Habacucpa ùt'aa t'âda
3
1 Tachi Ak'õre pedee jarapari Habacucpa nãga ùt'aa t'âji.a2 Jõmaarã Ak'õre Waibùa, eperãarãpa mùmaa k'awapidak'ãri pùa ne–inaa pia oopariida pù eperãarã k'aripait'ee, mù audupùara pù waawee beeji. Pùa naaweda oopariidak'a waya óoji nãgaweda mù chok'ai bùde. Mamîda tai, pùde ijãapataarã, chupùria k'awáaji ârapema ne–inaa k'achia oopataarã miapiru misa.
3 Jõmaarã Ak'õre Waibùa, chi p'ek'au wêe bapari Temán eujã, pia jarait'eera Edom eujãdeepa mãik'aapa Parán ee jêra bùdeepa cheji. Ichi k'îra wãreede cheda perã pajã ipuru pùk'aji iru k'îra wãreepa. Mapa eperãarã jõmaweda irumaa pedee pia jarapachida. 4 Iru âdaa baji ak'õrejîru âdaaparik'a tap'edaweda uchiak'ãri mãik'aapa iru juadeepa pabáik'apù bee uchiapachi, iru jua k'aurepa iru jõmaarã k'ãyaara waibùara bairã. 5 K'ayaa pëiji iru naa mãik'aapa k'ùamiapa eperãarã piupipari iru t'êe cheji. 6 Iru ak'ùnâ beek'ãri, awêrachaipa na eujã wëredachi. P'uuru pidaarãmaa ak'ùk'ãri, jõmaweda wëredachida p'era jõnùpa. Iru juapa chonaarãwedapema ee ùt'ùa bee ùrabaidachida mãik'aapa iru chonaarãweda nipada ee jêra bù eujã jewedaak'a p'aneejida. Ma ne–inaa iru juapa mãgá awaradaidap'edaa mîda, Tachi Ak'õre ichita auk'a bapari. 7 Mùa unuji Tachi Ak'õre Waibùa mãgá wãyaarude Cusandeepa uchiadap'edaarã te ne–edee ooda p'erapa miru p'anadak'ãri mãik'aapa Madián eujãdepemaarã ãchi tede wërek'oodak'ãri.
8 Jõmaarã Ak'õre Waibùa, ¿pù k'îrau bajik'ã to ome wa p'usa ome ma ne–inaamaa jâarara ârù pù chek'ãri chõo k'awaa bù ichi caballo ârù wa carretade cheparik'a? Mãgá pùa pùchi eperãarãmaa ãra k'îra unuamaa iru p'anapataarã p'oyaapiji. 9 Mãgá pùchi eperãarã pari chõode chek'ãri, ooji chõo k'awaa bùpa ooparik'a ichi ematrùma êt'a atap'eda, sia trùit'ee pak'ãri. Pabai baaipiji mãik'aapa k'oira baaipiji eujã t'oomerã to chak'e chok'ara beepa. 10 Ee ùt'ùa beepa pù unudak'ãri wëredachida mãik'aapa mãgá k'oira eujãde baaik'ãri, to choma to t'aide weeda k'aurepa p'usa golpe jîwaapachi p'usara t'o jõnùpa. 11 Pù mãgá chõode chek'ãri, pùa sia trùda k'aurepa mãik'aapa espada uchiterree bada k'aurepa ak'õrejîru atane ome pajãde ak'ùnâ p'aneejida. 12 Pù eperãarã ome k'îraudaik'ãri, na p'ek'au eujãde nipa cheji mãik'aapa awara–awaraa eujãdepemaarã ârù t'ùa pùk'aji. 13 Pù cheji pù p'uuru pidaarã ãra rey pùa jùrùt'erada ome k'aripait'ee. Eperãarãpa te wãrapatak'a te k'irudeepa chi basa parumaa, mãga pùk'a pùa k'achia beerã rey jõpiji, p'uuru pidaarã iru jua ek'ari p'anadap'edaa paara. 14 Ma audua beerã nãumiapa tai p'uuru pidaarã ome chõode chedak'ãri, k'îsiajida tai jîchoopidait'ee mãik'aapa t'êepai merã peek'oodait'ee awaraa chupùria beerãmaa oopatap'edaak'a. Mamîda pùchi siapa ãra soldaorã peek'oo wãji, ãchi poro waibùa paara. 15 Caballoorã p'iraruta toida t'îudak'ãri, pania k'õp'ep'eepipatak'a, mãga pùk'a pùa ooji jâararade p'usa ârù nipak'ãri.
16 Mùa ma jõma ûrik'ãri, t'ãri ma–ãri beeji mãik'aapa mùchi i wëre nâbeeji p'oyaa pedeek'aa bamerã. Mãga nùde ichiaba k'ap'ùa t'ûmaa, juatau wêe beeji. Mamîda mãga unuda perã ârá mùa k'ãiwee nùit'ee Tachi Ak'õre Waibùapa ewari cherude tai eujãde chõode cherutaarã k'achiade baaipik'ãri. 17 Higuera pak'urude wa uva k'arrade chi jõ chau–e beeru pùjida maa–e pùrã olivo pak'urude wa net'a tau uudade chi t'a chau–e beeru pùjida maa–e pùrã ovejaarã, chivoorã wa p'ak'aarã wêe beeru pùjida, 18 mù o–îa bapariit'ee k'awa bairã Jõmaarã Ak'õre Waibùapa mù k'aripapari k'achia beerã juadeepa. 19 Ne–inaa jõmaweda Jõmaarã Ak'õre Waibùa jua ek'ari nâbù. Irua mù juataura papipari. Mù k'ap'ip'ia p'irapipari bigik'a mãik'aapa mù ee ùt'ùa beede nipapipari.