Jesupa chiwa bada jùpada
(Marcos 2.1-12; Lucas 5.17-26)
9
1 Ma t'êepai, Jesús barcode bataup'eda, wãji lago k'îraik'a eeree. Mãgá ichi p'uurude pacheji. 2 Mama bùde eperãarãpa jira aneejida eperã chiwa bù p'arude. Jesupa k'awaak'ãri ãchia wãara ichide ijãa p'anù, ma chiwa bùmaa mãgaji:—Warra, t'ãri o–îa báji pùa p'ek'au k'achia oopata jõmaweda wêpada perã.
3 Ûk'uru arii p'anadap'edaa Moisepa p'ãda jarateepataarãpa mãga ûridak'ãri, k'îsiajida: “Jãgùpa ik'achia pedeemaa bù Tachi Ak'õre ãpùte. Tachi Ak'õrepapai p'ek'au k'achia wêpapiyada” ajida. 4 Mamîda Jesupa k'awaji ãchia k'îsia p'anù. Mapa iidiji:
—¿Sãap'eda parãpa k'îsia k'achia k'îsia p'anùma? aji. 5 Mùa irumaa jarai: “Pùa p'ek'au k'achia oopata wêpajipù” maa–e pùrã jarai: “P'irabáiji mãik'aapa wåji”. Mamîda irua maarepida oo–e pai, Tachi Ak'õrepa oopi–e pùrã. 6 Mùa ak'ùpiit'ee na p'ek'au eujãde mù, chi Eperã Ak'õre Truadepema k'ap'ùa pari, Tachi Ak'õre Waibùapa wêpapipari eperãarãpa p'ek'au k'achia oopata.
Mãpai mãgaji ma eperã chiwa bùmaa:
—¡P'irabáiji! Pùchi p'aru atáji mãik'aapa wåji pùchi temaa.
7 Aramãgá ma chiwa bada p'irabaidachi mãik'aapa wãji ichi temaa. 8 Mãga unudak'ãri, eperãarã p'era pùk'a para beeji mãik'aapa Tachi Ak'õremaa o–îa ùt'aa t'âjida, irua ma eperãmaa mãga ooda perã.
Jesupa Mateo jùrùt'erada ichi ome nipapariimerã
(Marcos 2.13-17; Lucas 5.27-32)
9 Mamãik'aapa Jesús wãji. Ma wãrude eperã t'âjarapatap'edaa Mateoa unuji. Su–ak'ù baji Cesar–it'ee impuesto p'aapatamãi. Jesupa mãgaji irumaa:
—Mù ome nipaparíiji.
Aramãgá bainâ beep'eda, Jesús ome wãji.
10 T'êepai Jesús chi k'õp'ãyoorã ome teeda nek'omaa bak'ãri, impuesto p'epataarã Roma pidaarã rey–it'ee pachejida awaraa eperãarã k'achia–idaa beerã apatap'edaarã ome. Mãùrã aù mesade su–ak'ù p'aneejida Jesús ome. 11 Fariseorãpa mãga unudak'ãri, Jesús k'õp'ãyoorãmaa iidijida:
—¿Sãap'eda parã jarateepari nek'omaa bùma ajida, impuesto p'epataarã ome mãik'aapa awaraa p'ek'au k'achia oopataarã ome?
12 Mãùrãpa iididap'edaa ûrik'ãri, Jesupa mãgaji:
—Médico pëidak'aa k'ap'ùa pia beerãmaa. Jîp'a pëipata k'ayaa beerãmaa. 13 Parã wãdak'ãri, k'îsiadapáde aji, nãgà Ak'õre Ûraa jara k'inia bù:
‘Mùa k'iniara bù awaraarã chupùria k'awaadamerã, ne–animalaarã peedap'eda, paadai k'ãyaara mù–it'ee.’ (Oseas 6.6)
Mãpai Jesupa mãgaji:
—Tachi Ak'õrepa mù pëi–e paji t'ãri pia beerã jùrùde. Ma k'ãyaara p'ek'au k'achia oopataarã jùrùdeta pëiji.
Sãapai nek'oda–ee p'anadaipia bù
(Marcos 2.18-20; Lucas 5.33-35)
14 Mãpai Juan Bautista k'õp'ãyoorã Jesumaa chejida mãik'aapa iidijida:
—Edaare tai, fariseorã ome nek'oda–ee p'aneepata jîp'a Tachi Ak'õre net'aade k'îsiadait'ee. ¿Sãap'eda pù k'õp'ãyoorãpa mãga oodak'aama? ajida.
15 Jesupa p'anauji:
—Miak'ãipata fiestade t'â pëidap'edaarã k'îra pia–ee p'anadak'aa chi miak'ãiit'ee bù ãchi ome bù misa. Mamîda ewari cherude iru ata chedak'ãripù, t'ãri p'uapa nek'oda–ee p'aneedait'eeda aji.
