3
1 ¡Wãara Nínive p'uuru jõit'ee ma p'uurudepemaarãpa eperãarã audú peei awaa p'anapata perã, seewa jarai awaa p'anapata perã mãik'aapa chîara net'aa chùa atai awaa p'anapata perã! 2 ¡Ârá ûrítù ma p'uurude biuk'a nâbù: soopa wùruta, carro mãu ârù jâtùk'ãri mãik'aapa chi rueda jîwaa p'anadak'ãri, caballoorã p'ira wãruta! 3 ¡Ichiaba ak'àtù soldaorã caballo ârù wãpataarã! ¡Ãchi caballoorã bainâ p'anù chõode wã k'iniapa! ¡Ak'àtù espada urua nâbù mãik'aapa miasu uchiterree nâbù mãgeepa chõoruta misa! ¡Ak'àtù eperãarã k'ap'ùa piuda pëi nâbù! ¡Audú chok'ara paraa perã ma chõo chedap'edaarã aù ârù baai wãpata! 4 Mãga p'asamaa bù ma p'uuru prostitutak'a bada perã. Awaraa eujãdepemaarãpa ma p'uuru pi–ia unudap'edaa perã, mamaa chepachida mãik'aapa mãdepema poro waibùarã jua ek'ari p'aneejida ùmùk'îra prostituta k'îra wãree unup'eda, iru jua ek'ari beeparik'a. Prostitutapa ùmùk'îraarã k'ûraparik'a ichi ome k'ai k'inia p'aneedamerã, mãga pùk'a ma p'uuru pidaarãpa awaraa eujãdepemaarã k'ûrapachida ãchi jua ek'ari esclavoorãk'a p'anapataadamerã.5 Mãgá prostitutak'a p'anapatap'edaa perã Jõmaarã Ak'õre Waibùapa ãramaa jara bù: “Mùa parã p'uuru k'îra unuamaa iru bapari. Mapa parã miapiit'ee. Eperãpa wêra k'achia p'aru chi k'îra parumaa jira ataparik'a jõmaarãmaa chi ãtau* ak'ùpiit'ee mãik'aapa mãgá k'îra nejasiapiit'ee, mãga pùk'a mùa ooit'ee parã p'uuru ome. Mãgá awaraa eujãdepemaarã reyrãpa parã p'uuru pidaarã k'îra nejasia jõnù unudait'ee. 6 Wêra k'achia ome oopatak'a net'aa k'achia* irumaa bat'at'aadak'ãri, jõmaarãpa iru oo iru p'anadamerã, mãga pùk'a mùa ooit'ee parã p'uuru ome. 7 Eperãarãpa unudak'ãri mùa parã p'uuru ome ooda, parã p'uuru pidaarã unuamaa iru p'anapataadait'ee mãik'aapa jaradait'ee: ‘¡Nínive p'uuru jõdachi! ¿K'airãpa ma p'uurudepemaarã chupùria k'awaadaima? ¿Sãma mùa unuima apida ãra–it'ee jêe k'inia bù?’ 8 Nínive p'uuru, pù piara–e bù Egipto eujãdepema p'uuru waibùa Tebas k'ãyaara. Ma p'uuru Nilo to ide bada perã ma to p'uuru murallapa t'ùak'au badak'a baji. 9 Ma p'uurudeepa Egipto eujãdepema poro waibùarãpa ãchi eujã, Etiopía eujã paara ak'ùpachida. Ma awara pedeeteepachida Fut eujãdepemaarã ome mãik'aapa libio pidaarã ome chõoda–ee p'anapataadait'ee. Maperã Tebas p'uurudepemaarã k'îsiajida ãchi p'uuru pidaarã awaraa eujãdepemaarã k'ãyaara juataura p'anajida. 