Jonás
Tachi Ak'õre pedee jarapari Jonás ome p'asada
Introducción
Libro Jonás awaraa libro k'ãyaara nepùrù bù eperã Tachi Ak'õrepa jaradak'a oo–e padamaa p'asada. Na libro leedak'ãri, unudai Tachi Ak'õre pedee jarapari Jonapa oo k'inia–e pada Tachi Ak'õrepa jaradak'a. Irua jaraji Jonás wãmerã Nínive pidaarãmaa jarade ãchia p'ek'au k'achia oopatap'edaa oo amaadamerã (cap. 1). Mamîda Jonapa oo k'inia–e paji. Ma k'aurepa perá p'usade piuit'ee paji. Mãgá perá piu wãde Jonapa jaraji ooit'ee Tachi Ak'õrepa jaradak'a. Wãji jarade Nínive pidaarãmaa Tachi Ak'õrepa ooit'ee bada ãchi ome. Ijãajida mãik'aapa waa ooda–e paji ãchia p'ek'au k'achia oopatap'edaa. Mapa Tachi Ak'õrepa ma p'uuru pidaarã chupùria k'awaaji (cap. 2–3). Jonapa mãga unuk'ãri, k'îraudachi Tachi Ak'õre ome, oo–e pada perã ichia jaradak'a (cap. 4).
Na librode unudai Tachi Ak'õre jõmaarã k'ãyaara waibùara bù mãik'aapa chupùria k'awaayaa bapari. Tachi Ak'õrepa chupùria k'awaapari p'uuru pidaarã ãrapa ne–inaa k'achia oo p'anù oo amaadak'ãri mãik'aapa wãara t'ãripa irude ijãadak'ãri mãik'aapa oodak'ãri irua jara bùk'a. Irua p'uuru pidaarã mãgá chupùria k'awaapari, mãgùùrã ichi p'uuru pidaarã–e mîda.