2
1 P'uuru jâapataarã torrede ùt'aa wãpatak'a t'ùmà ak'ùpataadait'ee, mãga pùk'a mù torrede ùt'aa wãit'ee mãik'aapa nùit'ee Tachi Ak'õrepa mùa iidida p'anauru misa.Tachi Ak'õrepa p'anauda
2 Mãpai Tachi Ak'õrepa mùa iidida nãga p'anauji:
“Tablero yoorodee oodade mùa pùmaa k'ãimok'araa pùk'a bùde unupiru letra waibùapa p'åji jõmaweda wãyaarutaarãpa leedamerã. 3 Mãgá p'åji ewari cherude mùa pùmaa unupiru p'asait'ee perã; ewari awara bùda ma–it'ee pak'ãri. Ichita p'asait'ee mùa unupiruk'a taarã nâbù pùjida. Mapa pù t'ãride chóoji nù bù misa mãga p'asamerã. 4 Nãga p'ãipia bù: “Audua p'anapataarã piuk'oodait'ee Ak'õre Waibùade ijãadak'aa perã. Jõdee ne–inaa k'achia oodaamaa p'anapataarã chok'ai p'aneedait'ee Ak'õre Waibùade ijãapata perã. 5 P'arat'a paraa beerã ichita waapùara k'inia p'anapata. Mapa p'oyaa âidak'aa. Ichiaba audua beerã ichita jùrùpata eperãarã chok'araara p'oyaadait'ee. Tachi piudák'apù p'anù p'uuru pidaarã jõmaweda jõpi k'inia p'anadairã.” 6 Mamîda t'êepai mãùrã jua ek'ari p'anapataarãpa mãùrã oo iru p'aneedait'ee ãchi poesiade mãik'aapa ãchi adivinanzade. Made jaradait'ee: “Aai, Tachi Ak'õrepa parã k'achiade baaipiit'ee chîara net'aa jãri atapata perã. ¿Sãapai t'ãri k'achiapa parã ome tewe paraa beerãmaa waa p'aapida–e pait'ee? 7 Ewari cherude parã atu p'anùde ãrapa jõdee parãmaa t'ãri k'achiapa p'aapidait'ee jõmaweda parãpa jãri atadap'edaa awaraarã juak'aawa. Maapai parãta wërek'oodait'ee p'era nâbùpa. 8 Parãpa awaraa eujãdepemaarã net'aa chok'ara jãri atadap'edaa ãradepema chok'ai p'aneedap'edaarãpa jõdee parã juadeepa jãri atadait'ee. Ak'õre Waibùapa ãramaa mãga oopiit'ee parãpa eperãarã audú chok'ara peek'oodap'edaa perã mãik'aapa ãra p'uuru ãrik'oo wãdap'edaa perã.
12 Aai, Tachi Ak'õrepa parã k'achiade baaipiit'ee awaraarãmaa ne–inaa k'achia oopatap'edaa perã net'aa, eperãarã paara atadait'ee parã p'uuru oodak'ãri. Ma awara ãramaa ma p'uuru oopidak'ãri, ãra chok'ara piujida. 13 Mãgá awaraa eujãdepemaarã parãpa pãchi eujãdee ateedap'edaarã audú mimiapata mãik'aapa sêdaipata ma p'uuru oodait'ee. Mamîda pari mãga oopata taarã–e nùde Jõmaarã Ak'õre Waibùapa ma p'uuru paa jõpiit'ee perã. 14 P'usa paniapa ipuru bùk'a, maapai na eujãde jõmaarãpa Tachi Ak'õre Waibùa k'awadait'ee.
15 Aai, Tachi Ak'õrepa parã k'achiade baaipiit'ee parãpa awaraa eujãdepemaarãmaa nãga oopata perã. Eperãpa chîaramaa vino topiparik'a piu beek'ãri mãik'aapa ichi k'ap'ùa ãk'adaa jõmaarãmaa unupik'ãri, ma eperã oo iru bait'ee, mãga pùk'a parãpa awaraa eujãdepemaarãmaa pãchi k'îraupa to pùk'apipata ãra k'îra nejasiapidait'ee. 16 Awaraarãmaa mãga oopata perã parãta jõdee k'îra nejasia p'aneedait'ee Jõmaarã Ak'õre Waibùapa parãmaa ichi k'îrau topik'ãri. Maapai jõmaarãpa parã t'o p'anadai k'ãyaara, parã ek'ariara unudait'ee ãra taide ãk'adaa pùk'a nipadait'ee perã. 17 Maapai parãpa Líbano ee jêra bùdepema pak'uru t'upee jõdap'edaa pari parã eujã ãri baibeeit'ee. Mãpema ne–animalaarã mêepema piupidap'edaa pari mêepema ne–animalaarãpa parã p'erapidait'ee.
18 ¿K'ãare–it'ee parãpa ne–inaa k'îrak'a bù oo k'awa bùmaa oopipata aù k'îrapite ùt'aa t'âdait'ee? ¿Seewade ijãa k'inia p'anùk'ã? ¿Chi ma ne–inaa metaldee oopari eperã–ek'ã? ¿Irua ijãaik'ã ichia oodade ma ne–inaa pedeek'aa mîda? 19 Aai, Tachi Ak'õrepa parã k'achiade baaipiit'ee mãgee ne–inaa pak'urudee oodamaa: “¡Ârùmáji!” apata perã maa–e pùrã mãudee oodamaa: “¡P'irabáiji!” apata perã. Mãgee ne–inaa nêepa wa p'arat'apa p'êe p'anù mîda, maarepida p'oyaa jaradak'aa chok'ai–e p'anadairã. 20 ¡Jõdee Jõmaarã Ak'õre Waibùa ichi ùt'aripema tede bapari! ¡Iru k'îrapite eperãarã jõmaweda k'îup'ee p'anéetù!