Sãap'eda Tachi Ak'õrepa ichi eperãarã miapida
3
1 Israelitaarã, ûrítù Tachi Ak'õre Waibùapa jara bù parã, irua Egipto eujãdeepa uchia atada eperãarã ãpùte:2 “Awaraa eperãarã/ p'uuru pidaarã jùrùt'erai k'ãyaara mùa parã jùrùt'eraji mùchi eperãarã papiit'ee. Maperã mùa parãpa p'ek'au k'achia oopata chook'aa. Ma k'aurepa mùa parã miapiit'ee.”
Tachi Ak'õre jarapari Amopa jarada
3 Eperãarã omé awara ãyaa auk'a wãdak'ãri, ¿uchiadai naaweda pedeeteepata–ek'ã auk'a wãdait'ee?
4 León siruade niparupa biak'ãri, ¿ne–animal unuji–ek'ã jita atap'eda, k'oit'ee? Chi chak'e mãu tede atabëidapa #biak'ãri, ¿chik'o unu atada perã bia bù–ek'ã? 5 Ipana trampade baaik'ãri, ¿aùde carnada baji–ek'ã? Trampa jâak'ãri, ¿ne–inaa aùde baaiji–ek'ã? 6 P'uurude soldaorã trompeta jîwaa jõnù ûridak'ãri, ¿ma p'uuru pidaarã p'eradaipata–ek'ã? P'uurude mãga p'asak'ãri, p'asapari Tachi Ak'õre Waibùapa mãga p'asapida perã. 7 Tachi Ak'õre Waibùapa ne–inaa ooi naaweda, ma ne–inaa ichita k'awapipari ichi mimiapataarã, ichi pedee jarapataarãmaa. 8 Leonpa biak'ãri, ¿k'aita p'era–e pait'ee? Tachi Ak'õre Waibùapa pedee jarapik'ãri, ¿chisãgà Ak'õre pedee jaraparipa ma pedee jara–e pait'ee?
Tachi Ak'õrepa Samaria eujã jõpida
9 Amopa nãga jara pëiji Asdoddepema palaciode p'anapatap'edaarãmaa mãik'aapa Egipto eujãdepema palaciode p'anapatap'edaarãmaa:
“Samaria p'uuru ik'aawa bee eedee chétù ak'ùdait'ee ma p'uurude p'asaru. Ma p'uurudepemaarãpa chîaramaa ne–inaa k'achia oopata mãik'aapa k'achia p'anapata ãchi k'ãyaara waibùarã beerã jua ek'ari.”
10 Tachi Ak'õrepa jara bù:
“Mãùrãpa ne–inaa pia p'oyaa oodak'aa. Ãchi palaciode ùa iru p'anù awaraarã net'aa chùadap'edaa maa–e pùrã jãri atadap'edaa.”
11 Mãga p'anapata perã Tachi Ak'õre Waibùapa nãga jara bù:
“Ãra k'îra unuamaa iru p'anapataarãpa ãra eujã wap'ùra atadait'ee mãik'aapa ãra soldaorã p'anapata te ãrik'oodap'eda, ãra poro waibùarã palaciode net'aa ùa p'anù chùa ateedait'ee.”
12 Tachi Ak'õre Waibùapa nãga jara bù:
“Ovejaarã ak'ùparipa chi oveja bùùrù omeepai maa–e pùrã chi k'ùùrùdepema k'â aupai león it'aideepa jãri ataparik'a, mãga pùk'a israelitaarã Samaria p'uurude p'anapata chok'ara–eepai uchiadait'ee ãchi k'îra unuamaa iru p'anapataarã juadeepa. Ãra camadepema bùùrù pitepai ome uchiadait'ee.”
13 Tachi Ak'õre, Jõmaarã Ak'õre Waibùapa nãga jara bù:
“Parã Samaria p'uuru ak'ùmaa p'anùùrã, ûrítù mùa jararu Jacobdeepa uchiadap'edaarã ãpùte. 14 Mùa ma israelitaarã miapiit'ee ewate Betel p'uurudepema altar bee jõpiit'ee. Ma altardepema cachok'a bee t'ùap'epiit'ee eujãde baaik'oodamerã. 15 Ãra k'oijara wãyaapata te, p'oojara wãyaapata te paara ãripiit'ee. Ãra te marfil ome ooda, ãra palacio paara mãgá jõpiit'ee.” Tachi Ak'õre Waibùapa mãga jara bù.