Ûraa chiwidi mãik'aapa chonaarãweda p'ãdap'edaa
(Marcos 2.21-22; Lucas 5.36-39)
16 —Eperã apidaapa p'aru chiwididepema pite aba t'ùùik'araa bùda aji, p'aru sorede parchaait'ee. Mãga ooru pùrã, chi p'aru chiwidi ãridariit'ee mãik'aapa ma pite auk'a bee–e pait'ee chi p'aru sore ome. 17 Ichiaba vino ewaa juda t'ùdak'aa ne–eb sorede, ma vino baak'ak'ãri, ma ne–e sore jîadarii perã mãik'aapa chi vino atuadarii perã. Maperã vino ewaa juda t'ùdaipia bù ne–e chiwidide, ma ne–e chi vino ome atuapiamaapa.
Jairo k'au mãik'aapa wêrapa Jesús p'aru ide t'õbaida
(Marcos 5.21-43; Lucas 8.40-56)
18 Jesús at'ãri pedeemaa bùde, judiorã poro waibùa t'âjarapatap'edaa Jairo Jesús k'îrapite bedabai nâba cheji mãik'aapa mãgaji:
—Et'ewapai mù k'au jai–idaajida aji. Mamîda mùa k'awa bù pù cheru pùrã mù ome mãik'aapa pù jua bùru pùrã iru ârù, waya chok'ai beeyada aji.
19 Mãpai Jesús wãji chi k'õp'ãyoorã ome ma eperã temaa. 20 Ma wãdade wêra doce año bi k'ayaa bù waamiapa Jesús ãpùteik'aapa k'ait'a wãp'eda, iru ârùpema p'aru i t'õbait'aaji. 21 Mãga ooji k'îsia bada perã iru p'aru i t'õbairupapai jùpa beei. 22 Mamîda mãgá t'õbaik'ãri, Jesupa ãpùtee ak'ùji mãik'aapa mãgaji ma wêramaa:
—Wêra, t'ãri o–îa béeji. Pùa mùde ijãa bairã, jùpa beejida aji.
Aramata ma wêra jùpa beeji.
23 Maap'eda Jesús ma judiorã poro waibùa temaa panak'ãri, unuji siru chaapataarã mãik'aapa eperãarã jêepi ororoo nâbù. 24 Mãpai Jesupa mãgaji:
—Taawaa uchíatù. Na wêra k'au jai–idaa–e bù. Jîp'a k'ãita bùda aji.
Mãga ûridak'ãri, arii p'anadap'edaarã ëik'oodachida, Jesús k'îra k'awa–ee bù jîak'aapa. 25 Mamîda Jesupa eperãarã uchiapik'ooji mãik'aapa jai–idaada badamãi t'îup'eda, iru jua jita atanaji. Mãpai ma wêra k'au p'irabaidachi. 26 Maap'eda ma eujãdepemaarã jõmaarãpa k'awaa wãjida Jesupa mãga ooda.
Jesupa tau p'ãriu beerã omé jùpada
27 Mamãik'aapa uchia wãdade, Jesús t'êe tau p'ãriu bee omé bia chewãpachida:
—¡Rey David Warra,c tai chupùria k'awaapáde! ajida.
28 Jesús teeda t'îunak'ãri, ma tau p'ãriu beerã auk'a t'îujida. Mãpai Jesupa iidiji:
—¿Parãpa ijãa p'anùk'ã aji, mùa jùpai?
P'anaujida:
—Tachi Waibùa, ijãa p'anùda ajida.
29 Mãpai Jesupa taumãi t'õbaip'eda, mãgaji:
—Parãpa ijãa p'anùk'a, mãgá p'aneedapáde aji.
30 Aweda tau eratùk'oodachida. Mãpai Jesupa jîp'a mãgaji:
—Mùa ooda chîaramaa nepùrùnaadapáde aji.
31 Mãga jaraji mîda, mamãik'aapa uchiarutata Jesupa ooda nepùrù wãpachida ma eujãdepemaarãmaa.
Jesupa pedee atua bada jùpada
32 Ma tau p'ãriu p'anadap'edaarã uchiarutade, eperãarãpa aneejida eperã pedee atua bù Jesumaa. Mãga baji netuara ichi k'ap'ùade merãtùa bada perã. 33 Jesupa ma netuara uchiapit'aak'ãri, ma eperã pedee beeji. Mãga unudak'ãri, arii p'anadap'edaarãpa ak'ùtrua para beeji mãik'aapa mãgajida:
—¡Israelde waide nãga unudak'aada! ajida.
34 Mamîda fariseorãpa mãgajida:
—Netuara Poro Waibùa júapata jãgá netuaraarã uchiapiparida ajida.
Jesupa eperãarã chupùria k'awaada
35 Jesús nipapachi p'uuru beede mãik'aapa aù ik'aawa p'uuru k'aipee beede. Tachi Ak'õre Ûraa jarateepata te chaa pedee pia jarateepachi k'awaadamerã taarã–e Tachi Ak'õrepa eperãarã p'e bùit'ee ichi jua ek'ari, ichideerã p'aneedamerã. Ma awara k'ayaa k'îra t'ãdoo jùpapachi. 36 Eperãarã chok'ara see nâbù unuk'ãri, chupùria k'awaaji, ãra chupùria, k'îra pia–ee para bada perã, oveja chak'eerã ak'ùpari wêe chitoonùk'a. 37 Mãpai chi k'õp'ãyoorãmaa mãgaji: