Habacuc
Tachi Ak'õre pedee jarapari Habacucpa p'ãda
1
1 Jõmaarã Ak'õre Waibùapa ichi pedee jarapari Habacucmaa na librode jara bù k'awapiji.Habacucpa Tachi Ak'õremaa jarada
2 Jõmaarã Ak'õre Waibùa, ¿sãapai pùa ûriit'eema mùa chupùria iidimaa bù pù eperãarã pari? ¿Sãapai tai k'aripa cheima k'achia beerã juadeepa? 3 ¿Sãap'eda pùa mùmaa na ne–inaa audú k'achia unupi bùma? ¿Sãap'eda pùa choomaa bùma pù eperãarãmaa ne–inaa k'achia oo p'anù misa? Mù ik'aawa p'anùùrãpa chîara peepata, chõo jùrùpata awaraarã ome mãik'aapa aupedeeyaa p'anapata. 4 Maperã p'anapataadak'aa pù leyde jara bùk'a mãik'aapa oodak'aa pùa oopi bùk'a. Tai poro waibùarãpa pù eperãarã pia ak'ùdak'aa mãik'aapa ùmùateepata ne–inaa k'achia ooda–ee p'anùùrãmaa.
Tachi Ak'õrepa p'anauda
5 Mãpai Tachi Ak'õrepa ichi eperãarãmaa mãgaji: “¡Awaraa eujãdepemaarã parã ik'aawa p'anapata ak'àtù! ¡Pia ak'àtù mãik'aapa p'era p'anéetù! Ewari cherude mùa ãra t'ãide ne–inaa ooit'ee. Mãga k'awaadak'ãri, parã p'era pùk'a p'anadait'ee mãik'aapa ijãada–e p'anadait'ee. 6 Mùa Babilonia eujãdepemaarãa awaraa p'uuru pidaarã k'ãyaara waibùara papiit'ee. Mãùrã t'ãri k'achia–idaa p'anapata, chõoyaa p'anapata perã, chõode uchiadait'ee jõmaweda awaraa eujãdepemaarã ome. 7 Mãgá t'ãri k'achia–idaa p'anapata perã mãik'aapa Ak'õre Waibùade ijãadak'aa p'anapata perã, ãra wãrutamaa ãchia k'iniatapai oo wãpata. Mapa ãchi k'aurepa eperãarã p'era jõnapata. 8 Ãra caballoorã p'iradak'ãri, leopardo k'ãyaara k'ap'ip'iara p'ira pùk'apata mãik'aapa k'achiara pùk'a p'anù lobo k'ãyaara p'ãrik'ua nipadak'ãri jarrapisiapa. Ma caballo ârù wãpataarã t'ùmùùpa chepata mãik'aapa chõode uchiadak'ãri, ãchi caballoorã jâtùjâtùa wãpata p'ira k'iniapa. ¡Nejâpù atu bùde ne–animal ârù baai chepatak'a, mãga pùk'a p'anù! 9 Mãùrã wãrutamaa ne–inaa jõmaweda ãrik'oo wãpata chok'ara nipapata perã. Mãùrã pania wêe bù eujãdeepa nãu golpe p'uaparík'apù p'anù. Mapa ãra k'aurepa jõmaarã p'era jõnapata. Mãgá nipapata perã eperãarã chok'ara jita atapata ãchi eujãdee ateedait'ee. Ipu nãusaa tau chok'ara paraaparik'a, mãga pùk'a presoorã chok'ara jita atapata. 10 Awaraa eujãdepemaarã reyrã, poro waibùarã paara oo iru p'anapata mãik'aapa ëipata p'uuru murallapa t'ùak'au bee unudak'ãri, rampa oodap'eda, mãgee p'uurude t'îu k'awapata perã. 11 Nãumiak'a p'anù isapai eujã awara–awaraade wãyaapata perã. Ak'õre waibùa apidaade ijãadak'aa perã k'îsiapata ne–inaa jõmaweda oodai ãchi juadoopa.
Habacucpa waya pedeeda
12 Jõmaarã Ak'õre Waibùa, ¡pù ichita bapari; piuk'aa pait'ee! ¡Pù k'achia wêe bapari perã, mùa pùde ijãapari! ¡Mù–it'ee pù mãu choma pùk'a bù pù jua ek'ari mù pia bapari perã! Pùa ma Babiloniadepemaarã waibùa papiji pùa oopi bùk'a oodamerã; pù eperãarã miapidamerã. 13 Pù k'achia wêe bapari perã, unuamaa bù eperãarãpa ne–inaa k'achia oodak'ãri. Mãga bùta, ¿sãap'eda chooparima ijãadak'aa beerã ome? ¿Sãap'eda ma k'achia beerã ichiak'au bùparima pùde ijãapataarãmaa ne–inaa k'achia oopataadamerã? 14 ¿Sãap'eda eperãarã ichiak'au bù k'inia bùma toidapema chik'ok'a p'anapataadamerã maa–e pùrã ne–animalaarãk'a p'anapataadamerã, poro waibùarã jua ek'ari p'anapata–ee? 15 Babilonia eujãdepemaarã, ma caldeo pidaarã to–ùapataaråk'apù p'anù. To–ùapataarãpa at'arrayapa wa t'ùrùpa chik'o chok'ara peedap'eda, ma chik'o p'e atadak'ãri, o–îadaipata. 16 Ma at'arraya wa t'ùrù k'aurepa chik'o warraa bù iru p'anapata perã k'odait'ee, ma net'aa ãchi ak'õre waibùarãk'a iru p'anù. Ma pari ne–animalaarã peedap'eda, paapata maa–e pùrã ma k'îrapite ne–inaa t'ûa bapari paapata. 17 ¿Mãgá oodait'eema ma caldeo pidaarã tai ome? ¿Tai peek'oodait'ee ãchia chik'o p'e atadap'edaa ome oopatak'a? ¿Chupùria k'awa–ee ichita eperãarã pee wãdait'eema?