Jesupa leprapa k'ayaa bada jùpada
(Marcos 1.40-45; Lucas 5.12-16)
8
1 Jesús eedeepa edaa chek'ãri, eperãarã chok'ara iru t'êe chejida. 2 Mãgá chewãde iru k'ait'a cheji eperã leprapa k'ayaa bù. Mãgà iru k'îrapite bedabai nâba cheji mãik'aapa mãgaji:—Tachi Waibùa, pùa k'inia bù pùrã, mù k'ayaa wêpapipáde aji, Ak'õre k'îrapite mù pia beemerã.
3 Jesupa juapa t'õbaip'eda, mãgaji:
—¡K'inia bùda! aji. Jùpa beepáde aji.
—¡Ûríji! Jaranáaji apidaamaa. Jîp'a p'aaremaa ak'ùpináji mãik'aapa Moisepa p'ãdade jara bùk'a ipana omé atéeji teeit'ee Tachi Ak'õremaa. Mãgá jõmaarãpa pù jùpa beeda k'awadayada aji.
Jesupa Romadepema soldaorã poro mimiapari jùpada
(Lucas 7.1-10; Juan 4.43-54)
5 T'êepai Jesús Capernaum p'uurude panak'ãri, Romadepema soldaorã poro waibùapa irumaa chupùria iidi cheji:
6 —Jesús, mù mimiapari k'ayaa bùda aji. P'oyaa mimik'a–e bù mãik'aapa chupùria nâbùda aji, p'uapa.
7 Jesupa p'anauji:
—Wãit'eeda aji, jùpade.
8 Mamîda ma soldaorã poro waibùapa mãgaji:
—Tachi Waibùa, mù pù k'ãyaara ek'ariara bù. Pù mù temaa wã–e pùjida, namãik'aapa pedeeru pùrã, mù mimiapari jùpa beeit'ee. 9 Mù jida waibùarã jua ek'ari bù. Ma awara mùa soldaorã iru bù mùchi jua ek'ari. Mùa abaamaa wãpáde ak'ãri, wãpari; awaraamaa chepáde ak'ãri, chepari. Ichiaba mù mimiaparimaa ne–inaa oopáde ak'ãri, oonaparida aji.
10 Jesupa mãga ûrik'ãri, p'era pùk'a beeji ma soldaorã poropa jara bada k'aurepa. Mapa ichi ome nipapataarãmaa mãgaji:
—Mùa wãarata jararu. Israelitaarã t'ãide na eperãk'a apida waide unu–e bù, iru wãara ijãapari perã. 11 Eperãarã chok'ara chedait'ee ak'õrejîru uchiapari eereepa mãik'aapa ak'õrejîru baaipari eereepa. Mãùrãta Tachi Ak'õre truade su–ak'ù p'ana chedait'ee nek'ode Abraham ome, Isaac ome mãik'aapa Jacob ome. 12 Mamîda chi ùt'ari p'anadaipia bùùrã Ak'õrepa jërek'ooit'eeda aji, taawaa p'ãriudee, atua beerã ome jêedamerã mãik'aapa k'ida kierrkierree para bamerã p'uapa.
13 Mãga jarap'eda, Jesupa ma soldaorã poromaa mãgaji:
—Wãpáde aji, pùchi temaa pùa ijãadak'a uchiada perã.
Aramata chi k'ayaa bada jùpadachi.
Jesupa Pedro p'ãk'õre jùpada
(Marcos 1.29-31; Lucas 4.38-39)
14 Mãpai Jesús wãji Pedro temaa. Mama ununaji Pedro p'ãk'õre k'ayaa bù k'ùamiapa. P'arude baji k'ayaa bada perã. 15 Jesupa iru jua t'õbaik'ãri, ma k'ùamia tuudachi. Mãpai ma wêra p'irabaidaip'eda, nek'opiji Jesumaa.
