3
1 Jõmaarã Ak'õre Waibùapa nãga p'anau bù: “Mùa mù pedee jarapari mù naa pëiit'ee o pia oomerã. Maapai atu p'anùde chi Ak'õre Waibùa parãpa jùrùmaa p'anù ichi tedee cheit'ee. Iruata pacto parãpa ûri k'inia bù parãmaa jara cheit'ee.2 Mamîda ¿k'aipa iru cheru ewate chooima? ¿K'aita iru k'îrapite ak'ù nâbaima/ bedabai–e pait'eema iru chek'ãri? Apidaapa mãga oo–e pai iru t'ùpùtauk'a bait'ee perã eperãpa metal aùde wãyaa pëik'ãri nejarra jõmaweda paa jõmerã maa–e pùrã jabonk'a bait'ee perã mãgùpa eperãpa ne–inaa audú jaik'oo bù sùùdak'ãri. 3 Eperã su–ak'ù beep'eda, p'arat'a t'ùpùtaude wãyaa pëiparik'a nejarra jõmaweda aùde nâbù paa jõmerã, mãga pùk'a charrak'a iru su–ak'ù beeit'ee Levideepa uchiadap'edaarãpa oopatap'edaa ak'ùde jarait'ee pia wa k'achia. Maap'eda ãrapa Jõmaarã Ak'õre Waibùamaa primicia irua k'inia bùk'a aneedait'ee. 4 Ãrapa mãga oodak'ãri Judá eujãdepemaarãpa ne–inaa mù–it'ee aneedap'edaa ome mãik'aapa Jerusalén p'uurudepemaarãpa ne–inaa mù–it'ee aneedap'edaa ome, mù, Jõmaarã Ak'õre Waibùapa ma primicia pia ak'ùit'ee chonaarãwedapemaarãpa primicia aneedap'edaa ak'ùparidak'a.
5 Mùa parã t'ãidee cheit'ee charrak'a parãpa oopatap'edaa ak'ùde jarait'ee pia wa k'achia. Parã atu p'anùde mùa nãgee eperãarã parã t'ãide p'anapataarã ùmùateeit'ee: chi ne–inaa p'asait'ee k'awapata apataarãpa; chi miak'ãi p'anùùrã awaraarã ome k'ãipataarã; chi seewa jarapataarãpa awaraarã k'achiade baaipidait'ee; chi mimiapataarãmaa p'aada–e p'anùùrãpa mãùrã mimiadap'edaa pari; chi ne–inaa k'achia oopataarãpa p'êtrãarãmaa wa ak'õre wêe beerãmaa wa awaraa eujãdepemaarãmaa. Mãgee eperãarãpa mù waaweeda–e p'anapata perã, mùa ãrapa oopata ak'ùk'ãri, k'achia bùda ait'ee. Mù, Jõmaarã Ak'õre Waibùapa mãga jara bù. 6 Mù, Jõmaarã Ak'õre Waibùapa ichita oopari mùa jara bùk'a. Maperã mùa parã Jacobdeepa uchiadap'edaarã jõpi–e pait'ee.
Net'aa primiciak'a Tachi Ak'õre–it'ee aneeda–e p'anadap'edaa
7 Parã chonaarãpa oopatap'edaak'a parãpa mù leyde jara bù ûridaamaa p'anapata mãik'aapa oodaamaa p'anapata made jara bùk'a. Waya mùde ijãapatáatù. Mãga ooruta pùrã, mùa parã waya ak'ùpariit'ee. Jõmaarã Ak'õre Waibùapa mãga jara bù.
Mamîda mùa mãga jarak'ãri, parãpa p'anaupata: “¿Sãgá taipa waya pùde ijãapataadaipia bùma?” apata.
8 ¿Eperãpa Tachi Ak'õre net'aa chùa ataima? ¡Parãpa mù net'aa chùa atapata mùmaa primicia aneeda–e p'anadak'ãri!
