Zacariapa metro chaapari cinturonk'a bù unuda
2
1 Awaraa k'ãimok'araa pùk'a bùde mùa unuji k'ûtrãa metro chaapari cinturonk'a bù ome ichi juade. 2 Mãpai mùa irumaa iidiji: “¿Sãma wãruma?” aji. Irua p'anauji: “Mùa Jerusalén p'uuru chaanait'eeda aji, k'awaait'ee jõmasaa metro chi teesoo, chi jet'ee ome.”3 Mãpai mùa unuji ma ángel mù ik'aawa bainâ bada wãru awaraa ángel ome k'îra chuude. 4 Unudak'ãri irua mãgaji chi apemamaa: “P'iráji ma k'ûtrãa metro chaapari cinturonk'a bù ome ichi juade; mãgùmaa mãik'aapa irumaa nãga jaráji: ‘Jerusalén p'uuru chaanáaji. Ma p'uurude eperãarã chok'ara waya p'anapataadait'ee, ne–animalaarã chok'ara paara. Mãgá audú chok'ara paraait'ee perã, muralla ooda–e pait'ee ma p'uuru t'ùak'au bùdait'ee. 5 Jõmaarã Ak'õre Waibùapa jara bù: Mùta Jerusalén p'uuru t'ùak'au bù muralla t'ùpùtaudee oodák'apù bait'ee mãik'aapa ma p'uuru jãde mùchi k'îra wãree unupiit'ee.’ ”
Jõmaarã Ak'õre Waibùapa ichi eperãarã k'aripait'ee
6 Jõmaarã Ak'õre Waibùapa ichi eperãarãmaa jara bù: “¡Ûrítù! ¡Isapai uchíatù norte eerepema eujãdeepa mùa parã jîchoopiji mîda mamaa wãdamerã! 7 Parã jîchoodap'eda, p'ananadap'edaamãi, Babilonia eujãdeepa isapai uchíatù mãik'aapa wåtù Sión p'uurudee. Mù, Jõmaarã Ak'õre Waibùapa mãga jara bù.”
8 Jõmaarã Ak'õre Waibùa ichi juapa mù pëiji nãga jaramerã ma eujãdepemaarã, parã net'aa jãri atadap'edaarãmaa: “Apidaarãpa mù p'uuru pidaarãmaa ne–inaa k'achia ooru pùrã, mùchi taumaa ne–inaa k'achia ook'ajik'a bait'ee. 9 Mùata mãgùùrã ome chõoit'ee mãik'aapa p'oyaait'ee. Maap'eda ãra esclavoorãmaa ãra net'aa jãri atapiit'ee.” Mãga p'asak'ãri, parãpa k'awaadait'ee Jõmaarã Ak'õre Waibùapa mù pëiji.
10 Jõmaarã Ak'õre Waibùapa jara bù: “¡Jerusalén p'uurudepemaarã, k'arítù o–îapa mù parã t'ãide bapariit'ee perã!” 11 Maapai awara–awaraa eujãdepemaarã chok'ara iru jua ek'ari p'aneedait'ee ichideerãk'a mãik'aapa irua jarait'ee: “Na p'uuru pidaarã ichiaba mùchideerã p'anadait'ee. Parã t'ãide paara mù bapariit'ee.” Mãga p'asak'ãri, parãpa k'awaadait'ee Jõmaarã Ak'õre Waibùapa mù pëiji. 12 Maapai Jõmaarã Ak'õre Waibùapa Judá eujã awara bùit'ee ichi–it'ee mãik'aapa waya jarait'ee Jerusalén p'uuru ichia jùrùt'erada aùde bapariit'ee.
13 ¡Jõmaarã Ak'õre Waibùa k'îrapite eperãarã jõmaweda k'îup'ee p'anéetù iru cheru perã ichi ùt'aripema baparimãiipa!