Zacarías
Tachi Ak'õre pedee jarapari Zacariapa p'ãda
Tachi Ak'õrepa ichi p'uuru pidaarãmaa jara pëida ichi pedee jarapari Zacarías k'ap'ùa pari
1
1 Persiadepema rey Darío año omé rey bùde atane ochode, Jõmaarã Ak'õre Waibùapa pedee na librode p'ã bù k'awapiji ichi pedee jarapari Zacariamaa. Zacarías Berequías warra mãik'aapa Idó ãichak'e paji. Jõmaarã Ak'õre Waibùapa irumaa mãgaji:2 “Mù, Jõmaarã Ak'õre Waibùa, k'îrau baji parã israelitaarã chonaarã ome. 3 Mapa mù p'uuru pidaarãmaa nãga jaráji: ‘Waya mùde ijãapatáatù. Mãga ooruta pùrã, mùa parã waya ak'ùpariit'ee. Mù, Jõmaarã Ak'õre Waibùapa mãga jara bù. 4 Oonáatù parã chonaarãpa oopatap'edaak'a. Chonaarãweda mù pedee jarapataarãpa mù pari ãramaa jarajida mîda ãrapa ne–inaa k'achia oopatap'edaa oo amaadamerã, mù pedee ûridaamaa p'anapachida. Mù, Jõmaarã Ak'õre Waibùapa mãga jara bù. 5 Mamîda ârá parã chonaarã, mãgà pedee jarapataarã paara nama wê–e. ¿Mãga–ek'ã? 6 Parã chonaarãpa mãgá mùa jarapida mù pedee jarapataarãmaa ûridaamaa p'aneedak'ãri, mùa ãra k'achiade baaipiji. Mamîda t'êepai ãrapa k'îsia awara atajida k'awadak'ãri wãara mù, Jõmaarã Ak'õre Waibùapa ooji mùa ooipia badak'a ãra ome. Mãga k'awadak'ãri mùde waya ijãa p'aneejida mãik'aapa mùa jara bùk'a oo p'aneejida.
Zacariapa caballo ârù wãpataarã unuda
7 Rey Darío año omé rey bùde atane once sebatde ewari veinticuatrode Jõmaarã Ak'õre Waibùapa mù, ichi pedee jarapari Zacariamaa nãga unupiji. 8 P'ãrik'ua k'ãimok'araa pùk'a bùde mùa nãga unuji: Jõmaarã Ak'õre Waibùa ángel caballo p'oree bù ârù su–ak'ù baji arrayán pak'uru jep'edaa jêra bùde, to chak'e ide bada eujã jewedaade. Ma caballo ãpùte mùa unuji awaraa caballoorã eperãarã aù ârù su–ak'ù p'anù. Ma caballoorã p'oree, chocolatee, t'orroo p'anajida. 9 Mùa mãga unuk'ãri, mù ik'aawa bada angelmaa iidiji: “Mùchi Waibùa, ¿jãgùùrã k'áirãma?” aji. Mãpai ma angelpa p'anauji: “Mùa pùmaa ak'ùpiit'eeda aji, k'airã ãra.” 10 Mãpai ma ángel arrayán pak'uru jêra bùde badapa mãgaji: “Nãgùùrã Jõmaarã Ak'õre Waibùapa pëidaarã na p'ek'au eujã jõmaade p'ùrrùadamerã mãik'aapa ak'ùdamerã.”
11 Mãpai ma caballo ârù su–ak'ù p'anadap'edaarãpa Ak'õre Waibùa ángel ma arrayán pak'uru jêra bùde badamaa mãgajida: “P'ek'au eujã jõmaade p'ùrrùajida mãik'aapa unujida eperãarã reyrã poro waibùa jua ek'ari k'ãiwee, chõoda–ee p'anapata.” 12 Mãpai Jõmaarã Ak'õre Waibùa angelpa mãgaji: “Tachi Ak'õre Waibùa, setenta año wãyaaru misa, pù k'îrau bapachi Jerusalén p'uurudepemaarã ome mãik'aapa awaraa Judá eujãde bee p'uurudepemaarã ome. ¿Sãapai ãra chupùria k'awaait'eema mãik'aapa k'inia iru bapariit'eema?” aji.
13 Mãpai Jõmaarã Ak'õre Waibùapa pedee pia jaraji mù ik'aawa bada angelmaa t'ãri o–îa beemerã. 14 Mãpai ma angelpa mùmaa jaraji nãga jaramerã eperãarãmaa: “Nãga jara bùda aji, Jõmaarã Ak'õre Waibùapa: ‘Mùa Jerusalén p'uuru Sión ee ome audú k'inia iru baparida a bù. 15 Mapa ârá mù k'îrau bù awaraa eujãdepemaarã ome, mùa mãùrã pëik'ãri mù pari mù eperãarã miapidamerã, ãra audú miapidap'eda, k'ãiwee p'anapatap'edaa perã. 16 Maperã mù, Jõmaarã Ak'õre Waibùapa nãga jara bùda a bù: Ârapù mùa waya Jerusalén p'uurudepemaarã chupùria k'awaait'ee mãik'aapa ãra p'uuru, mù te paara waya chiwidi oopiit'ee.’ ”
17 Ma awara ma ángel mù ik'aawa badapa mãgaji: “Eperãarãmaa ichiaba nãga jarapáde aji: ‘Jõmaarã Ak'õre Waibùapa nãga jara bù: Mùa mù eperãarã p'uuru pia ak'ù bapariit'ee aùde p'anapataarã p'arat'ara p'aneedamerã mãik'aapa k'ãiwee p'anapataadamerã. Sión eede p'anapataarã t'ãri piapiit'ee mãik'aapa waya jarait'eeda a bù, Jerusalén p'uuru mùa jùrùt'erada aùde bapariit'ee.’ ”
Zacariapa cacho k'îmari unuda
18 Awaraa k'ãimok'araa pùk'a bùde mùa cacho k'îmari unuji. 19 Mãga unuk'ãri, ma ángel mù ik'aawa badamaa mùa iidiji ma cacho k'îmari k'ãata jara k'inia bù. Irua p'anauji: “Ma cacho jara k'inia bù awaraa eujãdepemaarã, ãchi juapa Judá eujãdepemaarã, Israel eujãdepemaarã mãik'aapa Jerusalén p'uurudepemaarã jîchoopidap'edaa perã.’
20 Ma t'êepai Jõmaarã Ak'õre Waibùapa mùmaa ne–inaa hierrodee oopataarã k'îmari unupiji. 21 Mùa mãga unuk'ãri, ma angelmaa iidiji: “Ma ne–inaa hierrodee oopataarã, ¿k'ãata oo chejidama?” aji. Irua mùmaa p'anauji: “Ma cacho jara k'inia baji awaraa eujãdepemaarãpa Judá eujãdepemaarã jîchoopidap'edaa mãik'aapa p'oyaadap'edaa k'îra nejasia nipapataadamerã. Jõdee jãgà ne–inaa hierrodee oopataarã jara k'inia bù ma eujãdepemaarã k'îra unuamaa iru p'anapataarã cheruta ãra p'erapide mãik'aapa ãra cacho t'ùap'ede juatau wêe p'aneedamerã. Mãga oodait'ee ma eujãdepemaarãpa Judá eujãdepemaarã mãgá jîchoopidap'edaa perã ne–animalpa ichi cachopa awaraa ne–animalaarã jîchoopiparik'a.