Jonás
Tachi Ak'õre pedee jarapari Jonás ome p'asada
Jonapa oo–e pada Tachi Ak'õrepa jaradak'a
1
1 Jonás, Amitay warra, Tachi Ak'õre pedee jarapari paji. Ewari aba Tachi Ak'õrepa irumaa mãgaji: 2 “Wåji p'uuru waibùa Ninivedee mãik'aapa jaráji mùa ne–inaa k'achia ooit'ee, mù baparimãiipa mùa unu bairã ãchia ne–inaa k'achia ooi awaa p'anapata.”Jonás miruda
3 Mamîda Jonás Tachi Ak'õre k'îrapiteepa miru k'iniapa, Tarsis p'uurudee wãji. Mamaa wãrude Jope p'uuru, p'usa ide badamaa wãji. Mama panak'ãri, unuji barco Tarsis p'uurudee wãit'ee bù. Mãpai ichi pasaje p'aap'eda, ma barcode batauji aùde wã nipadap'edaarã ome. 4 Mamîda ma wãrude Tachi Ak'õrepa nãumia golpe p'uapiji. P'usara t'o nâbeek'ãri, ma barco t'oop'edariik'a nâbeeji.
5 Mãpai ma barcode mimiapataarã p'era jõnùpa ãchi chaachaa ùt'aa t'âmaa p'aneejida ãchi ak'õre waibùa apatap'edaamaa. Mãga oojida ma p'usa t'umãtùi jîak'aapa. Ma awara net'aa ma barcode atee wãdap'edaa toidaa bat'ak'oojida barco wêsaadaimerã. Mamîda aù naaweda Jonás barcode edú wãp'eda, pia k'ãi nâbaji.
6 Maperã ma barco p'erapari irumaa wãp'eda, mãgaji:
—¿Sãap'eda pù nama k'ãi nâbùma? ¡P'irabáiji mãik'aapa ùt'aa t'çji pùchi Ak'õre Waibùamaa! Mãgá irua tachi chupùria k'awaaisk'a piunaadamerã.
7 Mãùmisa ma barcode mimiapataarãpa ãchi pitapai mãgajida:
—Suerte jemenedáma k'awaadait'ee k'ai k'aurépata tachi nãgá na k'achiade p'anù.
Mãga oodak'ãri, Jonamaata uchiaji. Mãgá k'awaajida iru k'aurépata ma k'achiade p'anù. 8 Mapa irumaa mãgajida:
—Jaráji sãap'eda tachi na k'achiade p'anù. ¿Pù k'ãare mimiata ooparima? ¿Sãmãik'aapa cheruma? ¿Pù sãpemama? ¿Pù chisãgà p'uurudepemama? ajida.
9 Mãpai Jonapa p'anauji:
—Mù hebreo. Mùa ùt'aripema Ak'õre Waibùade ijãapari. Iruata p'usa mãik'aapa eujã oojida aji.
10 Mãpai Jonapa ma barcode mimiapataarãmaa nepùrùji ichi Tachi Ak'õre ik'aawaapa miru wã. Mãga ûridak'ãri, audupùara p'eradachida mãik'aapa iidijida:
—¿Sãap'eda mãga oojima? ajida.
11 Mãùmisa p'usa audupùara t'o nâbeeji. Mapa irumaa iidijida:
—¿Pù ome k'ãata oodait'eema ajida, na p'usa ip'ii ûu beemerã?
Jonás chik'o choma bùpa mit'aada
12 Mãpai Jonapa mãgaji:
—Parã chupùria jõnù na nãumia k'aurepa mãik'aapa p'usa t'o nâbù k'aurepa. Mùa pia k'awa bù mù k'aurépata nãga jõnù. Mù jita atadap'eda, p'usa jãde bat'at'áatù. Mãgá p'usa ip'ii ûu beeyada aji.
13 Mamîda ma barcode mimiapataarãpa audupùara wiijida ma barco to idee ateedait'ee. Mamîda p'oyaada–e paji waapùara p'usara nâbeeda perã. 14 Mãpai Tachi Ak'õremaa chupùria iidijida: “Tachi Ak'õre, pùa oopari pùchia k'inia bùk'a. Maperã tai piupináaji na eperã piuru k'aurepa. Ma awara ichia ne–inaa k'achia oo–e paji pùrã, taipa ooruta k'achia bùda anaapáde” ajida.
15 Mãga jaradap'eda, Jonás jita atajida mãik'aapa toidú bat'at'aajida. Mãgá p'usa ip'ii ûu beeji. 16 Mãga unudak'ãri, ma barcode mimiapataarãpa Tachi Ak'õre waawee p'aneejida mãik'aapa p'usa ide wiibaidap'eda, ne–animal peejida mãik'aapa iru–it'ee paajida. Ichiaba ãchia jarajida ne–inaa iru–it'ee oodait'ee.
17 Aù naaweda chik'o choma Tachi Ak'õrepa jùrùt'era iru badapa Jonás mit'aaji. Jonás k'ãima õpee ma chik'o bide baji.