Jonapa ooda Tachi Ak'õrepa jaradak'a
3
1 Ma t'êepai Tachi Ak'õrepa waya Jonamaa mãgaji: 2 “Wåji p'uuru waibùa Ninivedee mãik'aapa jaráji mùa pùmaa jarapiru.”3 Mãpai Jonás wãji Nínive p'uurudee Tachi Ak'õrepa irumaa jaradak'a. Nínive p'uuru audú waibùa baji. Ma p'uuru jõma wãyaait'ee ewari õpee t'ùapachida. 4 Jonás ma p'uurude panap'eda, ewari aba tap'edadeepa k'ewara parumaa nãgá golpe jara nipapachi: “¡Ewari cuarenta parumaa Jõmaarã Ak'õre Waibùapa Nínive p'uuru jõma jõt'aait'ee!”
5 Mãga ûridak'ãri, Ninivedepemaarãpa Tachi Ak'õrepa jara pëida ijãa p'aneejida mãik'aapa nãga jarajida: “Nek'oda–ee Tachi Ak'õremaa chupùria iidimaa p'aneedait'eeda” ajida. Maperã chi waibùara beerãdeepa ek'ariara beerã parumaa nek'oda–ee Tachi Ak'õremaa chupùria iidipachida mãik'aapa chi–ùapata p'aru jâjida ak'ùpidait'ee t'ãri p'ua p'anù ãchia ne–inaa k'achia oopatap'edaa k'aurepa.
6 Ninivedepema reypa Tachi Ak'õrepa jara pëida ûrik'ãri, ichi su–ak'ù baparimãiipa p'irabaip'eda, ichi rey p'aru jâpari êrat'aaji mãik'aapa chi–ùapata p'aru jâ beeji. Maap'eda it'abarre p'ora paraadamãi su–ak'ù banaji. 7 Ma t'êepai ichi ek'ari p'anadap'edaa poro waibùarã ome nãga jara pëiji Nínive p'uurude p'anadap'edaarãmaa: “Eperã apida nek'oik'araa bù mãik'aapa pania toik'araa bù. Ma awara pãchi p'ak'aarãmaa, ovejaarãmaa paara nek'opidaik'araa bù; pania jida topidaik'araa bù. 8 Nek'odai k'ãyaara, chi–ùapata p'aru jçtù ak'ùpidait'ee t'ãri p'ua p'anù mãik'aapa t'ãripa Tachi Ak'õremaa chupùria iidítù. Pãchi ne–animalaarã ârù paara chi–ùapata p'aru jâ bàtù mãik'aapa pãchia ne–inaa k'achia oopata oo amáatù mãik'aapa waa t'ãri k'achia–idaa p'ananáatù. 9 Mãga ooruta pùrã, Tachi Ak'õre waa tachi ome k'îrau ba–e paisk'a mãik'aapa tachi jõpi–e paisk'a.”
10 Ãchia oojida reypa jaradak'a. Ãchia ne–inaa k'achia oopatap'edaa oo amaajida mãik'aapa o k'achiadeepa uchia k'inia p'anajida. Tachi Ak'õrepa mãga unuk'ãri, k'îsia awara ataji. Mãgá ichia Jonamaa jarapidak'a oo–e paji.