Tachi Ak'õrepa p'aareerãmaa ne–inaa k'achia ooit'ee
2
1 Ârá mù, Jõmaarã Ak'õre Waibùapa nãga jara bù parã p'aareerãpa oopataadamerã. 2 Parãpa mù, Jõmaarã Ak'õre Waibùapa jara bù ûridaamaa p'anù pùrã mãik'aapa t'ãripa mù waawee p'anadaamaa p'anù pùrã, mùa parãmaa ne–inaa k'achia ooit'ee mãik'aapa parãpa ne–inaa pia oopata paara k'achiade baaipiit'ee. Wãara âraweda mùa mãga oomaa bù parãpa t'ãripa mù waaweedak'aa p'anadairã.3 Parã mãga p'anadairã mùa parãdeepa uchiadait'eerãmaa paara ne–inaa k'achia ooit'ee. Ma awara fiesta oo p'anùde parãpa ne–animalaarã peedak'ãri mù–it'ee paadait'ee, ma ne–animalaarã jâsi, ã beeda parã k'îramaa bat'apiit'ee mãik'aapa parã ma ne–inaa k'achia ome p'uurudeepa taawa ateepiit'ee, mãgá k'îra nejasia p'aneedamerã. 4 Mãga p'asak'ãri, parãpa k'awadait'ee wãara mùa ooji na ùtrùa pedeede jara bùk'a. Mùa oo k'inia bù mùa jaradak'a pacto ook'ãri Levideepa uchiadap'edaarã, pia jarait'eera p'aareerã ome. Mù, Jõmaarã Ak'õre Waibùapa mãga jara bù. 5 Ãra ome ma pacto ook'ãri, mùa jaraji ãra pia ak'ù bapariit'ee mãik'aapa k'ãiwee p'anapiit'ee ãrapa jõdee mù waawee p'anadamerã mãik'aapa mùa jara bùk'a oopataadamerã. Ãrapa mãga oopachida. 6 Maapai ãrapa wãara jarateepachida mùa eperãarãmaa oopi k'inia bù. Ãra it'aideepa seewa pedee uchiadak'aa paji. Mù ome t'ãri auk'a p'anapachida mãik'aapa k'îra jîp'a nipapachida mùa k'inia bùk'a. Mãgá eperãarã chok'araarãmaa p'ek'au k'achia oo amaapipachida.
7 P'aareerãpa eperãarãmaa mãgá k'îsia k'awaa pedee jarateedaipia bù ãra k'aurepa eperãarãpa mù ley piara k'awadamerã. Mãga oodaipia bù mù, Jõmaarã Ak'õre Waibùa k'ap'ùa pari eperãarãmaa jarateepata perã. 8 Mamîda paråpata mãga oodak'aa. Eperãarãmaa jarateedai k'ãyaara mùa jara bùk'a nipapataadamerã, ãra chok'araarãmaa jarateepata parãk'a k'îra jîp'a–e nipapataadamerã. Mãga oodak'ãri, oodak'aa mùa ma pactode parã chonaarã Levideepa uchiadap'edaarã ome oodade jara bùk'a. Mù, Jõmaarã Ak'õre Waibùapa mãga jara bù. 9 Maperã mùa mùchi p'uuru pidaarãmaa k'îsiapiit'ee parã pia–ee ak'ùpataadamerã mãik'aapa k'îra unuamaa iru p'anapataadamerã. Mãga oodait'ee parãpa mù leyde jara bùk'a ooda–e p'anadairã mãik'aapa mù ley jarateedak'ãri, eperãarã ûk'uru awaraarã k'ãyaara piara ak'ùpata perã.
