Miqueas
Tachi Ak'õre pedee jarapari Miqueapa p'ãda
Tachi Ak'õrepa Samaria p'uuru ãpùte jarada
1
1 Jõmaarã Ak'õre Waibùapa na pedee jara pëiji Moréset p'uurudepema Miqueas k'ap'ùa pari. Irumaa k'awapiji Samaria p'uurua mãik'aapa Jerusalén p'uurudeb p'asait'ee bada Judá eujãdepema reyrã Jotán, Acaz, Ezequías aba–abaa rey p'anùde.2 Na p'ek'au eujãdepemaarã jõmaweda, ûrítù mùa jararu. Jõmaarã Ak'õre Waibùa ichi ùt'aripema tedeepa parã ãpùte nãga jara pëiru. 3 Irua ichi tedeepa uchiait'ee mãik'aapa na p'ek'au eujãdepema ee ârù nipapariit'ee. 4 Iru bùùrù ma eede t'ùak'ãri, torrabaidait'ee veladepema cera t'ùpùtaude bùda torrabaiparik'a mãik'aapa eujã jewedaade wee chedait'ee to choma k'ida chaaree weeparik'a. 5 Irua mãga oopiit'ee Jacobdeepa uchiadap'edaarãpa oo k'iniada–e p'anù perã irua jara bùk'a. Israel eujãdepema rey jua ek'ari p'anapataarãpa p'ek'au k'achia oopata. ¿Sãap'eda ãchia Tachi Ak'õrepa jara bùk'a ooda–e p'anùma? ¡Ãra p'uuru waibùa Samariade awaraa ak'õre waibùa apataarãmaa ùt'aa t'âpata k'aurépata irua jara bùk'a ooda–e! ¿K'airã k'aurepa Judá eujãde eperãarã awaraa ak'õre waibùa apataarãmaa ùt'aa t'âpatamãi wãpata? ¡Ãra p'uuru waibùa Jerusalendepemaarãpa mãgee ne–inaa oo iru p'anù k'aurépata mãga oopata!
6 Ma p'uurudepemaarãpa mãga oopata perã, Jõmaarã Ak'õre Waibùapa jara bù: “Mùa Samaria p'uurudepemaarã k'îra unuamaa iru p'anapataarãmaa ma p'uuru ãripiit'ee te basadepema mãu aupai p'aneedamerã ma p'uuru badamãi. Ma p'uurudepema mãu ãripida ee edaa jîchoopidait'ee eujã jewedaadee. Mãgá ma p'uuru badamãi eujã ewaraa k'obù beeit'ee mãik'aapa mama uva k'arra jaudait'ee. 7 Ne–inaa juapa ooda aù k'îrapite ùt'aa t'âpata jõmaweda toodoosuapidait'ee mãik'aapa net'aa ùmùk'îraarãpa teedap'edaa prostitutaarã ome k'ãidap'edaa pari jõmaweda paa jõdait'ee. Mamîda ma ne–inaa toodoosuapidadepema nêe p'arat'a ome p'êe p'anadap'edaa ãchi eujãde ateedait'ee mãik'aapa aùdee waya net'aa pia oopidait'ee. Maap'eda auk'a ma net'aa teedait'ee ãchi eujãdepema prostitutaarãmaa.”
Miqueas t'ãri p'ua bada
8 Tachi Ak'õrepa Samaria p'uuru mãgá jõpiit'ee perã mù, Miqueas jêeit'ee mãik'aapa jarajêeit'ee ma p'uuru–it'ee. T'ãri p'uapa bùùrù arajãgaa, p'aru wêe nipapariit'ee mãik'aapa bia nipapariit'ee mêepema ne–animal k'achia bùk'a mãik'aapa lechuzak'a. 9 Samaria p'uuru eperã abaliat'aadák'apù bù. Apidaapa iru jùpada–e pai. Ârá ma k'achia beerã Judá eujãde paara chejida mãik'aapa mùchi auk'aarã p'anapata p'uuru Jerusalén murallapa t'ùak'au bùdepema t'îupatamaa pachejida. 10 Judá eujãdepemaarã, tachi k'îra unuamaa iru p'anapataarã Gat p'uurudepemaarãmaac jaranáatù tachi na k'achiade baairuta. Mãùrã taide jêenáatù. Mamîda Bet Leafrá p'uuruded yooro p'orade pùrat'àji ak'ùpidait'ee t'ãri p'ua p'anù. 11 ¡Tachi eujãde t'îudap'edaarãpa Safir p'uurudepemaarã ãchi eujãdee ateeruta; ãk'adaa, k'îra nejasia! ¡Zanán p'uurudepemaarã ãchi p'uurudeepa p'oyaa uchiada–e, ma k'îra unuamaa iru p'anapataarãpa ãchi p'uuru wap'ùra iru p'anadairã! ¡Ichiaba Bet Ésel p'uurude jêe para bù! ¡Mapa parã mamaa p'oyaa miru wãda–e! 12 Ak'õre Waibùapa ma k'achia beerã chepida perã Jerusalén p'uuru muralla t'îupatade, Marot p'uurudepemaarã audú k'îsia jõnù nùruta misa apidaapa ãra k'aripamerã. 13 Laquis p'uurudepemaarã, pãchi caballoorã jâ atátù carrode mãik'aapa isapai uchíatù ma k'achia beerã naa. Awaraa Judá eujãdepema p'uurudepemaarã k'ãyaara parãpa naapùara oo k'inia p'anajida Israel eujãdepemaarãpa ne–inaa k'achia oo p'anapatap'edaak'a. Parã k'aurépata Sión p'uurudepemaarã auk'a k'achiade baaijida. 14 Judá eujãdepemaarã, despedíitù Moréset Gat p'uurudepemaarã ome ãra pãchi eujãde waa p'anapataada–e pait'ee perã. Aszib p'uurudepemaarãpa trampák'apù p'anadait'ee israelitaarã reyrã–it'ee chõo jõnùde mãpema apidaapa ãchi rey k'aripada–e pait'ee perã.
15 Jõmaarã Ak'õre Waibùapa jara bù: “Maresá p'uurudepemaarã, mùa parãmaa paara k'îra unuamaa iru p'anapataarã pëiit'ee parã p'uuru p'oyaadamerã. Judá eujãdepemaarã poro waibùarã paara mirunadait'ee rey David mirudak'a Adulán mãu tede. 16 Judá eujãdepemaarã, t'ãri p'uapa pãchi poro wètù parã warrarã k'inia iru p'anù–it'ee. Pi–ia wètù epa p'anadamerã nejâpù porok'a beemerã parã warrarã t'ùmà ateedait'ee perã.