Jesupa k'õp'ãyoorã jùrùt'erada mimiadamerã ichi ome
(Marcos 3.13-19; Lucas 6.12-16)
10
1 Jesupa chi k'õp'ãyoorã doce t'â p'eji mãik'aapa ãchi ichi jua ek'ari bùji netuaraarã uchiapidamerã mãik'aapa k'ayaa k'îra t'ãdoo jùpadamerã.2 Nãgà ùmùk'îraarã doce jùrùt'eraji pëiit'ee ichi ûraa jarateede. Naapùara jùrùt'eraji Simón, ichiaba t'âjarapatap'edaa Pedro, chi âpema Andrés ome. Ma t'êepai jùrùt'eraji Santiago chi âpema Juan ome. Mãùrã Zebedeo warrarã paji. 3 Ichiaba jùrùt'eraji Felipe; Bartolomé; Tomás; mù, Mateo, chi impuesto p'epari bada Roma pidaarã–it'ee; Alfeo warra, Santiago; Tadeo; 4 Simón Celote apatap'edaaa mãik'aapa Judas Iscariote, ma t'êepai Jesús traicionaada.
Jesupa chi k'õp'ãyoorã pëida Ak'õre Ûraa jarateenadamerã
(Marcos 6.7-13; Lucas 9.1-6)
5 Jesupa ma k'õp'ãyoorã doce pëiji eperãarã paraamaa. Pëi naaweda jaraji:
—Wãnáatù judio–eerã p'anapatamaa. Ichiaba wãnáatù Samaria eujãdepema p'uurudee. 6 Ma k'ãyaara wåtù Israel eujãdepema ovejaarã atua pùk'a beerãmaa. 7 Jaratéetù taarã–e Tachi Ak'õrepa eperãarã ichi jua ek'ari bùit'ee ichideerã p'aneedamerã. 8 K'ayaa beerã jùpátù; piudap'edaarã chok'ai p'irabaipítù; leprapa k'ayaa beerã jùpátù mãik'aapa netuara k'ap'ùade merãtùa bee jùpátù. Mùa parã mùchi jua ek'ari bùk'ãri mãga oodamerã, p'arat'a maarepida iidi–e paji. Mapa p'arat'a iidináatù ma pari.
9 +Ateenáatù nêe, p'arat'a, cobre, pãchi k'ùrrùde jâpata. 10 Ichiaba ateenáatù mochila, awaraa chancla mãik'aapa p'aru jâdait'ee, pak'uru jida t'ùdùk'adait'ee, parã mimia pari ma ne–inaa teedaipia p'anadairã.
11 +P'uurude maa–e pùrã te chok'ara–ee beemãi panadak'ãri, eperã t'ãri piata jùràtù arii p'aneedait'ee mamãik'aapa wãruta misa. 12 Teeda t'îudak'ãri, arii p'anùùrãmaa pedee pia jarátù. 13 Aù tede p'anùùrãpa parã auteebairuta pùrã, ma pedee pia jaradak'a ãramaa uchiait'ee. Mamîda auteebaida–e pùrã, ma pedee pia jaradak'a ãramaa uchia–e pait'ee. 14 Parã auteebaida–e pùrã mãik'aapa parãpa jarateepata ûridaamaa p'anù pùrã, uchíatù ma tedeepa maa–e pùrã ma p'uurudeepa mãik'aapa bùùrùdepema yooro p'ora nêep'étù ak'ùpidait'ee Tachi Ak'õrepa ãra k'aripa–e pait'ee. 15 Mùa wãarata jararu. Tachi Ak'õre ewari waibùa ewate irua ma p'uurudepemaarã audupùara k'achia ooit'eeda aji, Sodoma p'uurudepemaarã, Gomorra p'uurudepemaarã k'achia ooda k'ãyaara.
Jesupa jarada ichi k'aurepa ijãapataarã miadait'ee
(Lucas 12.11-12; 21.12-17)
16 —¡Ûrítù! Mùa parã pëiru eperãarãmaa jarateede. Pëiru ovejaarã pëik'ajik'a ne–animalaarã k'achia beerã t'ãide. Mapa k'îra k'awaa nipapatáatù, taama k'îra k'awaa nipaparik'a. Ichiaba k'ãiwee nipapatáatù paloma nipaparik'a. 17 Tauk'a nipapatáatù eperãarãpa parã ateedait'ee perã ãchi charraarãmaa miapidamerã, maa–e pùrã parã p'ua oodait'ee Tachi Ak'õre Ûraa jarateepata tede. 18 Ma awara mùde ijãapata k'aurepa ateedait'ee ãchi poro waibùarãmaa mãik'aapa ãchi reyrãmaa. Mãgá parãpa mù ûraa jaradai mãùrã k'îrapite mãik'aapa awaraa ijãadak'aa beerã k'îrapite. 19 Mamîda mãùrã k'îrapite p'anadak'ãri, k'îsianáatù sãga pedeedait'ee, maa–e pùrã k'ãata jaradait'ee, pedeedait'ee pak'ãri, Tachi Ak'õrépata pedeepiit'ee perã. 20 Parã pedeeda–e pait'ee pãchi k'îradoopa. Tachi Ak'õre Jaurépata pedeeit'ee parã k'ap'ùa.
