Malaquías
Tachi Ak'õre pedee jarapari Malaquiapa p'ãda
Tachi Ak'õrepa israelitaarã k'inia iru bapari
1
1 Jõmaarã Ak'õre Waibùapa israelitaarãmaa na pedee jara pëiji ichi pedee jarapari Malaquías k'ap'ùa pari.2 Jõmaarã Ak'õre Waibùapa jarapari: “Mùa parã k'inia iru baparida” apari. Mamîda mùa mãga jarak'ãri, parãpa p'anaupata: “¿Sãga k'awadayama, apata, pùa tai k'inia iru bapari?” Mãpai Jõmaarã Ak'õre Waibùapa p'anaupari: “Parãpa k'awa p'anù Esaú Jacob ome âpemaarã paji. Mamîda mùa parã chonaa Jacob k'inia iru bapachi; 3 jõdee Esaú k'iniak'aa paji. Mapa Esaudeepa uchiadap'edaarã ee jêra bùde p'anapatap'edaamãi mùa eujã pania wêe bù papiji, mama ne–animalaarã k'achia beerã aupai p'anapataadamerã.”
4 Edom pidaarã, Esaudeepa uchiadap'edaarãpa jararuta pùrã: “Tai eujãde p'uuru beeda ãrik'oojida mîda, ma eujãde taipa p'uuru pia waya oonadait'eeda” aruta pùrã, Jõmaarã Ak'õre Waibùapa jarait'ee: “Ãra eujãde p'uuru pia waya ooruta pùjida, mùa ma jõma waya ãripiit'ee. Maperã jõmaarãpa ãra eujã t'âjarapataadait'ee: ‘K'achia beerã eujã’ mãik'aapa ‘Ak'õre Waibùa ma eujãdepemaarã ome k'îrau bapari’.” 5 Pãchi taupa parãpa unudait'ee irua oo bù ma eujãdepemaarã ome mãik'aapa mãga unudak'ãri, jaradait'ee: “¡Israel eujã waawí paara Ak'õre Waibùa jõmaarã k'ãyaara waibùara bùda!” adait'ee.
Jõmaarã Ak'õre Waibùapa p'aareerã ùtrùada
6 Jõmaarã Ak'õre Waibùapa p'aareerãmaa nãga jara bù: “Warrapa ichi ak'õre *k'inia iru bapari mãik'aapa mimiaparipa oopari chi poro waibùapa jara bùk'a. Mùta parã Ak'õre Waibùa pùrã, ¿sãap'eda mù k'inia iru p'anada–ema? Mù parã poro waibùa pùrã, ¿sãap'eda ooda–ema mùa jara bùk'a? Mù, Jõmaarã Ak'õre Waibùapa mãga iidi bù parã p'aareerã mù waawee–ee p'anùùrãmaa.
Mamîda paråpata iidipata: ‘¿Sãgá taipa pù waawee–ee p'anùma ne–inaa aneedak'ãri paadait'ee?’ apata. 7 Mùa nãga p'anau bù: ‘Parãpa ne–inaa mùa aneepi–e bù aneedak'ãri mù altarde paadait'ee, ak'ùpipata mù waawee–ee p'anù.’
Mãga oo p'anùde at'ãri iidipata: ‘¿Sãgá taipa pù waawee–ee p'anùma?’ apata.
¿Mãga oo p'anù–ek'ã k'îsiapata perã mù altar paara waawee–ee p'anadai? 8 ¿Parãpa ne–animalaarã tau p'ãriu beerã wa chiwa beerã wa k'ayaa beerã aneedak'ãri mù–it'ee paadait'ee, k'îsiapatama ne–inaa pia oomaa p'anù? ¿Sãap'eda mãgee ne–animalaarã primiciak'a teeda–ema parã poro waibùarãmaa? ¿Mãgee ne–animalaarã irumaa teeruta pùrã, iru parã ome t'ãri pia beeik'ã maa–e pùrã parã pia ak'ù baik'ã? Mãga–epù. Mù, parã Ak'õre Waibùapa mãga jara bù.
9 Ârá Tachi Ak'õremaa mãgee ne–inaa téetù; mãgá k'awaadait'ee irua tachi chupùria k'awaai wa mãga–e. ¿Mãgee ne–inaa irumaa tee chedak'ãri, tachia chupùria iidi p'anù ûriit'eek'ã? Mãga–eda a bù Jõmaarã Ak'õre Waibùapa.
10 Piara bak'aji parãdepema abaapa mù te ãuk'idaa t'ùak'au bù t'îupata jâ bùmerã. ¡Mãgá parãpa mù altarde waa t'ùpùtau pari k'oopada–e pak'aji mãgee ne–animalaarã paadait'ee! Mù, Jõmaarã Ak'õre Waibùapa jara bù: Mù parã p'aareerã ome o–îa–e bù. Waa k'inia–e bù parãpa ne–inaa aneepata mùmaa primiciak'a teedait'ee. 11 Ak'õrejîru uchiaparimãiipa chi baaiparimaa na p'ek'au eujãdepemaarãpa mù t'o p'anapata mãik'aapa k'îra jîp'a mù–it'ee ne–inaa t'ûa bapari paapata mãik'aapa ne–animalaarã peepata mù–it'ee paapidait'ee. Ma eujãdepemaarãpa wãara mù waaweepata. Mù, Jõmaarã Ak'õre Waibùapa mãga jara bù. 12 Parãpa ak'ùpipata mù waaweeda–ee p'anapata mãik'aapa mù altar auk'a waaweeda–ee p'anapata made ne–animalaarã k'achia bee paadak'ãri, chi chiara beeda k'odaamaa p'anù perã. 13 ¿Parãpa nãga jarapata–ek'ã? ‘Jãgapaipù. Sêdaruta na mimia audú oomaa p'anadairã.’ Mãga jaradak'ãri, mù k'îraupipata. Mù, Jõmaarã Ak'õre Waibùapa mãga jara bù. ¿Parãpa k'îsiapatak'ã ne–animalaarã chùadap'edaa, chiwa bee maa–e pùrã k'ayaa bee mù–it'ee paadak'ãri, mùa parã pia ak'ùit'ee? ¡Mãga–epù! Mù, Jõmaarã Ak'õre Waibùapa mãga jara bù.
14 Eperãpa ichi ovejaarã p'e iru bùmãi oveja ùmùk'îra anida wêe iru bù pùrã mãik'aapa jararu pùrã mãgà oveja mù–it'ee paapiit'ee, mamîda t'êepai ma oveja k'ãyaara awaraa oveja t'uda anida bù mù–it'ee aneeru pùrã, ¡mùa ma eperã k'achia ooit'ee! Mùa mãga ooit'ee mù jõmaarã rey waibùa perã mãik'aapa awara–awaraa eujãdepemaarãpa mù waaweepata perã. Mù, Jõmaarã Ak'õre Waibùapa mãga jara bù.