Jesupa jarateeda ne–inaa pia oo k'awaadamerã
6
1 —K'îrak'aupai awaraarã taide ne–inaa pia oodai Tachi Ak'õre–it'ee, ãchia t'o p'anadamerã. Mãga ooruta pùrã, parã ùt'aripema Ak'õre Waibùapa parãmaa tee–e pait'ee ne–inaa pia ichia k'îsia iru bù teeit'ee ichideerãmaa.2 +Maperã parãdepemapa ne–inaa chupùria beerãmaa teek'ãri, jõmaarãmaa pùa ooda jaranáaji. Seewata Tachi Ak'õrede ijãapatada apataarãpa mãga oopata Tachi Ak'õre Ûraa jarateepata tede mãik'aapa calle jãde, eperãarãpa ãchi t'o p'anadamerã. Mùa wãarata jararu. Ma t'o p'anùùrã pedee pia aupai iru p'anadait'ee, Tachi Ak'õrepa ãchimaa tee–e pait'ee perã ne–inaa pia irua k'îsia iru bùdepema. 3 Ãchia oopata k'ãyaara pùa net'aa teek'ãri chupùria beerãmaa, jaranáaji, pùchi k'õp'ãyo piara bùmaa paara. 4 K'îup'ee óoji pù ùt'aripema Ak'õre Waibùapa unu bairã. Ichiata ne–inaa pia teeit'ee pùmaa ichia k'îsia iru bùdepema.
Jesupa jarateeda ùt'aa t'â k'awaadamerã
(Lucas 11.2-4)
5 —Parãpa ùt'aa t'âdak'ãri, oonáatù Tachi Ak'õrede ijãapatada apataarãpa oopatak'a. Tachi Ak'õre Ûraa jarateepata tede jõmaarã taide ãchi ak'ùnâ p'aneepata ùt'aa t'âdait'ee. Ichiaba p'uuru jãde plaza bee k'idaa mãga oopata eperãarãpa unudamerã. Mùa wãarata jararu. Eperãarã pia pedeepata aupai iru p'anadait'ee. 6 Maperã pù ùt'aa t'âk'ãri, pùchi cuartode t'ìuji mãik'aapa chi puerta pia jçaji. Mãpai ùt'aa t'çji pùchi Ak'õre Waibùamaa, iru mama bairã pù ome. Irua pùa oomaa bù unuk'ãri, ne–inaa pia teeit'ee pùmaa, ichia k'îsia iru bùdepema ma ne–inaa ichideerãmaa teeit'ee.
7 +Ùt'aa t'âk'ãri, pia–e bù ip'ii ichi aù pedeeta jara nâbait'ee. Ijãadak'aa beerãpa mãga oopata, k'îsiapata perã audú pedee jõnùpa Tachi Ak'õrepa audupùara ûriit'ee. 8 Mãùrãk'a p'ananáatù, Tachi Ak'õrepa k'awa bapari perã parãpa falta p'anù, iididai naaweda. 9 Nãga ùt'aa t'âdaipia bù:
‘Tachi Ak'õre ùt'ari bù,
pù t'â awaraa t'â k'ãyaara pipùara bù.
10 Eperãarã bàji pùchi jua ek'ari pùchideerã p'aneedamerã.
Óoji pùchia k'inia bùk'a na p'ek'au eujãde, ùt'ari ooparik'a.
11 Tai–it'ee chik'o téeji ewari chaa k'odait'ee.
12 Taipa p'ek'au k'achia oopata chupùria k'awáaji mãik'aapa perdonáaji
taipa perdonaapatak'a, awaraarãpa taimaa ne–inaa k'achia oodak'ãri.
13 Tai k'achiade baaipináaji.
Tai k'aripa atáji Netuara Poro Waibùa juadeepa.’
14 +Parãpa perdonaaruta pùrã awaraarãpa ne–inaa k'achia oopata parãmaa, Tachi Ak'õre ùt'ari bùpa ichiaba perdonaait'ee parãpa ne–inaa k'achia oopata. 15 Mamîda parãpa perdonaada–e p'anù pùrã awaraarãpa ne–inaa k'achia oopata parãmaa, mãgara Tachi Ak'õrepa ichiaba perdonaa–e parãpa ne–inaa k'achia oopata.
Jesupa jarateeda nek'oda–ee ùt'aa t'â k'awaadamerã
16 —Parã nek'oda–ee p'anadak'ãri jîp'a k'îsiait'ee Ak'õre net'aade, k'îra pia–ee p'ananáatù Ak'õrede ijãapatada apataarãpa oopatak'a. Mãga nipapata awaraarãpa k'awaadamerã nek'oda–ee p'anù, mãik'aapa ãchi t'o p'anadamerã. Mùa wãarata jararu. Mãgapai iru p'anadait'ee. 17 Pù ùt'aa t'â bak'ãri nek'o–ee, k'îra sàùji mãik'aapa t'â–irúji 18 apidaapa k'awanaadamerã pù nek'o–ee bù. Eperãarãpa pù ùt'aripema Ak'õre Waibùa p'oyaa unuda–e p'anù mîda, irua k'awa bù pùa ne–inaa merã oo bù, pù ome bairã. Ma pari iruata ne–inaa pia teeit'ee pùmaa ichia k'îsia iru bùdepema.
