Amopa jarada israelitaarãpa waya Tachi Ak'õrede ijãadamerã
5
1 Israelitaarã, ûrítù mù, Amopa chi–ùapata k'ari pedee jararu parã piudait'eerãde. 2 Israelitaarã wêra ùmùk'îra ome waide k'ãi–e bùk'a bù piuk'ãri. Eujãde baaip'eda, waa p'irabaik'aa paji. Mãga pùk'a israelitaarã ãchi eujãde baaijida awaraarãpa ãra espadapa peedap'edaa perã. Mãgá piudak'ãri, apidaapa ãra p'irabai atada–e paji.”3 Mãga p'asait'ee Tachi Ak'õre Waibùapa israelitaarãmaa nãga jara bùk'a:
“Israel eujãdepema p'uuru abaadeepa mil soldaorã uchiadait'ee jura chõode. Mamîda mãùrãdepema cienpai ãpùtee chedait'ee. Jõdee awaraa p'uurudepema cien soldaorã uchiadait'ee. Mamîda diezpai ãpùtee chedait'ee.”
4 Tachi Ak'õre Waibùapa israelitaarãmaa nãga jara bù:
“Mùde waya ijãapatáatù mãik'aapa mùmaa k'aripa iidi chétù. Mãgá ma ne–inaa k'achia p'asait'ee bùdeepa parã chok'ai uchiadait'ee. 5 Betel p'uurudee chenáatù mãik'aapa Guilgal p'uurudee maa–e pùrã Berseba p'uurudee wãnáatù mùmaa k'aripa iididai jîak'aapa, parã k'îra unuamaa iru p'anapataarãpa Guilgal p'uurudepemaarã t'ùmà ateedait'ee perã mãik'aapa Betel p'uuru jõt'aadait'ee perã.”
6 Tachi Ak'õre Waibùade waya ijãapatáatù mãik'aapa irumaa k'aripa iidítù. Mãgá madeepa parã chok'ai uchiadait'ee. Mamîda irude at'ãri ijãa k'iniada–e p'anù pùrã, irua Josedeepa uchiadap'edaarã ârù cheit'ee t'ùpùtaupa eujã paa jõ cheparik'a mãik'aapa Beteldepema ak'õre waibùa apata apidaapa ma t'ùpùtauk'a bù k'îipida–e pait'ee. 7 Aai, Tachi Ak'õre Waibùapa k'achia ooit'ee parã, chi ne–inaa pia oopataarã miapipataarãmaa mãik'aapa ne–inaa k'achia oopataarã pia ak'ùpataarãmaa. Tachi Ak'õrepa k'inia bùk'a oodai k'ãyaara, ne–inaa k'achia oopata Israelde neera asiak'a beemerã.
8 Iruata lucero pajãde dibujok'a nâbù Pléyades, Orión ome ooji. Iruata ãstaawa âdaapipari mãik'aapa p'ãrik'ua p'ãriupipari. Iruata p'usadepema pania p'e atap'eda, baaipipari eujã ârù. Iru t'âjarapata Jõmaarã Ak'õre Waibùa. 9 Pa tau p'orep'oreparik'a iruata ichiaba soldaorã p'anapatamãi mãik'aapa p'uuru murallapa t'ùak'au bee jõpipari.
10 ¡Parã israelitaarãpa k'îra unuamaa iru p'anapata parãpa ne–inaa k'achia oopatap'edaa jarapataarã charraarã k'îrapite mãik'aapa wãara pedee aupaita jarapataarã! 11 Parãpa chupùria beerã pãchi jua ek'ari k'achia iru p'anapata perã mãik'aapa ãra net'a tau jãri atapata perã, p'anapataada–e pait'ee parãpa te pi–ia mãudee oodap'edaade pãchi–it'ee. Ichiaba ma chupùria beerã mãgá iru p'anapata perã pãchia uva uudap'edaadepema vino toda–e pait'ee.
12 Mù, pãchi Ak'õre Waibùapa k'awa bù parãpa p'ek'au k'achia chok'ara oopata. P'arat'a wa awaraa net'aa jitapata k'achia ooda–ee beerã miapidait'ee mãik'aapa chupùria beerã k'aripadak'aa charraarã k'îrapite p'anadak'ãri. 13 Parã mãgá ne–inaa k'achia audú oopata perã, parã waidoopa k'îsia k'awaa beerã k'îup'ee p'aneepata.
