Abdías
Tachi Ak'õre pedee jarapari Abdiapa p'ãda
Tachi Ak'õrepa Edom eujãdepemaarã miapiit'eeda ada
1
1 Tachi Ak'õrepa ichi pedee jarapari Abdiamaa na pedee Edom eujã ãpùte k'awapiji.Judá eujãdepemaarã, tachia ûrijida Tachi Ak'õrepa eujã awara–awaraa p'anapataarãmaa jara pëida ichia pëida k'ap'ùa pari. Jara pëiji: “¡Chõonadáma Edom eujãdepemaarã ome!
Jõmaarã Ak'õre Waibùapa Edom eujãdepemaarãmaa jara bù: 2 “Mùa parã juatau wêepiit'ee awaraa eujãdepemaarã k'îrapite. Ãra k'ãyaara parã ek'ariara papiit'ee ãrapa parã k'îra unuamaa iru p'anapataadamerã. 3 ¿Parã audua p'anapata–ek'ã ee ùt'ùa bee nok'odepema peña bide parã p'uuru waibùa murallapa t'ùak'au bùde p'anapata perã mãik'aapa k'îsiapata perã mama p'anapata misa, apidaapa parã p'oyaada–e pai? Mamîda mãga k'îsiadak'ãri, pãchi itu k'ûramaa p'anù. 4 Nejâpùpa audú ee ùt'ùa bùmãi lucero k'ait'a pùk'a bù ichi te ooparik'a, mãgá parãpa pãchi te ooruta pùjida, mùa mamãik'aapa atapiit'ee/ baaipiit'ee.”
5 Ichiaba Ak'õre Waibùapa jara bù: “¿P'ãrik'ua nechùayaa beerã tachi tede t'îu chedak'ãri net'aa atade, ãchia chùa ata k'inia p'anù aupai chùa atapata–ek'ã? Ichiaba eperãarãpa uvajõ oro wãdak'ãri, ¿ûk'uru atabëipata–ek'ã chupùria beerã–it'ee? Mamîda parã k'îra unuamaa iru p'anapataarã parãmaa chõo chedak'ãri, maarepida atabëida–e pait'ee. 6 Esaudeepa uchiadap'edaarã, mãùrãpa parã net'aa jõmaweda chùa ateedait'ee. ¡Maarepida p'arat'a net'aa pi–ia ome atabëida–e pait'ee! 7 Awaraa eujãdepemaarãpa parã ome pacto oojida mîda, parã k'ûrajida. Mãùrãpa parã jërek'oodait'ee pãchi eujãdeepa. Parã k'õp'ãyoorãpa paara parã ome chõodait'ee mãik'aapa parã ome pan k'odap'edaarãpa trampa oodait'ee parã aùde baaik'oodamerã. Mãga nùde jaradait'ee: “¡Edom eujãdepemaarã k'îsia k'awaada–epù!”
8 Jõmaarã Ak'õre Waibùapa jara bù: “Mùa Edom eujãdepemaarã miapiru ewaride ãradepema k'îsia k'awaa beerã jõpiit'ee; mãgá Esaú eedepema apataarã poro wêsaa beerã wêpapiit'ee. 9 Maapai chõo k'awaa beerã parã p'uuru waibùa Temande p'anù wëre p'anadait'ee p'era jõnùpa. Maperã Esaú eedepema apataarã jõmaweda piuk'oodait'ee.