Jesupa ùt'aripema ne–inaa piade jarateeda
(Lucas 12.33-34)
19 —P'arat'a, net'aa pia p'enáatù na p'ek'au eujãde p'anù misa iru p'anadait'ee, polillapa ma net'aa ãrit'aai perã, maa–e pùrã mogosiadarii perã taarã ùa iru bùpa, maa–e pùrã nechùapataarãpa chùa atadaridai perã. 20 Ma k'ãyaara jùràtù ùt'aripema ne–inaa iru p'anadait'ee, mãpema ne–inaa polillapa ãrik'aa perã, mogosiak'aa perã mãik'aapa nechùapataarã mama t'îudak'aa perã. 21 Na p'ek'au eujãdepema ne–inaa pia audú ata k'inia bak'ãri, pù t'ãri araa bait'ee ma ne–inaa ome. Jõdee ùt'aripema ne–inaa pia audú ata k'inia bak'ãri, pù t'ãri araa bait'ee mãgà ne–inaa ome.
Jesupa tachi taude jarateeda
(Lucas 11.34-36)
22 —Tachi tau lamparak'a âdaa pùk'a bù tachi k'ap'ùa–it'ee. Pùchi tau pia bak'ãri, k'ap'ùa jõmaweda âdaa pùk'a bùde bait'ee. 23 Mamîda pùchi tau k'achia bù pùrã, k'ap'ùa jõmaweda p'ãriu pùk'a bùde bait'ee. Mãgá pù k'ap'ùade âdaa pùk'a bù wãara p'ãriu pùk'a bù pùrã, audupùara p'ãriu pùk'a bùde bait'ee.
K'aita tachi chipari
(Lucas 16.13)
24 —Eperã chipariirã omé jua ek'ari mimia baik'araa bù. Mãga bù pùrã, chipari aba k'îra unuamaa iru bai mãik'aapa chi apema k'inia iru bai, maa–e pùrã abaapa jara bùk'a ooi mãik'aapa chi apemapa jara bùk'a ooamaa bai. Mãga pùk'a apidaapa ooda–e pai Tachi Ak'õrepa jara bùk'a, p'arat'a, *ichi–it'ee* net'aa pia p'e bù misa.
Tachi Ak'õrepa ichi warrarã pia ak'ù bapari
(Lucas 12.22-31)
25 —Maperã mùa jara bù: K'îsia jõnanáatù k'ãata k'odait'ee maa–e pùrã todait'ee, mãgá chok'ai p'anadait'ee. Ichiaba k'îsianáatù sãga p'aru atadait'ee. Tachi Ak'õrepa parã k'ap'ùa ooji mãik'aapa parã chok'ai p'anapiji. Mãga bùta, ¿p'aru tee–e paik'ã mãik'aapa chik'o, ne–inaa toparii tee–e paik'ã parãmaa? 26 Ak'àtù, ipanaarã ùt'à wãabai p'anù. Ãchia net'a tau uudak'aa, ewadak'aa mãik'aapa ùa bùdak'aa chi net'a tau ùapatamãi. Mamîda parã ùt'aripema Ak'õre Waibùapa ne–inaa teepari k'odamerã. ¡Iru–it'ee parã pipùara p'anù ipanaarã k'ãyaara! 27 Eperã audú k'îsia nâbùpa hora aba pida waa chok'ai ba–e pai.
28 +Ma awara ¿k'ãare–it'ee parã audú k'îsiapata p'aru–it'ee? Ak'àtù, sãga nep'ono p'ûajara t'ãide nâbù waripata. Mimiadak'aa mãik'aapa p'aru k'adak'aa mãgá pi–ia p'anadait'ee. 29 Mamîda mùa jara bù: Rey Salomonpa p'arat'ara, net'aa pia iru bapachi mîda, iru p'aru piara jâ bak'ãri, eperãarãpa iru pi–iara unuda–e paji nãgà nep'ono k'ãyaara. 30 Idi na p'ûajara wari wã. Mamîda nu uratùdaik'ãri, t'ùpùtaude paa jõdariit'ee. Tachi Ak'õrepa mãgá pia ak'ù bù pùrã nep'ono p'ûajara t'ãide nâbù, audupùara parã ak'ù bapariit'ee, at'ãri irude mak'ùara ijãada–e p'anù mîda. 31 Tachi Ak'õrepa mãgá ichia ooda pia ak'ù bapari perã, k'îsia jõnanáatù: “¿K'ãata k'odait'ee?” maa–e pùrã “¿K'ãata todait'ee?” maa–e pùrã “¿K'ãata jâdait'ee?” 32 Mãgá k'îsiapata ijãadak'aa beerãpa. Mamîda paråpata ùt'aripema Ak'õre Waibùa iru p'anù. Irua k'awa bù ne–inaa parãpa falta p'anù. 33 Maperãpù naapùara jùràtù iru jua ek'ari p'anapataadait'ee mãik'aapa oopatáatù irua jara bùk'a. Mãga ooruta pùrã, ma ne–inaa jõma iru p'anadait'ee. 34 Audú k'îsianáatù nupema ne–inaade, nu ne–inaa paraait'ee perã aùde k'îsiadamerã. Ewari chaa ne–inaa audupai paraa aùde k'îsiadamerã.