Juan Bautistapa eperãarã pëida
(Lucas 7.18-23)
11
1 Jesupa chi k'õp'ãyoorã doce ûraap'eda, mamãik'aapa wãji Ak'õrepa jara pëida jarateede ma eujãdepema p'uuru bee chaa.2 Juan carcelde bù misa, ûriji Cristopa oomaa bù. Aramata ichi ome nipapatap'edaarã ûk'uru pëiji Jesumaa. Iidinajida:
3 —¿Pùk'ã ajida, tai k'aripapari chonaarãpa cheit'ee bùda adap'edaa? Maa–e pùrã, ¿taipa awaraa nùdaipia bùk'ã? ajida.
4 Jesupa p'anauji:
—Wåtù Juanmaa mãik'aapa nepùràtù parãpa nama unu p'anù mãik'aapa ûri p'anù. 5 Jarátù tau p'ãriu beeda ârá unu p'anù; bùùrù nùk'anùk'aa beeda t'ùa nîutee; leprapa k'ayaa beeda jùpa p'anù; k'ùùrù k'î beeda ârá ûri p'anù; piudap'edaarã waya chok'ai p'anù mãik'aapa chupùria chedeerãmaa Tachi Ak'õrepa pedee pia jara pëida jarateemaa bù. 6 ¡T'ãri o–îa bùda aji, chi mùde ijãa bù, k'awa–e bù mîda mùa ne–inaa jõma oo bù!
Jesupa Juande pedee pia jarada
(Lucas 7.24-35)
7 Juanpa eperãarã pëida wãdap'edaa t'êepai, eperãarãmaa Jesupa pedee pia jaramaa beeji Juande:
—¿K'ãata parãpa ak'ùnajidama aji, eujã pania wêe bùmaa wãdak'ãri? ¿K'îsiajida–ek'ã ak'ùnadait'ee eperã pariatua k'îsia bù, p'ûajara nãupa pariatua nêunêuwaa p'uaparik'a? 8 Maa–e pùrã, ¿k'îsiajida–ek'ã ak'ùnadait'ee eperã p'aru pi–ia jâ bù? Parãpa pia k'awa p'anù eperã p'aru pi–ia jâ beerã rey tede p'anapata. 9 Mãga–e pùrã ¿k'îsiajida–ek'ã ak'ùnadait'ee Ak'õre pedee jarapari? Wãara, iru Ak'õre pedee jarapari k'ãyaara waibùara bù. 10 Na Juandeta Tachi Ak'õre Ûraa p'ãdade jara bù:
‘Mùa eperã chok'a pëiit'ee pù naa o pia oonamerã pù, eperãarã poro waibùa, chei naaweda.’ (Malaquías 3.1)
11 Mùa wãarata jararu. Juan Bautista k'ãyaara eperã apida waibùara bù–e. Mamîda chi ek'ariara bùta iru k'ãyaara waibùara pait'ee Tachi Ak'õrepa ma eperã ichi jua ek'ari bùk'ãri, ichideerã ome beemerã.
12 +Juan Bautista chedak'ãriipa, eperãarã chõo pùk'a p'anù t'îudait'ee Tachi Ak'õre jua ek'ari, ichideerã p'aneedait'ee mãik'aapa k'achia beerã auk'a chõo pùk'a p'anù apida mãga p'ananaadamerã. 13 Juan jaratee chei naaweda, Tachi Ak'õre pedee jarapataarãpa jarapachida Tachi Ak'õrepa mãgá eperãarã bùit'ee ichi jua ek'ari, ichideerã p'aneedamerã. Moisepa p'ãdade ichiaba mãga jara bù. 14 Parãpa k'awaa k'inia p'anù pùrã Juanta Elíasa chi cheit'ee bada jara p'anadap'edaa; ichipù. 15 Pia k'îsíatù parãpa et'ewa ûridap'edaade k'awaadamerã k'ãata jara k'inia bù.
16 +Mùa jarait'ee sãga p'anù parã, mùde ijãadak'aa beerã. Warrarã su–ak'ù p'aneedap'eda, jemenemaa p'anàk'ata p'anù p'uuru jãde. Ãchi k'õp'ãyoorãmaa biapata:
17 “Taipa siru chaajida. Mamîda parã pëirada–e paji. K'ari k'îsia paraa k'arijida. Mamîda parã jêeda–e paji.”b
18 Mãga pùk'a baji Juan ome. Iru cheji mãik'aapa nek'ok'aa paji, ne–inaa tok'aa paji, eperã jîp'aarãpa oopatak'a. Maperã eperãarãpa: “Netuara iru k'ap'ùade merãtùa bùda” ajida. 19 T'êepai mù, chi Eperã Ak'õre Truadepema cheji mãik'aapa nek'oji, ne–inaa toji eperã jîp'aak'a. Maperã jara p'anù mù nek'oyaa, ne–inaa toyaa bapari. Ma awara mù k'õp'ãyo meraaparida a p'anù, k'achia–idaa beerã ome mãik'aapa Cesar–it'ee impuesto p'epataarã ome. Mamîda Tachi Ak'õrepa wãarata ak'ùpimaa bùda aji, mùa oo bù k'aurepa parã jõmaarã pari.