Mãga oo p'anùde at'ãri iidipata: “¿Sãgá taipa pù net'aa chùa ata p'anùma?” apata.
Mù net'aa chùa ata p'anù mù–it'ee parãpa ne–inaa diez chaa iru p'anùdepema aba aneeda–e p'anadak'ãri mãik'aapa ne–inaa parãpa mù–it'ee awara bùdap'edaa primiciak'a teedait'ee aneeda–e p'anadak'ãri. 9 Parãpa mãgá mù net'aa chùa ata p'anù perã, parã jõmaweda k'achiade baaidait'ee.
10 Parãpa ne–inaa jõmaweda iru p'anùdepema ne–inaa diezdepema chaa aba mù tede bee ùapatamaa aneeruta pùrã, ne–inaa k'opata mù tede paraait'ee. Ma jõma anéetù k'awaadait'ee mùa parãpa oopata pia ak'ùi wa mãga–e. Aneeruta pùrã, mù, Jõmaarã Ak'õre Waibùapa jara bù mùa pajã ewa pùk'apiit'ee k'oi chemerã parã eujãde mãik'aapa parãpa ne–uudap'edaa audú chaumerã k'oi golpe chek'ãri, audú pania paraaparik'a. 11 Ma awara sisi chepi–e pait'ee parã eujãde. Mãgá sisipa k'oda–e pai parãpa ne–uudap'edaa mãik'aapa uvajõ parã uva k'ãide bee baaipida–e pai waraadai naaweda. Mù, Jõmaarã Ak'õre Waibùapa mãga jara bù. 12 Mùa parã mãgá k'aripak'ãri, awaraa eujãdepemaarã jõmaarãpa parã ‘eperãarã Tachi Ak'õrepa pia ak'ùpariirã’ apataadait'ee parã eujã pi–ia unudait'ee perã. Mù, Jõmaarã Ak'õre Waibùapa mãga jara bù.
Tachi Ak'õrepa irude ijãapataarã pia ak'ùpariit'ee
13 Jõmaarã Ak'õre Waibùapa mãga bù: “Parãpa mù ãpùte pedee k'achia jaradooda.”
Mamîda parãpa iidipata: “¿K'ãare pedee pù ãpùte jaradoodama?” apata.
14 Parãpa nãga jaradooda: “Pari tachia oopata Tachi Ak'õrepa jara bùk'a. ¿K'ãare ne–inaa pia atapatama Jõmaarã Ak'õre Waibùapa oopi bùk'a oopata pari mãik'aapa iru k'îrapite k'îra pia–ee nipapata pari chi–ùapataarãpa oopatak'a? Tachia mãga oopata k'aurepa irua tachi piara ak'ù–e. 15 Mapa tai–it'ee audua beerã t'ãri o–îa p'anapata mãik'aapa ne–inaa k'achia oopataarã pia p'anapata. Mãgeerãpa ichi k'inia oodak'ãri ne–inaa k'achia Ak'õre Waibùapa jara bù oonaadamerã, irua ãramaa maarepida k'achia oo–eda” ajida.
16 Maap'eda Jõmaarã Ak'õre Waibùa waaweepataarã mãik'aapa iru t'â t'o p'anapataarã ãchi pitapai pedeejida mãik'aapa irua ãra pedee ûrik'ãri, ichi k'îrapite ãra t'â librode p'ãpiji.
17 Jõmaarã Ak'õre Waibùapa nãga jara bù: “Ewari mùa awara bùdade mãùrã mùchideerã p'aneedait'ee. Mùa ãra chupùria k'awaait'ee ak'õrepa chi warra chok'ek'ee bù chupùria k'awaaparik'a. 18 Maapai parãpa k'awadait'ee chisãgà eperãarã t'ãri pia beerã mãik'aapa chisãgùùrã k'achia beerã; chi sãgà eperãarãpa mùa jara bùk'a oopata mãik'aapa chisãgùùrãpa mùa jara bùk'a ooda–e.