Eperã apida Tachi Ak'õre Waibùa juadeepa uchiai
9
1 K'ãimok'araa pùk'a bùde mù, Amopa unuji Tachi Ak'õre Waibùa altar ik'aawa bainâ bù.Mãga nùde irua mãgaji:
“¡Mù tedepema columna bee ùt'aik'a eere golpe sìji chi columna bùradamerã mãik'aapa mapema basa wërek'oodap'eda, ma jõma eperãarã teeda p'anùùrã ârù baaidamerã! Chi madeepa chok'ai uchiarutaarã mùa peepiit'ee espadapa. Mãgá eperã apida mù juadeepa chok'ai uchia–e pait'ee. 2 Miru k'iniapa ãrapa eujã ek'ari piudaarãmãi k'oro ataruta pùjida, mùa ãra jãmãik'aapa uchiapii. Ùt'aa pajãde wãruta pùjida, mùa edaa chepii. 3 Carmelo ee nok'ode mirunaruta pùjida, mùa mamaa wãi ãra jita atade. P'usa nãpùa bùde wãruta pùjida mùa jarai nemîsiapa ãra k'aak'oodamerã. 4 Ãra k'îra unuamaa iru p'anapataarãpa ãchi eujãdee ãra ateeruta pùjida, mùa ãra mama peepiit'ee espadapa. Mùa ãra ak'ùi k'ãyaara ãramaa pia oo k'inia bairã, ak'ùit'ee ãramaa k'achia oo k'inia bairã.”
5 Mãpai Amopa mãgaji: “Tachi Ak'õre, Jõmaarã Ak'õre Waibùapa na p'ek'au eujã t'õbaik'ãri, wëredaipari mãik'aapa eperãarã jêepata ma awêrachai wãyaarude piudap'edaarã–it'ee. Mãga nùde eujã #jirapari mãik'aapa #jiratùpari año chaa Nilo to ooparik'a k'oijara pak'ãri. 6 Tachi Ak'õre Waibùa ùt'ari bapari ichi eujãde mãik'aapa irua pajã ooji na p'ek'au eujã #wãk'amerã. Iruata p'usadepema pania p'e atap'eda, baaipipari eujã ârù. Iru t'âjarapata Jõmaarã Ak'õre Waibùa.
7 Iru, Jõmaarã Ak'õre Waibùapa nãga jara bù: “Israelitaarã, mù–it'ee parã waibùara–e p'anù etiopea pidaarã k'ãyaara. Wãara mùa parã Egipto eujãdeepa uchia ataji. Mamîda mùa ichiaba filisteorã Creta isladeepa aneeji mãik'aapa siriorã Quirdeepa aneeji na eujãde p'anapataadamerã.
8 “Mùa unu bù parãpa p'ek'au k'achia ooi awaa p'anapata. Mapa mùa parã k'iniipiit'ee. Mamîda jõmaweda Jacobdeepa uchiadap'edaarã jõpi–e pait'ee. Mù, Jõmaarã Ak'õre Waibùapa mãga jara bù. 9 Mùa jarait'ee parã k'îra unuamaa iru p'anapataarãpa awaraa p'uuru pidaarãmaa k'achia oodai k'ãyaara israelitaarã ome oodamerã eperãarãpa oopatak'a trigo tau sark'amade nêesidak'ãri. Ma sark'ama uriade mãu chak'e apida p'oyaa wãyaa–e bùk'a, mãga pùk'a ãradepema k'achia beerã apida chok'ai uchiada–e pai. 10 Jõmaweda p'ek'au k'achia oopataarã mù p'uuru pidaarã t'ãide bee espadapa piuk'oodait'ee. Mãga p'asait'ee mãùrãpa jara p'anù mîda: ‘Taimaa ne–inaa k'achia p'asa–e pait'ee.’
Tachi Ak'õrepa israelitaarã waya pia ak'ùpariit'ee
11 “Ewari cherude mùa Rey David trua waya papiit'ee naaweda badak'a. Ooit'ee israelitaarã t'ãidepema te k'arawapataarãpa oopatak'a. Te t'eedaik'ãri, ãrapa t'eedeechoo jêra bada araa p'epata te chiwidik'a bainâ bùdait'ee. Mãgá parã waya p'uuru waibùa p'anadait'ee chonaarãweda p'anadap'edaak'a. 12 Maapai israelitaarãpa waya p'oyaadait'ee Edom eujã beedadepemaarã awaraa eujã naaweda mùa k'aripap'eda, ãra jua ek'ari p'anadap'edaarã ome.” Tachi Ak'õre Waibùa, chi mãga jara bùpa ichita ooit'ee ichia jaradak'a.
13 Tachi Ak'õrepa ichiaba jara bù: “Ewari cherude net'a tau audú chauit'ee perã trigo at'ãri ewadait'ee eujã poreetùpataarã aradopa mimiapata atanede. Ichiaba uvajõ audú chauit'ee perã uvajõ at'ãri piarsî ju p'anadait'ee net'a tau uupata atanede. Mãgá uvajõ audú chauit'ee perã chi ba uva k'ãi ee jêra bùde beedeepa weeit'ee pania weeparik'a. 14 Maapai mùa mù p'uuru pidaarã aneeit'ee ãra k'îra unuamaa iru p'anapataarãpa presoorãk'a ateedap'edaa eujãdeepa mãik'aapa ãra waya pia ak'ùpariit'ee. Mãgá ãra p'uuru ãridap'edaa chiwidi oodait'ee aùde p'anapataadait'ee; waya uva k'arra jaudait'ee mãik'aapa madeepa vino todait'ee; ne–inaa awaraa uudait'ee mãik'aapa madeepa nek'odait'ee. 15 Eperãpa ne–inaa k'arra jauparik'a, mãga pùk'a mùa ãra waya p'anapiit'ee ãchi eujãde mãik'aapa apidaapa ma eujã mùa ãramaa teedadeepa ãyaa wãpi–e pait'ee/ jëre–e pait'ee.” Tachi Ak'õre Waibùapa mãga jaraji.