10 Mamîda ãra k'îra unuamaa iru p'anapatap'edaarãpa ãra p'uuru p'oyaajida mãik'aapa ma p'uurudepemaarã awaraa eujã t'ùmà badamaa ateejida. Ma p'uurude chõo jõnùde ãra k'îra unuamaa iru p'anapatap'edaarãpa mãdepema warra chak'eerã mãumaa bat'a peek'oo wãjida calle nêrabai bada chaa mãik'aapa mãdepema poro waibùa beerã jita atadap'eda mãik'aapa cadenapa jâ atadap'eda, suerte jemenejida k'awadait'ee k'airãpa ãchi esclavoorãk'a atadait'ee. 11 Eperã it'uapa piu baibeep'eda, eujãde baaiparik'a, mãga pùk'a pù, Nínive p'uuru, piu pùk'a beeit'ee Tachi Ak'õre k'îrau to bùpa. Mãga nâbùde pùdepemaarã ãra k'îra unuamaa iru p'anapataarã waaweepa jirabododait'ee awaraa eujãde mirudai jîak'aapa. Mamîda mãga ooda–e pai. 12 Eperãpa higuera pak'uru higojõ waraa bee chau nâbù wërek'ãri mãik'aapa ma higojõ jurruk'oodak'ãri, aweda ichia p'e atai k'oit'ee. Mãga pùk'a parã Asiria eujãdepemaarã p'uuru murallapa t'ùak'au bee parã k'îra unuamaa iru p'anapataarã juade baaidait'ee. 13 Parã soldaorã wêraaråk'apù p'anù. Parã eujãde t'îupata ee esajîak'a bee soldaorã p'uuru murallapa t'ùak'au bee pia jâada–e p'anadairã, parã k'îra unuamaa iru p'anapataarã made t'îudait'ee mãik'aapa ma p'uuru paa jõdait'ee. 14 Nínive p'uurudepemaarã, parã k'îra unuamaa iru p'anapataarã mãgá parã p'uurudee chedait'ee perã, pania t'ù atátù ùa bùdait'ee. Mãgá mãùrãpa parã p'uuru wap'ùra ata chedak'ãri, parãpa pania iru p'anadait'ee. Yooro ârù t'àatù ladrillo oodait'ee. Mãgá mãùrã chedai naaweda, parã muralla pi–iara oodai. 15 ¡Mamîda ma jõmaweda ooruta pùjida, parã p'uuru paa jõdait'ee mãik'aapa sisi audú chok'ara tachi eujãde chepatak'a, mãga pùk'a mãùrãpa parã p'uurude p'anùùrã espadapa peek'oo chedait'ee! Sisi îwapatak'a parã jida chok'ara îwapachida. 16 Mapa parã p'uurudepema netopataarã audú chok'ara paraaji; chok'araara p'anajida lucero pajãde nâbù k'ãyaara. Mamîda sisiirãpa tachi eujãde ne–inaa k'arra jõmaweda k'odap'eda, wãabai uchiapatak'a awara ãi wãdait'ee, mãga pùk'a ma netopataarãpa ãchi net'aara p'e atadap'eda, parã p'uurudeepa uchiak'oodachida. 17 Sisiirã audú chok'ara auk'a nipapatak'a, mãga pùk'a parã poro waibùarã mãik'aapa soldaorã poro waibùarã audú chok'ara nipapata. Jâarara t'aawaa k'aurepa eujã k'ûrasaadaik'ãri, sisiirã eperãarã ne–uu muralla k'ak'at'uapa t'ùak'au beede mirupata mãik'aapa ak'õrejîru waya jêra beek'ãri, seedaipata mãik'aapa wãabai uchia wãpata, eperãarãpa k'awada–e bùmaa. Mãga pùk'a p'anù parã p'uurudepema poro waibùarã, soldaorã poro waibùarã paara.
18 ¡Aai, Asiria eujãdepema reyrã rey waibùa, pù jua ek'ari eujã awara–awaraa ak'ùpataarã piujida! P'arat'a paraa beerã pù jua ek'ari p'anadap'edaa ichita k'ãi pùk'adait'ee, piuk'oodap'edaa perã. Awaraa eperãarã pù jua ek'ari p'anapatap'edaarã eera paraa bùmaa jîchoo wãdap'edaa perã, apidaapa ãra chip'e ata–e pai. 19 Pù eperã abaliat'aadák'apù bù. Apidaapa pù jùpapi–e pai. Eperãarãpa pù k'achiade baaida ûridak'ãri, o–îapa ãchi jua t'aap'epata pùa, pùchi auk'aarã ome ãra jõmaarãmaa ne–inaa k'achia oopatap'edaa perã.