21 +Maapai eperãarãpa ãchi âpemaarã paara teedait'ee miapidamerã piurutamaa. Ma awara chi ak'õreerãpa ãchi warrarã paara mãgá peepidait'ee; maa–e pùrã warrarãpa ãchi ak'õreerã peepidait'ee. 22 Jõmaarãpa parã k'îra unuamaa iru p'anapataadait'ee mùde ijãapata k'aurepa. Mamîda t'ãridepai chooruta pùrã, Tachi Ak'õrepa parã k'aripait'ee atuanaadamerã na p'ek'au eujã jõrumaa. 23 P'uuru abaade parã jùrù p'aneedak'ãri, mirútù awaraa p'uurude. Mùa wãarata jararu. Parã Israel p'uuru jõmaade jaratee nipadai naaweda, mù, chi Eperã Ak'õre Truadepema, cheit'ee.
24 +K'irãpátù eperã apida ichi jarateepari k'ãyaara waibùara bù–e. Ichiaba mimiapari apida chipari k'ãyaara waibùara bù–e. 25 Chi ne–inaa k'awaa k'inia bù o–îa baipia bù chi jarateepari jîak'a pait'ee. Ichiaba mimiapari o–îa baipia bù chipari jîak'a pait'ee. Chi te chipari t'âjarapata pùrã Beelzebú, Netuara Poro Waibùa, audupùara irudeerãmaa mãgà t'â bùdait'ee.
Jesupa jarateeda k'aita waaweedaipia bù
(Lucas 12.2-7)
26 —Mãga jara p'anù mîda, eperãarã waaweenáatù. Ârá Tachi Ak'õre net'aa merã pùk'a bù mîda, t'êepai parãpa jõmaarãmaa jaradait'ee. 27 Mùa ûraa jarada p'ãriu pùk'a baji. Mamîda jõmaarãmaa mãga jîp'a jaradaipia bù. Ma awara mùa ûraa merã pùk'a jarada, golpe jaradaipia bù terraza ârùùpa biaruk'a. 28 Waaweenáatù parã jùrù p'anùùrã peedait'ee, ãrapa parã p'oyaa atuapida–e perã tok'arradee. Ma k'ãyaara Tachi Ak'õre waawéetù. Iruata tachi piupii mãik'aapa atuapii.
29 +¿Netopata–ek'ã ipana chak'e omé p'arat'a tau abaa pari? Eperãarãpa mãga oopata, ipana chak'e mak'ùara vale–e bù jîak'aapa. Mamîda ipana chak'e apida eujãde baaidak'aa, parã Ak'õre Waibùapa mãga jara–emãi. 30-31 Parã puda paara irua juasia iru bù. Mapa waaweenáatù, Tachi Ak'õrepa parã k'iniara iru bapari perã ipanaarã k'ãyaara.
Jesucristode ijãapatada apataarã awaraarã k'îrapite
(Lucas 12.8-9)
32 —Eperãpa tau taawa jararu pùrã ichi Jesucristode ijãapari, mùa pida jarai: “Mãgà mëré” mù Ak'õre k'îrapite ùt'ari. 33 Mamîda eperãpa meraru pùrã mùde ijãapari, mãgara mùa pida merait'ee. “Mãgà mëre–eda” ait'ee mù Ak'õre k'îrapite ùt'ari.
Jesús k'aurepa ëreerã t'ãri auk'a p'anada–e
(Lucas 12.51-53; 14.26-27)
34 —K'îsianáatù mù cheji na p'ek'au eujãdee eperãarã k'ãiwee p'anapide. Jîp'a cheji chõopide. 35 Mù cheji
‘warra t'ãri auk'a banaamerã chi ak'õre ome, wêra k'au t'ãri auk'a banaamerã chi nawe ome mãik'aapa ãigu t'ãri auk'a banaamerã chi p'ãk'õre ome. 36 Ma k'aurepa eperãarã t'ãri auk'a para ba–e pait'ee ãchi ëreerã ome.’(Miqueas 7.6)
37 +Eperãpa ichi ak'õre wa chi nawe k'iniara iru bù pùrã mù k'inia iru bai k'ãyaara, mëré pa–e pai. Ichiaba eperãpa chi warra wa chi k'au k'iniara iru bù pùrã mù k'inia iru bai k'ãyaara, mãgà mëré pa–e pai. 38 Ma awara mùde ijãapari k'aurepa eperã piuamaa bù pùrã kurusode piu wãk'a, mãgà mëré pa–e pait'ee. 39 Eperã piuamaa bù pùrã mùde ijãapari k'aurepa, mãgà piuk'ãri, atuait'ee. Mamîda eperã piuru pùrã mùde ijãapari k'aurepa, mãgà eperã piuk'ãri ùt'aa wãit'ee.
Jesupa jarada ijãapataarãpa ne–inaa pia atadait'ee
(Marcos 9.41)
40 —Eperãpa parã auteebaik'ãri, mù jida auteebai bù mãik'aapa mù Ak'õre, mù pëida, auk'a auteebai bù. 41 Ma awara eperãpa auteebaik'ãri Tachi Ak'õre pedee jarapari, Tachi Ak'õrepa pëida perã, ne–inaa pia atait'ee Tachi Ak'õre pedee jarapataarãpa atapatak'a. Ichiaba auteebaik'ãri eperã t'ãri pia, mãgà t'ãri pia bairã, ne–inaa pia atait'ee eperã t'ãri pia beerãpa atapatak'a. 42 Ma awara eperãpa teek'ãri pania vaso aba mù ome nipaparimaa mãgà mëré perã, Tachi Ak'õrepa ne–inaa pia ichiaba teeit'ee ma pania teedamaa.