14 Ne–inaa k'achia oodai k'ãyaara jùràtù ne–inaa pia oopataadait'ee. Mãga ooruta pùrã, chok'ai uchiadait'ee Tachi Ak'õre Waibùa wãara parã ome bapariit'ee perã parãpa âraweda jarapatak'a. 15 ¡Ne–inaa k'achia unuamaa iru p'anapatáatù! ¡Ne–inaa pia k'inia iru p'anapatáatù! Charraarã k'îrapite p'anadak'ãri oopatáatù Tachi Ak'õre leyde jara bùk'a. Mãga ooruta pùrã, Jõmaarã Ak'õre Waibùapa parã Josedeepa uchiadap'edaarã chok'ai p'aneedap'edaarã chupùria k'awaaisk'a.
16 Tachi Ak'õre, Jõmaarã Ak'õre Waibùapa nãga jara bù:
“Plaza bee chaa parã piudap'edaa k'aurepa eperãarã jêepi paraait'ee. Calle jã jõmaade parã pari t'ãri p'uapa jarajêedait'ee. Jara pëidait'ee ne–uupataarã p'uurude chedamerã auk'a chi–ùadait'ee mãik'aapa p'arat'a pari jarajêepataarãmaa ichiaba t'â jaradait'ee parã pari jarajêedamerã. 17 Uva k'ãide pedee o–îa ûridai k'ãyaara eperãarã jêepi ûridait'ee mù parãmaa chek'ãri parã miapide.”
Tachi Ak'õre Waibùapa mãga jara bù.
Tachi Ak'õre ewari waibùa ewate
18 Mãpai Amopa mãgaji:
“¡Aai parãpa, chi Ak'õre ewari waibùa ewate nù p'anùùrã, k'achiade baaidait'ee! ¿K'awa p'anùk'ã ma ewate p'asait'ee bù parãmaa? Parã–it'ee ma ewate ewari âdaa bùk'a bai k'ãyaara ewari p'ãriu bùk'a pait'ee. 19 Parã–it'ee ma ewate nãga pait'ee: eperã león bùmãiipa p'irak'ãri, oso real unuruk'a maa–e pùrã eperã ichi temaa t'îup'eda mãik'aapa ichi jua paredmaa âip'eda, taama#k'a k'aat'aaruk'a. 20 Wãara, parã israelitaarã–it'ee ma ewate audú p'ãriu bait'ee; maarepida âdaa wêe.”
21 Tachi Ak'õre Waibùapa israelitaarãmaa nãga jara bù:
“Mùa unuamaa iru bù parãpa mù–it'ee fiesta oopata. Chook'aa parã chip'edaidak'ãri mùmaa ùt'aa t'âpataadait'ee. 22 Mùa k'inia–e bù parãpa ne–animalaarã peedamerã mù–it'ee paa jõpidait'ee. K'inia–e bù net'a tau aneedamerã paapidait'ee; p'ak'a chak'e poree aneedamerã paapidait'ee ak'ùpidait'ee parã t'ãri auk'a bù k'inia p'anù mù ome. Parãpa aneepata mùa pia ak'ùk'aa pait'ee. 23 ¡Parãpa fiestade k'aripata waa k'arináatù mù–it'ee biuk'a aupai nâbairã! ¡Mùa ûriamaa bù parãpa arpa chaapata! 24 Ma k'ãyaara mùa ûri k'inia bù wãara pedee mãik'aapa chupùria k'awaa pedee, mù–it'ee mãgee pedee to ichita weeparík'apù bù perã/ pania poátrù uchia bùmãik'a bù perã.
25 “Israelitaarã, parã cuarenta año eujã pania wêe bùde p'anadak'ãri, ¿mù–it'ee ne–animalaarã peedap'eda, paapachidak'ã maa–e pùrã primicia teepachidak'ã mùde ijãa p'anadap'edaa perã? Mãga ooda–e pajipù. 26 Mamîda ârá pãchi ak'õre waibùa rey Sicut apata k'îrak'a bù mãik'aapa lucero Quiyún k'îrak'a bù pãchi juapa oodap'edaa ateedait'ee parã t'ùmà ateedak'ãri. 27 Mùa parã mãgá esclavoorãk'a ateepiit'ee Damasco p'uuru waawí bù eujãdee.”
Tachi Ak'õre, Jõmaarã Ak'õre Waibùapa mãga jara bù. Mãga t'âjarapata.