Jõmaarã Ak'õre Waibùa k'îra wãree ichi tede
2
1 Atane siete ewari veintiuno Tachi Ak'õre Hageo ome waya pedeeji. 2 Jaraji Hageopa nãga jaranamerã Judá eujã ak'ùpari Salatiel warra Zorobabelmaa, p'aareerã poro waibùa Josadac warra Josuemaa mãik'aapa ichi p'uuru pidaarã apemaarãmaa: 3 “¿Parãdepema abaapa mù chonaarãwedapema te unujik'ã? ¿K'îra wãree baji–ek'ã? Mamîda mù idiwedapema te mak'ùara k'îra wãree–e bù. ¿Mãga–ek'ã? 4 Mapa parã, Zorobabel, p'aareerã poro waibùa Josadac warra Josué ome, apema p'uuru pidaarã paara, t'ãripa mù te chiwidi oo k'inia p'anéetù. ¡Mimia p'anéetù mù parã ome bapariit'ee perã! Mù, Jõmaarã Ak'õre Waibùapa mãga jara bù. 5 Mùa jaradak'a parã p'uuru pidaarã Egipto eujãdeepa uchiadak'ãri, mù Jaure parã ome bapariit'ee. Mapa waaweenáatù. 6 Taarã–e nùde mùa wërepiit'ee pajã, na p'ek'au eujã ome; p'usa, eujã paara. 7 ¡Awara–awaraa eujãdepemaarã p'anapatamãi wërepiit'ee! Mapa mãpemaarãpa ãchi net'aa pi–ia mù tede aneedait'ee. Mãgá waya k'îra wãree beeit'ee. Mù, Jõmaarã Ak'õre Waibùapa mãga jara bù.” 8 Jõmaarã Ak'õre Waibùapa jara bù: “Na p'ek'au eujãdepema p'arat'a, nêe ome mëré. 9 Na t'êepema te pipùara beeit'ee chi naapema oodap'edaa k'ãyaara. Nãgà oodap'eda, nama k'ãiwee p'anapataadait'ee. Mù, Jõmaarã Ak'õre Waibùapa mãga jara bù.”Tachi Ak'õrepa p'aareerãmaa jara pëida
10 Persiadepema rey Darío año omé rey bùde atane nueve, ewari veinticuatro Jõmaarã Ak'õre Waibùa Hageo ome waya pedeeji. 11 Jaraji ichi k'ap'ùa pari p'aareerãmaa ichi leyde nãga iidinamerã:
12 —K'îsíatù nãgùde. Eperãpa nechiara Tachi Ak'õre–it'ee awara bùda beda ateei ichi ârùpema p'arude. Mãgá ateerude ichi p'arupa pan, guiso, vino, aceite wa awaraa ne–inaa k'opata t'õbairu pùrã, ¿mãgà ne–inaa ichiaba awara beeik'ã aji, Tachi Ak'õre–it'ee?
Ma p'aareerãpa p'anaujida:
—Awara p'aneeda–e pait'eeda ajida.
13 Mãpai Hageopa mãgaji:
—Awaraade k'îsíatù. ¿Eperã Tachi Ak'õre tede p'oyaa k'ait'a wã bù k'ap'ùa piuda t'õbaida k'aurepa mãgee ne–inaa k'opata t'õbairu pùrã, ma ne–inaa ichiaba Tachi Ak'õre te k'ait'a ateeik'araa beeik'ã? aji.
P'aareerãpa p'anaujida:
—Mãga bùpù ajida.
14 Mãpai Hageopa mãgaji:
Jõmaarã Ak'õre Waibùapa nãga jara bù:
“¡Mãga bù ichiaba mù p'uuru pidaarã ome! Ãra mù te k'ait'a wãdaik'araa bù mù k'îrapite ãrapa oopata, ãchia ne–inaa primiciak'a aneepata paara k'achia bairã. 15 Ârawedapema parãpa nãgùde k'îsiadaipia bù. Mù p'uuru pidaarãpa mù te chiwidi oo p'aneedait'ee pak'ãri, 16 ¿k'ãata p'asaji ãra ome? Eperãpa net'a tau p'e iru p'anadap'edaamaa wãk'ãri bulto veinte atade, bulto diezpai unu ataji. Jõdee vino jupatamaa wãk'ãri chok'o waibùa cincuenta atade, chok'o veintepai unu ataji. 17 Mãga p'asaji mùata parãpa ne–uudap'edaamaa k'ayaa k'achia baripida perã mãik'aapa hielo tau pëida perã, mùmaa chupùria iididai jîak'aapa. Mamîda parãpa at'ãri mùde ijãa k'iniada–e paji. Mù, Jõmaarã Ak'õre Waibùapa mãga jara bù. 18 Mamîda idi, atane nueve, ewari veinticuatro parãpa mù tedepema basa oo iru p'anù. 19 Mapa ûrítù. Idiwedapema mùa parã pia ak'ù bapariit'ee. Net'a tau waibùa iru p'anadait'ee chi ùapatamãi. Uvajõ, higuerajõ, granadojõ, olivo t'a waide chau–e bù mîda, mùa pia chaupiit'ee.’ ”
Jõmaarã Ak'õre Waibùapa Zorobabelmaa jarada
20 Ma ewateweda Jõmaarã Ak'õre Waibùa Hageo ome waya pedeeji. 21 Jaraji irua Judá eujã ak'ùpari Zorobabelmaa nãga jaramerã: “Mùa pajã, eujã paara wërepiit'ee. 22 Mùa na p'ek'au eujãdepema reyrã uchiapiit'ee ãchi rey su–ak'ù beeparideepa mãik'aapa ãchi, ãchi jua ek'ari beerã ome juatau wêe pùk'a papiit'ee. Ãchi jura chõopata carrok'a bee pùrabaipiit'ee aùde wãpataarã ârù. Mãgá caballoorã, ma ârù wãpataarã paara piuk'oodait'ee. Ma chaachaa piuit'ee ichi auk'aa espadapa. 23 Mamîda ma ewate mùa pù, Salatiel warra, mùchi mimiapari Zorobabel, jâait'ee. Mùa pù jùrùt'erada perã, pù pia ak'ù bapariit'ee eperãpa ichi tauchaa bùpari sello pia ak'ùparik'a. Mù, Jõmaarã Ak'õre Waibùapa mãga jara bù.”