Edom eujãdepemaarãpa ne–inaa k'achia oodap'edaa
10 Mãgá parã k'îra nejasia p'aneedait'ee mãik'aapa parã eujãdepemaarã piuk'oodait'ee parãpa k'aripadap'edaa perã awaraa eujãdepemaarãpa pãchi auk'aarã Jacobdeepa uchiadap'edaarã peedak'ãri. 11 Mãùrã Judá eujãde t'îudak'ãri mãik'aapa Jerusalén p'uurudepema puerta ãrik'oo wãdap'eda, madepema net'aa pia k'ap'ùa suerte jemenedak'ãri chùa ateedait'ee, parã mãùrãk'a p'aneejida. ¡Maarepida Judá eujãdepemaarã k'aripada–e paji! 12 Parãpa mãgá pãchi auk'aarã, Judá eujãdepemaarã ek'ariara ak'ùdaik'araa ba–e pak'aji mãik'aapa ãra ma k'achiade baaidak'ãri, o–îa p'anadaik'araa ba–e pak'aji. Ichiaba ãra ma k'achiade p'anadak'ãri, parãpa ãra oo iru p'anadaik'araa ba–e pak'aji. 13 Mùchi eperãarã chupùria jõnùde parã mùa p'uuru awara bùdade t'îudaik'araa ba–e pak'aji. Awaraa eujãdepemaarãpa ãra k'îra nejasiapidak'ãri, parãpa o–îa p'anadaik'araa ba–e pak'aji mãik'aapa ãra net'aa pia chùa ata wãdak'ãri, parãpa pãchi–it'ee net'aa ûk'uru atadaik'araa ba–e pak'aji. 14 Maap'eda ma k'achiadeepa ûk'uru Jerusalén p'uurudepemaarã p'uuru taawaa jirabododak'ãri, parãpa nùdaik'araa ba–e pak'aji ma jîchoodap'edaarã jita atadait'ee mãik'aapa peedait'ee maa–e pùrã teedait'ee ãra k'îra unuamaa iru p'anapatap'edaarãmaa. 15 Parãpa mù eperãarã ome oodap'edaak'a mãgá mùa p'asapiit'ee parã ome. ¡Auk'a k'achiade baaidait'ee!
Israelitaarã pia uchiadait'ee
“Tachi Ak'õre ewari waibùa ewate k'ait'a bù. Maapai irua jõmaweda eujãdepemaarãpa oopatap'edaa ak'ùit'ee mãik'aapa jarait'ee pia wa k'achia. 16 Judá eujãdepemaarã, mùa p'uuru awara bùdade mãgá parã, mù eperãarãmaa copa mù k'îraupa ipuru badadeepa topida paara, audupùara awaraa eujãdepemaarãmaa ma copadeepa topiit'ee. Madeepa topataadait'ee ãchi wêpadarutamaa. 17 Mamîda chi Sión eedee wãpataarã chok'ai uchiadait'ee mùa ma ee awara bùda perã mùchi–it'ee. Maapai Jacobdeepa uchiadap'edaarã ãchi eujãde waya p'anapataadait'ee. 18 Maapai Jacobdeepa uchiadap'edaarã, pia jarait'eera Judá eujãdepemaarã mãik'aapa Josedeepa uchiadap'edaarã, pia jarait'eera Israel eujãdepemaarã t'ùpùtáuk'apù p'anadait'ee mãik'aapa Edom eujã p'ûajara p'oodak'a bait'ee. Ma t'ùpùtauk'a beerãpa Edom eujãdepemaarã jõpidait'ee. ¡Esaudeepa uchiadap'edaarã apida chok'ai uchia–e pait'ee! Ma jõmaweda p'asait'ee mù, Jõmaarã Ak'õre Waibùapa jaradak'a.
19 Maapai Judá eujãdepemaarã Néguev eujãde p'anapataarãpa Esaudeepa uchiadap'edaarã eujã eera beede jãri ata wãdait'ee. Jõdee Judá eujãdepemaarã ee jêra bùde p'anapataarãpa filisteorã eujã jewedaa jãri ata wãdait'ee. Ichiaba israelitaarã waya p'anapataadait'ee Efraindeepa uchiadap'edaarã eujã badade mãik'aapa Samaria p'uuru ik'aawa bee eujã badade. Jõdee Benjamín ëreerãdepemaarã Galaad eujãde p'anapataadait'ee. 20 Israelitaarã k'îra unuamaa iru p'anapatap'edaarãpa ãra awaraa eujãde ateejida mîda, ãradeepa uchiadait'eerãpa waya chedait'ee mãik'aapa Canaán eujã jãri ata wãdait'ee Sarepta p'uuru parumaa. Ichiaba ma k'îra unuamaa iru p'anapataarãpa Judá eujãdepemaarã awaraa eujãde ateejida mîda, ãradeepa uchiadait'eerã Sefaraddeepa waya chedait'ee mãik'aapa Néguev eujãde p'uuru bee jãri atadait'ee. 21 Maap'eda ãra Sión eedee wãdait'ee mãik'aapa madeepa Esaudeepa uchiadap'edaarã eujã ee beede ãchi jua ek'ari iru p'anapataadait'ee. Maapai Jõmaarã Ak'õre Waibùa jõmaarã rey pait'ee.