Jonás ùt'aa t'âda
2
1 Mãpai Jonapa ma chik'o bideepa Tachi Ak'õremaa nãga ùt'aa t'âji:2 “Ak'õre Waibùa, mù t'ãri ma–ãri nâbak'ãri, pùmaa ùt'aa t'âji. Mãpai pùa mù pedee ûriji. Piudap'edaarã p'anapataarãmãiipa pùk'a mùa pùmaa ùt'aa iidiji. Mãpai pùa mù pedee ûriji. 3 P'usa jã nãpùa bùmãi pùa mù bat'apit'aaji mãik'aapa p'usapa mù pùra atapachi. Pùa pëida p'usa mù ârù wãyaajida. 4 Mãùmisa mùa k'îsiaji: ‘Pù k'îrapiteepa mù jëret'aaji. ¿Ârá sãgá pù temaa wãit'eema?’ 5 P'usapa mù pùra ataji mãik'aapa p'usa mù ârù cheji. Mãga bùde mùchi porode lamak'a beepa pùradaipachida. 6 Nãpùadee t'aa wã nipaji. Paniapa mù mi pùk'at'aaji. Mama presok'a ichita beeit'ee paji. Mamîda pù, mù Ak'õre Waibùapa mù k'aripa ataji ma piu wãdadeepa. 7 Mù k'ap'ùadeepa mù jaure uchia wãk'ãri, mùa pù, Ak'õre Waibùa, k'irãpaji. Mãpai pù ùt'aripema tedeepa mùa chupùria iidida ûriji. 8 Chi ne–inaa juapa ooda vale–e baibù k'îrapite ùt'aa t'âpataarã pùde ijãadaamaa p'anapata. Mapa ãrapa k'awada–e p'anù pùa ãra chupùria k'awaa bù. 9 Mamîda mùchi t'ãripa k'aride pùmaa gracias jarapariit'ee mãik'aapa ne–animalaarã pù–it'ee paapiit'ee. Ma awara mùa pùmaa jaradak'a ooit'ee. ¡Pù, mù Ak'õre Waibùapapai eperãarã k'aripapari!”
10 Mãpai Tachi Ak'õrepa ma chik'o to idee pëiji mama Jonás ãp'ot'aamerã.