4
1 Wêraarã Samaria p'uurude p'anapataarã, parã poree p'anù Basán eujãdepema p'ak'aarãk'a. Parãpa ne–inaa k'achia oopata chupùria beerãmaa mãik'aapa juatau wêe beerãmaa. Pãchi ùmùk'îraarã# chok'apata vino aneedamerã parãpa to k'inia p'anadak'ãri. 2 Tachi Ak'õre Waibùa, chi k'achia wêe bùpa nãga juraaji:“Eperãarãpa chik'o waibùa ganchopa jõi atapatak'a to ide jidiu ateedait'ee, mãga pùk'a ewari cherude parã jõi pùk'a ãyaa ateedait'ee, pãchi warrarã paara. 3 P'uurudepema muralla ãridap'edaa uriadeepa parã jidibabataa atadait'ee mãik'aapa jërek'oodait'ee Hermóna ee bùmaa.”
Tachi Ak'õre Waibùapa mãga jara bù.
Tachi Ak'õrepa israelitaarã ùmùateeda
4 Tachi Ak'õre Waibùapa jara bù:
“Israelitaarã, chétù p'ek'au k'achia oode mùmaa ùt'aa t'âpatamaa Betelde. ¡Audupùara p'ek'au k'achia oo chétù Guilgaldee, mãga ooi awaa p'anapata perã! Parã chedap'edaa norema ne–animalaarã anéetù peedap'eda, mù–it'ee paapidait'ee mãik'aapa aù norema pãchi net'aa diezdepema chaa aba anéetù primiciak'a. 5 Ak'ùpidait'ee mùmaa gracias jara k'inia p'anù pan anéetù primiciak'a paapidait'ee. Awaraa net'aa paara anéetù primiciak'a teedait'ee maap'eda jõmaarãmaa jarak'óotù parãpa teedap'edaa ãrapa parã pia ak'ùdamerã. ¿Mãga ooi awaa p'anapata–ek'ã?”
Tachi Ak'õre Waibùapa mãga jara bù.
Israelitaarãpa p'ek'au k'achia oopata oo amaada–ee p'anadap'edaa
6 Mùata jarrajara pëiji parã p'uuru chaa chik'o wêe p'anapataadamerã, parãpa waya mùde ijãapataadai jîak'aapa. ¡Mamîda mãga oo k'iniada–e paji!
7 “Ichiaba parãpa net'a tau ewadai naaweda, atane õpee wãyaarude, ma ne–uudap'edaa audú pania faltadak'ãri, mùa k'oi chepi–e paji. P'uuru abaamaa k'oi chepiji. Mamîda awaraa p'uurumaa chepi–e paji. Ne–uu abaamãi k'oi cheji. Mamîda awaraa ne–uumãi chi net'a tau pùùdachi aù ârù k'oi che–e pada perã. 8 Maperã p'uuru awara–awaraadepemaarã juatau wêe p'aneedak'ãri, awaraa p'uurudee wãpachida pania jùrùdait'ee. Mamîda ma jõmaarã–it'ee pania araa–e paji. Mùa parã mãgá miapiji mîda, ¡at'ãri mùde waya ijãa k'iniada–e paji!
9 Ichiaba mùa nãumia mãik'aapa ne–animalaarã chak'eerã pëiji parãpa ne–uudap'edaa ãripik'oodamerã. Parãpa huertode uudap'edaa uva k'ãide uudap'edaa ome mùa uratùpiji mãik'aapa parã higuera pak'uru olivo pak'urumaa sisira pëiji k'ok'oodamerã. Mùa parã mãgá miapiji mîda, ¡at'ãri mùde waya ijãa k'iniada–e paji!”
10 “Ichiaba mùa k'ayaa k'achia parãmaa pëiji chonaarãweda Egiptodepemaarãmaa pëidak'a. Parã k'îra unuamaa iru p'anapataarãmaa parã k'ûtrãarã peepiji espadapa mãik'aapa parã caballoorã chùa ateepiji. Mãga nùde mùa parãmaa ma chõodap'edaade piudap'edaarã k'ap'ùa piuda âpiji. Mamîda ¡at'ãri mùde waya ijãa k'iniada–e paji!”
11 “Ichiaba mùa parã ûk'uru jõpiji chonaarãweda Sodoma p'uurudepemaarã Gomorra p'uurudepemaarã ome oodak'a. Mãga nùde parã madeepa chok'ai uchiadap'edaarã pak'uru t'ùpùtaudeepa jãri atadák'apù p'anajida. Mamîda ¡at'ãri mùde waya ijãa k'iniada–e paji!”
12 “Israelitaarã, parã mãgá mùde ijãadaamaa p'anapata perã, ¡mùa parã audupùara miapiit'ee! ¡Mapa k'awáatù taarã–e nùde parãpa mù, pãchi Ak'õre Waibùa, unudait'ee!”
Tachi Ak'õre Waibùapa mãga jara bù.
13 Mãpai Amopa jaraji:
“Tachi Ak'õre Waibùa, chi ee ùt'ùa bee mãik'aapa nãu oodapa. Iruata ichia ooit'ee bù eperãarãmaa k'awapipari. Iruata ãstaawa âdaapipari mãik'aapa p'ãrik'ua p'ãriupipari. Iruata na p'ek'au eujã ùt'ùara bùmaa nipapari. Iru t'âjarapata Jõmaarã Ak'õre Waibùa.