Tachi Ak'õrepa jara bùk'a oodaamaa p'anadap'edaa
10 ¿Tachia Ak'õre apai iru p'anù–ek'ã? ¿Ak'õre Waibùa apaipa tachi ooji–ek'ã? Mãga bùta, ¿sãap'eda tachi pitapai traicionaapatama? ¿Sãap'eda ooda–e p'anùma Ak'õre Waibùapa tachi chonaarã ome pacto oodade jara bùk'a? 11 Parã Judá eujãdepemaarãpa Tachi Ak'õrepa jara bùk'a ooda–e p'anù. Israel eujãde, Jerusalén p'uurude paara ne–inaa Ak'õre Waibùapa unuamaa iru bù oomaa p'anù. Ak'õre Waibùa te irua k'inia bù k'achiade baaipi wãruta, wêraarã awaraa ak'õre waibùa apataarãde ijãapataarã ome miak'ãi wãruta perã. 12 Mùa k'inia bù Ak'õre Waibùapa ma ne–inaa audú k'achia oo p'anùùrã ãchideerã ome israelitaarã p'anapatamãiipa jërek'oomerã, eperãarã waibùa p'anù mîda wa ek'ariarã bù mîda, primicia Tachi Ak'õremaa teepataarã pùjida.
13 Parãpa ne–inaa awaraa Jõmaarã Ak'õre Waibùapa pia–ee ak'ùpari oopata. Iru altar bùmãi jêepata mãik'aapa t'ãri p'uapa biapata irua parãpa primicia aneedap'edaa pia ak'ù–e perã mãik'aapa parã ome t'ãri o–îa bee–e perã. 14 Mãgá jêe jõnùde iidipata: “¿Sãap'eda Ak'õre Waibùapa taipa primicia aneepata pia ak'ù–ema?” apata. Mùa iru pari p'anauit'ee. Irua ûri baji parãpa k'ûtrãaweda awêraarãmaa jaradak'ãri ãchi ome miak'ãidap'eda, ichita araa p'anapataadait'ee. ¡Ma wêraarã mãgá parã k'õp'ãyo pia p'anajida mîda, parãpa ãra amaat'aajida awaraa wêraarã ome p'aneedait'ee! 15 Ma k'ûtrãaweda wêra atadap'edaa ome araa p'aneedak'ãri, Ak'õre Waibùapa parã omé eperã apai pùk'a papiji k'ap'ùa apai pùk'a, t'ãri apai pùk'a araa p'anapataadamerã. ¿Sãap'eda irua mãga oojima? Mãga ooji k'inia bada perã parãpa warrarã oodamerã mãik'aapa waridamerã irua jara bùk'a, mãgá ãra ichiaba irude ijãapataadamerã. Maperã parã t'ãri jçatù. Parãpa k'ûtrãaweda wêraarã atadap'edaa amaat'aanáatù awaraa wêraarã ome p'aneedait'ee. 16 Mù, israelitaarã Ak'õre Waibùapa unuamaa iru bù eperãpa ichi wêra amaat'aak'ãri. Mù, Jõmaarã Ak'õre Waibùapa unuamaa iru bù eperãpa ichia ne–inaa k'achia oopari merã k'inia bak'ãri ichi p'aru jâ bù edupema eere.
Maperã parã t'ãri jçatù. Ichita óotù parãpa awaraarãmaa jarapatak'a.
Tachi Ak'õre ewari waibùa ewate
17 Jõmaarã Ak'õre Waibùa sêdaipari parãpa jara jõnù ûrik'ãri.
Mamîda mùa mãga jarak'ãri, parãpa p'anaupata: “¿Sãgá taipa iru sêpipatama?
Mùa nãga p'anau bù. Parãpa iru sêpipata nãga jaradak'ãri: “Tachi Ak'õre–it'ee chi ne–inaa k'achia oopari pia pùk'a bù. Ak'õre Waibùa o–îa pùk'a bùda apata, mãgee eperãarã ome.” Iru mãgá sêpipata iru ãpùte jaradak'ãri: “Sãma bùma apata, Ak'õre Waibùa, chi k'achia beerã miapiparipa?”