Tachi Ak'õre ewari waibùa ewate p'asait'ee bù
14
1 Taarã–e nùde, ewari cherude Jõmaarã Ak'õre Waibùapa ooit'ee ichia k'îsia iru bùk'a. Jerusalén p'uuru, irua pù p'oyaapiit'ee pù k'îra unuamaa iru p'anapataarãmaa. Mãga pak'ãri, pù jãde mãùrãpa t'oodait'ee pùdepemaarã ne–inaa pi–ia jãri atadap'edaa. 2 Maapai Jõmaarã Ak'õre Waibùapa awara–awaraa eujãdepemaarã chip'epiit'ee Jerusalén p'uurudepemaarã ome chõo chedamerã. Ma chõo jõnùde mãùrãpa Jerusalén p'uurudepemaarã p'oyaadait'ee; ãra net'aa pi–ia jãri ata wãdait'ee mãik'aapa ãra wêraarã k'iniaamaa bùta k'ãipidait'ee. Maap'eda ma p'uurudepemaarã esa–auk'a presoorãk'a ãchi eujãdee ateedait'ee. Mãùrãpa eperãarã ateeda–e p'anadait'eerã aupai ma p'uurude p'aneedait'ee. 3 Mamîda t'êepai Jõmaarã Ak'õre Waibùa ma eujãdepemaarã ome chõo beeit'ee, irua ichita chõoparik'a ichi eperãarã k'aripait'ee. 4 Ma ewari ichi bùùrùpa ak'ù nâbeeit'ee Olivo eede; Jerusalén p'uuru oriente eere bùde. Mãga nùde Olivo ee t'oodariit'ee; esa–auk'a norte eeree, esa–auk'a sur eeree. 5 Ma ee t'ooda omé esajîak'a eujã jewedaa beeda wãit'ee Asal p'uuru parumaa. Ma eujã jewedaade parã jîchoodait'ee parã chonaarã jîchoodap'edaak'a awêrachai Judá eujãde wãyaak'ãri Ozías rey bak'ãri. Mãpai Jõmaarã Ak'õre Waibùa, mùchi Ak'õre Waibùa cheit'ee angeleerã ichi jua ek'ari mimiapataarã ome.6 Ma ewate âdaa beeit'ee; p'ãriu, k'ûrasaa wêe pait'ee. 7 Ma ewari awaraa ewarik'a pa–e pait'ee. P'ãrik'ua wê–e pait'ee jîp'a mãgá âdaa beeit'ee perã. Tachi Ak'õrepapai k'awa bù sãgá mãga pait'ee. 8 Ma ewateweda Jerusalén p'uurudeepa to wee nâbeeit'ee. Mãgà to weepariit'ee k'oi jara pak'ãri mãik'aapa p'oojara pak'ãri paara. Ma to jua omé nêra bait'ee. Esa–auk'a oriente eeree weeit'ee Mar Muerto parumaa. Chi apema esa–auk'a weeit'ee Mar Mediterráneo parumaa. 9 Maapai na p'ek'au eujãdepemaarã jõmaweda Jõmaarã Ak'õre Waibùa jua ek'ari p'anapataadait'ee. Jõmaarãpa iru t'â k'awadait'ee mãik'aapa irumaa aupai ùt'aa t'âpataadait'ee. 10 Judá eujã jõmaweda eujã jewedaa beeit'ee Jerusalén p'uuru norte eerepema Gueba p'uurudeepa sur eerepema Rimón p'uuru parumaa. Jõdee Jerusalén p'uuru eujã ùt'ùa bùde beeit'ee. Mama eperãarã p'anapataadait'ee muralladepema puerta Benjamín apatadeepa Ángulo apatamaa (mama muralladepema puerta Antigua apatap'edaa baji) mãik'aapa torre Jananel apatadeepa olivo piarsîpata rey–it'ee aceite oopatamaa. 11 Wãara maapai eperãarã Jerusalende k'ãiwee p'anapataadait'ee. Ma p'uuru waa jõk'aa pait'ee.
12 Mamîda mãga–e pait'ee Jerusalende chõode chepatap'edaarã ome. Jõmaarã Ak'õre Waibùapa ma eujãdepemaarãmaa k'ayaa k'achia baripiit'ee ãra chok'ai p'anùde ãchi chiara, tau, k'îrame paara mik'iadaidamerã. 13 Ma ewate Jõmaarã Ak'õre Waibùapa ãra audú p'erapiit'ee. Ãchi pitapai juapa chõo para bait'ee. 14 Maapai Judá eujãdepemaarã paara Jerusalén p'uurude chõodait'ee ma awaraa eujãdepemaarã ãchi eujã ik'aawa p'anapataarã ome mãik'aapa mãùrã p'oyaadap'eda, ãra p'arat'a, nêe, p'aru pi–ia jãri ata wãdait'ee. 15 Mãùrã chõo jõnùde k'ãipatap'edaamãi ãra ne–animalaarã p'e iru p'anadap'edaa ichiaba mãgee k'ayaa k'achiapa piuk'oo wãdait'ee: caballoorã, mulaarã, camelloorã, burroorã awaraa ne–animalaarã ãrapa k'opatap'edaa paara.
16 Maap'eda ma eujãdepemaarã Jerusalén p'uurudepemaarã ome chõodap'edaa chok'ai p'aneedap'edaarã año chaa Jerusalén p'uurudee wãdait'ee ãchi rey waibùa, Jõmaarã Ak'õre Waibùamaa ùt'aa t'âdait'ee mãik'aapa Rancho te oopata fiesta oodait'ee. 17 Maapai na p'ek'au eujãdepema awara–awaraa eujãdepemaarã Jerusalendee wãda–e pùrã ãchi rey waibùa, Jõmaarã Ak'õre Waibùamaa ùt'aa t'âde, ãra eujãde k'oi baai–e pait'ee. 18 Egipto pidaarã paara ma Rancho te oopata fiesta oode Jerusalendee wãdaipia bù. Wãda–e pùrã, Jõmaarã Ak'õre Waibùapa ãramaa ne–inaa k'achia auk'a ooit'ee awaraa eujãdepemaarãmaa ooit'ee bùk'a. 19 Irua mãgá ne–inaa k'achia ooit'ee jõmaweda eujãdepemaarã wãda–e p'anùùrãmaa Rancho te oopata fiesta oode.
20 Maapai caballoorãde jâ bùpata campanade nãga p'ã bait'ee: “Awara bùda Jõmaarã Ak'õre Waibùa–it'ee”. P'aareerãpa ne–animalaarã peedap'edaa nechiara chuupata k'uuru jîp'aa ichiaba Ak'õre Waibùa–it'ee awara p'aneedait'ee taza altar k'îrapite bùpatak'a. 21 Wãara maapai k'uuru jõmaweda Jerusalén p'uurude bee, Judá eujãde bee paara Jõmaarã Ak'õre Waibùa–it'ee awara p'aneedait'ee. Eperãarã wãdak'ãri ne–animalaarã paapide ma ne–animalaarã chiara ma k'uurude paara chuudait'ee. Mapa maapai Jõmaarã Ak'õre Waibùa tede netopataarãpa k'uuru ma ne–animalaarã peedap'edaa chiara chuudait'ee waa netoda–e pait'ee.