Zacariapa p'aareerã poro waibùa Josué unuda
3
1 Maap'eda k'ãimok'araa pùk'a bùde Jõmaarã Ak'õre Waibùapa mùmaa nãga unupiji: p'aareerã poro waibùa Josué ak'ùnâ baji Jõmaarã Ak'õre Waibùa ángel k'îrapite. Josué juaraare ángel eperãarã ùmùateepari ak'ùnâ baji iru ùmùateeit'ee. 2 Mãpai Ak'õre Waibùa angelpa ma ùmùateeparimaa mãgaji: “Satanás, ¡Jõmaarã Ak'õre Waibùapa pù ùtrùaipia bùda! aji. ¡Jõmaarã Ak'õre Waibùa, chi Jerusalén p'uuru jùrùt'eradapa pù k'îup'eepiipia bùpù! Irua na eperã ome oojida aji, eperãpa t'ùpù k'îra t'ùpùtau urua nâbùde jita atak'ajik'a paa jõnaamerã.” 3 Mãga nùde Josué p'aru jaik'oo jâ bù ak'ùnâ baji Jõmaarã Ak'õre Waibùa ángel k'îrapite. 4 Mãpai ma angelpa ichi k'aripapataarãmaa jaraji ma p'aru jaik'oo bù êra atadamerã. Mãpai Josuemaa mãgaji: “Ûríji. Ma p'aru jaik'oo bù mãgá êra atajida ak'ùpidait'ee mùa ãyaa bùji pùa p'ek'au k'achia oopariida. ¡Ârá mùa pùmaa p'aru pi–ia jâpiit'ee!” 5 Mãpai irua jaraji ma k'aripapataarãmaa p'aru pùrada maarepida jaik'oo wêe jâ bùdamerã Josué porode. Mãga oojida mãik'aapa ma t'êepai irumaa p'aru pi–ia jâ bùjida. Mãga oo p'anùde Jõmaarã Ak'õre Waibùa ángel at'ãri mama ak'ùnâ baji.6 T'êepai irua Josuemaa mãgaji: 7 Jõmaarã Ak'õre Waibùapa nãga jara bù: ‘Pùa mù leyde jara bùk'a ooru pùrã mãik'aapa p'aareerã poro waibùa mimia ooru pùrã mùa jaradak'a, pùa mù te, mù te ãuk'idaa patio paara pùchi jua ek'ari iru bapariit'ee mãik'aapa mùa pù pia ak'ùpariit'ee nãgà ùt'aripemaarã mù–it'ee mimiapataarã pia ak'ùparik'a. 8 Josué, p'aareerã poro waibùapa, awaraa p'aareerã poro waibùarãpa paara, pia ûrítù parã k'aurepa mùa ne–inaa pia ooit'ee perã. Mù mimiapari, eperã Daviddeepa uchiait'ee bù, Juat'ai apata, na eujãde uchiapiit'ee. 9 Ak'àtù. Mùa Josué k'îrapite mãu pi–ia bùmaa bù. Ma mãu pi–ia k'îra/bi siete iru bù. Mùchi juadoopa ma mãu pi–ia k'îrade pedee p'ãit'ee. Ewari abaade mùa na eujãdepemaarãpa p'ek'au k'achia oopata wêpapiit'ee. 10 Ma ewate parã jõmaarã k'ãiwee p'anapataadait'ee. Pãchi uva k'ãide mãik'aapa pãchi higuera pak'uru jêra bùde su–ak'ù p'aneedait'ee pãchi t'â pëidaarã ome. Mù, Jõmaarã Ak'õre Waibùapa mãga jara bù.’ ”