Jesupa k'ayaa beerã chok'ara jùpada
(Marcos 1.32-34; Lucas 4.40-41)
16 K'eudaik'ãri, netuara k'ap'ùade merãtùa beerã chok'ara aneejida Jesumaa. Pedee jarada abaapa netuaraarã jõmaweda uchiapik'ooji. Ichiaba k'ayaa beerã jõmaweda jùpak'ooji. 17 Mãga ooji p'asamerã Tachi Ak'õre pedee jarapari Isaiapa chonaarãweda jaradak'a:
‘Irua k'ayaa tachimaa baridap'edaa awara ãyaa ataji mãik'aapa tachi k'ayaa beerã jùpaji.’ (Isaías 53.4)
Jesús ome nipa k'inia p'anadap'edaarã
(Lucas 9.57-62)
18 Awaraa ewaride Jesupa unuk'ãri eperãarã chok'ara ichi wap'ùra iru p'anù, chi k'õp'ãyoorãmaa jaraji sîadait'ee lago k'îraik'a eeree. 19 Mamîda wãdai naaweda, Moisepa p'ãda jarateepari k'ait'a cheji mãik'aapa mãgaji:
—Tachi Jarateepari, pù ome wã k'inia bùda aji, chi wãrumaa.
20 Jesupa p'anauji:
—Usap'å yooro te uria iru bee mãik'aapa ipanaarã te iru bee. Mamîda mù, chi Eperã Ak'õre Truadepemaa arajãgaa ni, k'ãipari wêe. Made k'îsíaji jarai naaweda wãara mù ome nipa k'inia bù wa mãga–e.
21 Awaraa Jesús ome nipadapa mãgaji:
—Tachi Waibùa, mù jida pù ome nipaparii k'inia bù. Mamîda aù naaweda, mù ak'õre ùapipáde aji, iru piuk'ãri.
22 Jesupa p'anauji:
—Chepáde aji, mù ome mãik'aapa ichiak'au bùpáde aji, atuadait'eerãpa ãchi piudap'edaarã ùadamerã.
Jesupa nãu p'usa ome t'umãtùpida
(Marcos 4.35-41; Lucas 8.22-25)
23 Ma t'êepai Jesús wãji barcode chi k'õp'ãyoorã ome. 24 Mãga nùde p'usara t'o nâbeeji. P'usapa barco pirubaai wã nipaji. Mãùmisa Jesús k'ãi baji. 25 Mapa chi k'õp'ãyoorãpa ârùmat'aajida mãik'aapa mãgajida:
—Tachi Waibùa, ¡tai k'aripáji! ¡Tachi pirubaai wãdapù!
26 Jesupa p'anauji:
—¿Sãap'eda p'era jõnùma? aji. ¡Parã pia ijãada–e p'anùda! aji.
Mãga jarap'eda, p'irabaidachi mãik'aapa pedeeji nãumaa mãik'aapa p'usamaa. Aweda jõma ip'ii ûu beeji. 27 Mãga unudak'ãri, chi k'õp'ãyoorã ak'ùtrua para beeji mãik'aapa ãchi pitapai iidi para beeji:
—¿K'aima ajida, nãgà? Nãu, p'usa paara iru pedee ûripatada ajida.
Eperãarã k'ap'ùade netuara merãtùa bada
(Marcos 5.1-20; Lucas 8.26-39)
28 Jesús chi k'õp'ãyoorã ome panadak'ãri lago k'îraik'a eere Gadara eujãde, jãùra mãu te uriade badadeepa uchiajida eperãarã omé netuara ãchi k'ap'ùade merãtùa bee. Ma eperãarã Jesús k'ait'a chejida. Ãchi audú t'ãri k'achia–idaa p'anadap'edaa perã, eperãarã ma ode p'oyaa wãyaadak'aa paji. 29 Jesumaa bia chejida:
—¡Jesús, Ak'õre Waibùa Warra, tai ome t'îunáaji! ¿At'ãri–eweda tai miapide cheji–ek'ã? ajida.
30 Ma k'ait'a sinaarã chok'ara nek'omaa p'anajida. 31 Mapa netuaraarãpa Jesumaa chupùria iidijida ma sinaarã k'ap'ùade t'îupimerã.
32 Aramãgá Jesupa jaraji mamaa wãdamerã. Mãpai ma netuaraarã ma eperãarã k'ap'ùadeepa uchiak'oodachida mãik'aapa sinaarã k'ap'ùade t'îudachida. Aramata sinaarã jõmaweda p'irak'oodachida ee k'õot'ari jira bùdee. Mata lagode baainajida mãik'aapa âyapa jâak'oodachida.