Sofonías
Tachi Ak'õre pedee jarapari Sofoniapa p'ãda
Sofonías, Tachi Ak'õre pedee jaraparipa jarada Judá eujãdepemaarãmaa
1
1 Jõmaarã Ak'õre Waibùapa pedee na librode p'ã bù k'awapiji ichi pedee jarapari Sofoniamaa. Sofonías ak'õre Cusí paji. Cusí ak'õre Guedalías paji. Guedalías ak'õre Amarías paji. Amarías ak'õre Ezequías paji. Sofoniapa Tachi Ak'õre pedee jarapachi Judadepema rey Amón warra Josías rey bùde.Ewari cherude ne–inaa k'achia p'asait'ee
2 Jõmaarã Ak'õre Waibùapa nãga jara bù: “Mùa na p'ek'au eujãdepema ne–inaa chok'ai bee jõmaweda k'iniipiit'eeda aji. 3 Jõpiit'ee eperãarã, ne–animalaarã, ipanaarã, toidapema chik'o k'îra t'ãdoo. Mãgá mùa k'achia beerã p'oyaait'ee mãik'aapa wêpapiit'ee. Eperãarã jõmaweda jõpiit'eeda” aji.
Ichiaba Jõmaarã Ak'õre Waibùapa nãga jara bù:
4 “Mùa Judá eujãdepemaarã miapiit'ee, Jerusalén p'uurudepemaarã paara. Maap'eda apidaapa k'irãpada–e pait'ee ãchia ijãadap'edaa ak'õre waibùa apata Baal ichi p'aareerã ome mùa ma jõmaweda jõpiit'ee perã. 5 Mãgá ichiaba jõpiit'ee eperãarã te k'iru p'ep'edee ârùùpa ne–inaa pajãde nâbùmaa ùt'aa t'âpataarã mãik'aapa eperãarã mùde ijãapatada apata mîda, ak'õre waibùa apata Moloc k'îrapite bedabaipataarã. 6 Mãgá mùa jõpiit'ee ma jõmaweda mù yiaraa iru p'anapataarã mùde ijãa amaadap'edaa perã.
7 K'îup'ee p'anéetù mù, Jõmaarã Ak'õre Waibùa k'îrapite. Taarã–e nùde mùa ooit'ee mùchi eperãarã ome p'aareerãpa oopatak'a ne–animalaarã peedap'eda, paadak'ãri. Ma–it'ee mùa awaraa eujãdepemaarã t'â pëiji. 8 Ma ewate mãùrãmaa mùa mùchi eperãarã peepik'ãri, peepiit'ee reydeerã, poro waibùarã iru jua ek'ari beerã mãik'aapa jõmaweda awaraa eujãdepemaarãk'a p'aru jâpata mãùrã ak'õre waibùa apataarãmaa ùt'aa t'âdak'ãri. 9 Ma awaraa ak'õre waibùa apataarãde ijãapataarã, rey ek'ari beerã ome mãgá jõpiit'ee ãrapa awaraarã net'aa jãri ata wãdap'edaa perã ãchi poro waibùa tede bùdait'ee.
10 ”Ma ewate Jerusalén p'uurude ûridait'ee eperãarã biapi chupùria iidi jõnùpa p'uuru t'ùak'au bù muralladepema puerta Pescado apatamãi, p'uuru chiwidi aù ik'aawa beemãi mãik'aapa ûridait'ee k'achia beerãpa ãchi te ãrik'oo p'anù Jerusalendepema ee jêra bùmãi. Mù, Jõmaarã Ak'õre Waibùapa mãga jara bù. 11 Barrio del Mercadode p'anapataarã, t'ãri p'uapa bíaji parã t'ãidepema net'aa netopataarã p'arat'a t'erabaipataarã paara k'iniik'oodait'ee perã. 12 Maapai Jerusalén p'uurude ma chõode chedait'eerãmaa mùa jùrùpiit'ee audua beerã, chi ãchia k'iniatapai oopataarã. Mãgee eperãarã jùrùdait'ee eperãpa net'aa pi–ia lamparapa jùrùparik'a. Mùa mãgeerã mãgá jùrùpiit'ee audua pedee jarapata perã: ‘Jõmaarã Ak'õre Waibùapa taimaa maarepida oo–e pait'ee; ne–inaa pia, ne–inaa k'achia paara.’ 13 Ma ewate mùa pëidaarãpa mãgeerã net'aa jãri atadait'ee mãik'aapa ãra te ãrik'oodait'ee. Ãrapa te oo p'anù mîda, aùde p'anadak'aa pait'ee mãik'aapa ãrapa uva k'arra jau p'anù mîda, madepema vino uvajõdee ooda maarepida toda–e pait'ee.”
Tachi Ak'õrepa eperãarã miapiit'ee ewate
14 Taarã–e nùde Jõmaarã Ak'õre Waibùapa eperãarã mãgá miapiit'ee. Taarã–e ma ewate pait'ee. Ma ewate t'ãri p'uapa jõmaarã bia jõnadait'ee. Sõcharraarãpa paara biadait'ee apidaapa ãra k'aripa cheda–e p'anadairã. 15 Ma ewate Tachi Ak'õrepa jõmaarãmaa ichi k'îrau unupiit'ee. Eperãarã k'îsia jõnadait'ee mãik'aapa k'awada–e pait'ee k'ãata oodaipia bù ãchi k'îra unuamaa iru p'anapataarãpa ãra net'aa ãrik'oo wãdait'ee perã. Ma ewate p'ãriudariit'ee mãik'aapa jâararapa purjoo nâbeeit'ee. 16 Eperãarãpa trompeta jîwaa nâbù ûridait'ee soldaorã biapi ome ãchi k'îra unuamaa iru p'anapataarã ãchi p'uuru t'ùak'au bù murallamaa, aùde torre beemaa chõode chedak'ãri. 17 Jõmaarã Ak'õre Waibùapa jara bù: “Ma ewate mùa eperãarãmaa ne–inaa audú k'achia oopiit'ee perã, ãra tau p'ãriu beeråk'apù pariatua nipadait'ee. Ma jõma ãramaa p'asait'ee ãrapa mù, Jõmaarã Ak'õre Waibùade ijãa amaadap'eda, p'ek'au k'achia oopatap'edaa perã. Ma ewate k'achia beerãpa ãra waa waibùa bat'apidait'ee na eujãde yooro p'ora waibùa paraaparik'a mãik'aapa ãra k'ap'ùa piuda eujãde baaidap'edaa mik'ia jõnadait'ee. 18 Ma ewate Jõmaarã Ak'õre Waibùapa ichi k'îrau unupik'ãri, eperãarã ichi juadeepa uchiada–e pait'ee p'arat'a wa nêe waibùa iru p'anù pùjida. Apidaamaa p'oyaa p'aada–e pai ãra ma k'achiadeepa uchia atadamerã. Na p'ek'au eujãdepemaarã irudepai ijãadak'aa p'aneedait'ee perã, audú k'îrau bait'ee mãik'aapa ewari abaade eperãarã jõmaweda jõpiit'ee t'ùpùtaupa p'ûajara p'ooda paa jõparik'a.