Tachi Ak'õrepa oo bù unuamaa iru p'anapataarã
(Lucas 10.13-15)
20 Mãpai Jesús ijâatù pedeemaa beeji awara–awaraa p'uurudepemaarãmaa, ãchia p'ek'au k'achia oopata oodaamaa p'anadap'edaa perã. Mãga p'anajida unupachida mîda irua ooda ne–inaa eperãarãpa p'oyaa oodak'aa ãchi juadoopa. Jesupa ãchimaa mãgaji:
21 —¡Aai, Corazín p'uurudepemaarã! ¡Aai, Betsaida p'uurudepemaarã! ¡Tachi Ak'õrepa parã k'achiadee pëiit'eepù! Tiro p'uurude, Sidón p'uurude eperãpa ooda paara ne–inaa eperãarãpa p'oyaa oodak'aa ãchi juadoopa mùa parã p'uurude oodak'a, taarã–eweda ijãak'ajida. Ãrapa p'ek'au k'achia oopata oo amaa k'inia jõnùpa chupùria iidik'ajida Tachi Ak'õremaa. Ma p'ek'au k'achia oopata k'aurepa t'ãri p'uapa p'aru p'ãimaa jâk'ajida mãik'aapa it'abarre p'ora ùt'aa p'ok'ajida ãchi poro ârù. 22 Maperã mùa jara bù: Tachi Ak'õre ewari waibùa ewate irua parã k'achiara ooit'ee ma Tiro p'uurudepemaarã k'ãyaara mãik'aapa Sidón p'uurudepemaarã k'ãyaara. 23 Ichiaba parã Capernaum p'uurudepemaarã, ¿k'îsia p'anùk'ã parã p'uuruta awaraa p'uuru k'ãyaara waibùara pait'ee Ak'õre k'îrapite? ¡Mãga–e! ¡Ma k'ãyaara irua parã p'uuruta jõt'aait'ee! Sodoma p'uurude eperãpa ooda paara ne–inaa eperãarãpa p'oyaa oodak'aa ãchi juadoopa, mùa parã t'ãide oodak'a, ma p'uuru at'ãri bak'aji. 24 Mamîda mùa jara bù: Tachi Ak'õre ewari waibùa ewate irua parã k'achiara ooit'eeda aji, Sodoma p'uurudepemaarã k'achia ooi k'ãyaara.
Jesupa eperãarã âipipari
(Lucas 10.21-22)
25 Maapai Jesupa mãgaji:
—Ak'õre Waibùa, pù jõmaarã k'ãyaara waibùara bù. Ne–inaa jõmaweda ùt'ari nâbù, na p'ek'au eujãde nâbù paara pù jua ek'ari bù. Mù t'ãri o–îa bù pùa eperãarã jîp'aarãmaa k'awapiru perã ne–inaa pùa waide k'awapi–e pada k'îsia k'awaa beerãmaa mãik'aapa poro wêsaa beerãmaa. 26 Pùa mãga ooji mãga oo k'inia bada perã.
27 +Mù Ak'õrepa ne–inaa jõma bùji mù jua ek'ari mùa ak'ùpariimerã. Tachi Ak'õrepapai wãara mù, ichi Warra k'awa bù. Mãgá ichiaba mù, chi Warrapapai wãara iru k'awa bù. Mamîda mùa iru k'awapii mùa k'awapi k'inia bù eperãarãmaa. 28 Maperã mùmaa chétù parã jõmaweda sê p'anùùrã mimia p'anùùpa mãik'aapa k'îsia jõnùpa. Mùa parã t'ãri a–tu beepiit'ee. 29 K'õp'ãyo meráatù mù ome. Ûrítù mùa jaratee bù mãik'aapa óotù mùa jara bùk'a. Mù t'ãri pia, chupùria k'awaayaa bapari. Mùde ijãadak'ãri, k'ãiwee p'anapataadait'ee. 30 Mùa jara bùk'a oodayada aji, mùa k'aripak'ãri.