõdee nejõ bùùrù k'achia iru bù pùrã, chauk'ãri, nejõ k'achia iru p'anadait'ee. Nejõ bùùrù k'awapata chi nejõdeepa. 34 ¡Parã k'achia–idaa beerãdeepa uchiadap'edaarã! ¡Taamák'apù p'anù! ¿Sãga pedee pia jaradai, parã t'ãri k'achia p'anùta? Pãchi t'ãride k'îsia p'anùta jarapata pãchi it'aideepa. 35 Eperã t'ãri pia bùpa pedee pia jarapari k'îsia pia iru bairã ichi t'ãride. Jõdee eperã t'ãri k'achia bùpa pedee k'achia jarapari k'îsia k'achia iru bairã ichi t'ãride. 36 Mùa jara bù: Tachi Ak'õre ewari waibùa ewate ichia eperã chaachaa k'awapiit'ee ãchia pedee k'achia pariatua jaradap'edaa. 37 Ma ewate Tachi Ak'õrepa ak'ùit'ee eperãarãpa pedee jaradap'edaa mãik'aapa ichiata jarait'eeda aji, k'achia–idaa bù, maa–e pùrã t'ãri pia bù.
Ne–inaa eperãarãpa p'oyaa oodak'aa unu k'inia p'anadap'edaarã
(Marcos 8.11-12; Lucas 11.29-32)
38 Mãpai ûk'uru fariseorãpa mãik'aapa Moisepa p'ãda jarateepataarãpa Jesumaa mãgajida:
—Tachi Jarateepari, taipa unu k'inia p'anùda ajida, pùa oo bù ne–inaa Tachi Ak'õrepapai oopari.
39 Jesupa p'anauji:
—Ârapemaarã t'ãri k'achia–idaa p'anù, Tachi Ak'õrede ijãadak'aa perã. Unu k'inia p'anùda a p'anù ne–inaa eperãarãpa p'oyaa oodak'aa ãchi juadoopa. Mamîda mùa mãga oo–e pait'ee. Jîp'a Tachi Ak'õrepa ooit'ee ichi pedee jarapari Jonás ome oodak'a. 40 Jonás k'ãima õpee baji chik'o choma bù bide.a Mãga pùk'a mù, chi Eperã Ak'õre Truadepema k'ãima õpee eujã ek'ari bait'ee. 41 Tachi Ak'õre ewari waibùa ewate Nínive p'uuru pidaarãpa ârapemaarã ùmùateedait'ee, Tachi Ak'õrepa parã k'achiadee pëimerã. Chonaarãweda Tachi Ak'õrepa Jonás pëik'ãri ma Nínive pidaarãmaa, ãrapa p'ek'au k'achia oopatap'edaa oo amaajida. Mamîda ârapemaarãpa p'ek'au k'achia oopata oo amaada–e p'anù, aba Jonás k'ãyaara waibùara bùpa jara cheji mîda mãga oodamerã. 42 Ichiaba ma ewate Reina Sur Eerepemapa auk'a ârapemaarã ùmùateeit'ee Tachi Ak'õrepa parã k'achiadee pëimerã. Chonaarãweda ma reina t'ùmùùpa cheji Rey Salomón k'îsia k'awaa bù pedee ûride. Mamîda ârapemaarãpa ûridaamaa p'anù, aba Salomón k'ãyaara k'îsia k'awaara bù pedee bù mîda parã t'ãide.
Jesupa jarateeda netuara waya eperã k'ap'ùade merãtùa badade
(Lucas 11.24-26)
43 —Eperã k'ap'ùadeepa netuara uchiapidak'ãri, mãgùpa jùrù nipapari eujã p'ûasaa sãma âiit'ee. Mamîda unu–e pak'ãri, k'îsiapari: 44 “Waya merãtùanait'ee ma eperã k'ap'ùade; mù naaweda badamãi.” Chek'ãri, unu chepari ma eperã k'ap'ùa pi–ia bù; te barrep'eda, sùùp'eda, pi–ia bùk'a. 45 Mãga unuk'ãri, jùrùnapari awaraa netuara siete k'achiara ichi k'ãyaara mãik'aapa ma eperã k'ap'ùade merãtùa chepata. Mãgá ma eperã audupùara k'achiade beeit'ee naaweda bada k'ãyaara. Mãga p'asait'eeda aji, ârapemaarã t'ãri k'achia–idaa beerã ome; audupùara k'achiade p'aneedait'ee.
María Jesús âpemaarã ome pachedap'edaa
(Marcos 3.31-35; Lucas 8.19-21)
46 Jesús at'ãri pedeemaa bùde pachejida chi nawe chi âpemaarã ome. Pedee k'inia p'anajida iru ome. Mamîda taawa p'aneedap'edaa perã, 47 eperãpa Jesumaa jaranaji:
—Pù nawe, pù âpemaarã ome taawa nùmaa p'anù. Pedee k'inia p'anùda aji, pù ome.
48 Mãpai Jesupa p'anauji:
—¿K'aima mù nawe? ¿K'áirãma, mù âpemaarã?
49 Mãpai juapa ùaji chi k'õp'ãyoorãmaa mãik'aapa mãgaji: