2
1 Tachi Ak'õre Waibùapa nãga jara bù:“Moab eujãdepemaarãpa audú p'ek'au k'achia oopatap'edaa perã, mùa ãra miapiit'ee. Edomdepema rey jãùramaa wãdap'eda mãik'aapa chi bùùrù k'oro atadap'eda, paa jõjida it'abarre p'ora aupai beerumaa. 2 Mãga oodap'edaa perã mùa t'ùpùtau beerãk'a pëiit'ee Moab eujãdee Queriot p'uurudepema soldaorã p'anapata te paa jõk'oodamerã. Mãgá chõopataarã biuk'a jõnù misa mãik'aapa trompeta chaa jõnù misa, Moabdepemaarã chok'ara piudait'ee. 3 ¡Mãgá mùa Moab eujãdepema rey iru ek'ari bee poro waibùarã ome peepiit'ee!”
Tachi Ak'õre Waibùapa mãga jaraji.
4 Tachi Ak'õre Waibùapa nãga jara bù:
“Judá eujãdepemaarãpa audú p'ek'au k'achia oopatap'edaa perã, mùa ãra miapiit'ee. Ooamaa p'aneejida mù, ãra Ak'õre Waibùapa ãramaa jarateedak'a mãik'aapa mù leyde jara bùk'a. Ma k'ãyaara ãchi chonaarãpa ne–inaa juapa oodap'edaa k'îrapite ùt'aa t'âpatap'edaak'a, ãrapa mãgà ak'õre waibùa apatap'edaamaa auk'a ùt'aa t'âpachida. 5 Mãga oopatap'edaa perã mùa t'ùpùtauk'a beerã Judá eujãdee pëiit'ee Jerusalén p'uurudepema palacio paa jõk'oodamerã.
Ak'õrepa Israel eujãdepemaarãmaa ooit'ee bùda ada
6 Tachi Ak'õre Waibùapa nãga jara bù:
“Israel eujãdepemaarãpa audú p'ek'au k'achia oopatap'edaa perã, mùa ãra miapiit'ee. Ãrapa ne–inaa k'achia ooda–ee p'anùùrã netopata p'arat'a pari mãik'aapa chupùria beerã netopata chancla omé pari. 7 Ne–animalaarã yooro p'ora ârù t'ùapatak'a, mãga pùk'a mãùrãpa ne–inaa k'achia oopata chupùria beerãmaa mãik'aapa juatau wêe beerãmaa. Eperãpa chi warrapa paara esclava wêra aba, ichi aù, k'ãipipata. Mãgee ne–inaa k'achia oodak'ãri, ak'ùpipata mù, mù t'â pia paara waaweedak'aa. 8 Ãra ome tewe paraa beerãpa ãchi p'aru teedak'ãri chi tewe p'oyaa p'aarutamaa, ãrapa ma p'aru ateepata ãchi ak'õre waibùa apata altar ik'aawa ma p'aru ârù jêra p'aneedait'ee. Ma awara tewe paraa beerãpa vino teedak'ãri ãchi tewe p'aadait'ee, ãrapa ma vino topata ãchi ak'õre waibùa apata tede. 9 Ãrapa mãgee ne–inaa k'achia oopata mùata ãra k'aripaji mîda amorreorã jõpik'ãri. Ma amorreorã cedro pak'uru ùt'ùa beek'a maa–e pùrã roble pak'uru chaaree beek'a p'anajida. Mamîda mùata ma pak'urudepema nejõ, chi k'arra paara jõpiji. 10 Aù naaweda mùata parã chonaarã Egipto eujãdeepa uchia ataji mãik'aapa cuarenta año wãyaaru misa, mùa ãra ak'ùpachi pania wêe bù eujãde mùa amorreorã eujã teeit'ee bada parutamaa. 11 Mùa parãdepemaarã ûk'uru bùji mù pedee jarapataadamerã mãik'aapa ûk'uru bùji nazareo pidaarã p'anadamerã. Israelitaarã, ¿wãara–ek'ã mùa ma jõma ooji?”
Mù, parã Ak'õre Waibùapa mãga jara bù.
12 Mamîda paråpata ma nazareo pidaarãmaa vino topijida, mùa jaraji mîda ãrapa maarepida vino tonaadamerã. Ma awara parãpa mù pedee jarapataarãmaa jarajida mùa jarapidak'a jaranaadamerã. 13 Parãpa mãga oopatap'edaa perã mùa parã miapiit'ee. Parã #piarsî pùk'apiit'ee carreta trigo taupa ipuru bù aù ek'ari eujãmaa ooparik'a. 14 Maapai chi k'ap'ip'iara p'irapataarã chok'ai uchiada–e pait'ee; chi juataura beerã juatau wêe pùk'a p'aneedait'ee mãik'aapa sõcharraarã paara mù juadeepa uchiada–e pait'ee. 15 Ematrùmapa trùpataarã ãpùtee jîchoodait'ee mãik'aapa soldaorã k'ap'ip'iara beerã caballo ârù wãpataarã paara chok'ai uchiada–e pait'ee. 16 Ma ewate chõo k'awaa beerã sõcharrara p'anù ãchi arma eujãde bat'ak'oodait'ee isapai jirabodo k'iniapa. Mù, parã Ak'õre Waibùapa mãga jara bù.”