Amós
Tachi Ak'õre pedee jarapari Amopa p'ãda
Tachi Ak'õre pedee jarapari Amopa Ak'õrepa jarapida jarada
1
1 Tachi Ak'õre pedee jarapari Amós Tecoaa p'uurudepema paji. Ovejaarã waripachi mãik'aapa ak'ùpachi. Tachi Ak'õrepa Amomaa na pedee Israel eujãde k'awapiji. Amopa na pedee jara nipaji año omé awêrachai wãyaai naaweda, Ozías Judá eujãdepema rey bùde mãik'aapa Joás warra Jeroboán Israel eujãdepema rey bùde.2 Amopa nãga jaraji:
“Tachi Ak'õre Waibùapa pa jîwaaparik'a biak'ãri Jerusalén p'uurude bù Sión eedeepa, ovejaarã ak'ùpataarã eujãdepema p'ûajara pùùdaipari mãik'aapa Carmel eedepema p'ûajara uratùdaipari.”
Tachi Ak'õrepa jarapida Israel eujã ik'aawa p'anapatap'edaarã ãpùte
3 Tachi Ak'õrepa nãga jara bù:
“Siria eujãde bù Damasco p'uurudepemaarãpa audú p'ek'au k'achia oopatap'edaa perã, mùa ãra miapiit'ee. Galaad eujãdepemaarã jõ wãpachida ne–uuparipa ooparik'a ne–inaa hierrodee oodapa clavo ome eujã poreetùk'ãri. 4 Mãga oodap'edaa perã mùa t'ùpùtauk'a beerã pëiit'ee ãra p'uurudee paa jõdamerã ãra rey Jazael palacio aù ik'aawa bee soldaorã te Ben Adadpa oopida ome. 5 Damascodepema muralladepema puerta pi–ia jâ iru p'anù mîda pak'uru chaareepa, mùa ma t'ùpùtauk'a beerãmaa mãgà pak'uru ãripiit'ee mãùrã p'uuru jãde t'îuk'oodamerã mãik'aapa Bicat Avénb eujã jewedaadepema rey Bet Edendepemac rey ome peek'oodamerã. Mãga oodap'eda, siriorã chok'ai p'aneerutaarã presoorãk'a ateedait'ee Quir eujãdee.” Tachi Ak'õre Waibùapa mãga jaraji.
6 Tachi Ak'õre Waibùapa nãga jara bù:
“Filistea eujãde bù Gaza p'uurudepemaarãpa audú p'ek'au k'achia oopatap'edaa perã, mùa ãra miapiit'ee. Awaraarã p'uuru pidaarã chok'ara p'oyaadap'eda, presoorãk'a ateejida Edom eujãdee mama netodait'ee esclavoorãk'a. 7 Mãga oodap'edaa perã mùa t'ùpùtauk'a beerã pëiit'ee Gaza p'uurudepema muralla paak'oo jõdamerã ãra rey palacio ome. 8 Ma awara mãùrãmaa Filisteadepema Asdod p'uurudepema rey Ascalón p'uurudepema rey, Ecrón p'uurudepemaarã paara jõpiit'ee filisteorã wêparutamaa.” Tachi Ak'õre Waibùapa mãga jaraji.
9 Tachi Ak'õre Waibùapa nãga jara bù:
“Tiro p'uurudepemaarãpa audú p'ek'au k'achia oopatap'edaa perã, mùa ãra miapiit'ee. Awaraarã p'uuru pidaarã chok'ara Edom eujãdepemaarãmaa esclavoorãk'a netojida, aù naaweda ma p'uuru pidaarã ome pacto oojida mîda. 10 Mãga oodap'edaa perã mùa t'ùpùtauk'a beerã pëiit'ee Tiro p'uurudepema muralla paak'oo jõdamerã ãra rey palacio ome.”
11 Tachi Ak'õre Waibùapa nãga jara bù:
“Edom eujãdepemaarãpa audú p'ek'au k'achia oopatap'edaa perã, mùa ãra miapiit'ee. Ãchi auk'aarã, israelitaarã jùrùpachida espadapa peedait'ee. Êp'e atadak'ãri, chupùria k'awa–ee peek'oo wãjida audú k'îrau p'anadap'edaa perã ãra ome. 12 Mãga oodap'edaa perã mùa t'ùpùtauk'a beerã pëiit'ee Edom eujãdepema Temandee paak'oo jõdamerã Bosrade soldaorã p'anapatamãi paara.”
13 Tachi Ak'õre Waibùapa nãga jara bù:
“Amón eujãdepemaarãpa audú p'ek'au k'achia oopatap'edaa perã, mùa ãra miapiit'ee. Eujã waapùara ata k'inia jõnùpa Galaad eujãdee chõonadak'ãri, mãpema wêra biak'oo beerã bi t'oo wãjida mãpemaarã jõmaweda jõ k'inia p'anadap'edaa perã. 14 Mãga oodap'edaa perã mùa t'ùpùtauk'a beerã pëiit'ee Amón eujãdepema p'uuru waibùa Rabadee mãpema muralla, soldaorã p'anapatamãi paara paak'oo jõdamerã. Ma ewate chõopataarã biapi ûripataadait'ee nãumia p'uapari biuk'a nâbùk'a ome. 15 Ma t'ùpùtauk'a beerãpa Amón eujãdepema rey ichi ek'ari beerã ome t'ùmà ateedait'ee ãchi eujãdee.”